Hatutan.com, (18 Dezembru 2023), Díli—Japuan ho Timor-Leste (TL) kontinua hametin relasaun bilaterál atu hatán bá dezafiu sira ne’ebé akontese iha nível rejionál no internasionál.

Primeiru-Ministru Japaun, Fumio Kishida simu vizita hosi Primeiru-Ministru (PM), Kay Rala Xanana Gusmão ho Ministru Koordenadór bá Assuntu Ekonómiku, Ministru Turizmu no Ambiente, Francisco Kalbuadi Lay iha ámbitu Simeira Komemorativa tinan 50 Kooperasaun Amizade Japaun-ASEAN iha Tokyo, Japaun husi loron 16-18 Dezembru 2023. Foto: GVPM.

Primeiru-Ministru Japaun, Fumio Kishida hateten, ho sentidu adezaun Timor-Leste bá organizasaun rejionál ASEAN, Japaun sei kontinua presta asisténsia bá reforsa kapasidade rekursu umanu, haforsa no mantein asisténsia sira iha área sira dezenvolvimentu infraestrutura, diversifikasaun ekonómika, presta serbisu sosiál sira no seguransa maritima iha kooperasaun defeza no seguransa.

Lee Mós: Xanana Partisipa Tinan 50 Simeira ASEAN iha Japaun

Assuntu ne’e Fumio Kishida hato’o bainhira simu vizita hosi Primeiru-Ministru (PM), Kay Rala Xanana Gusmão ho Ministru Koordenadór bá Assuntu Ekonómiku, Ministru Turizmu no Ambiente, Francisco Kalbuadi Lay iha ámbitu Simeira Komemorativa tinan 50 Kooperasaun Amizade Japaun-ASEAN iha Tokyo, Japaun husi loron 16-18 Dezembru 2023.

“Nasaun rua ne’e sei haforsa no interkâmbiu entre sidadaun sira ne’ebé nu’udár baze bá relasaun amigável ne’e,” Hatutan.com sita deklarasaun Fumio Kishida iha komunikadu, Segunda (18/12/2023).

Lider nasaun rua ne’e mós troka hanoin kona-bá kestaun diversu sira iha rejionál no internasionál ne’ebé konfirma katak, sei kontinua serbisu hamutuk.

Primeiru-Ministru Fumio Kishida expressa nia gratidaun ba vizita Primeiru-Ministru, Kay Rala Xanana Gusmão iha Japaun.

Fumio Kishida  afirma, Japaun apoia konstrusaun Timor-Leste desde independénsia no saúda relasaun di’ak entre Japaun-Timor-Leste bá Parseria Komprensivu.

Primeiru-Minsitru Fumio Kishida afirma tan katak, bainhira mundu iha virajen istóriku, Japaun atribui importánsia boot ba promosaun kooperasaun ho Timor-Leste no ASEAN, hodi mantein hametin órden internasionál livre no nakloke bazeia bá Estadu soberanu hodi garantia mundu ida ne’ebé dignidade umana ne’e protezida no afirma katak, Japaun kontinua apoia adezaun Timor-Leste ba ASEAN.

Fumio Kishida iha esperansa katak, Simeira Komemorativu sei nakfilak bá oportunidade ida hodi transmite ba jerasaun foun sira kona-ba konfiansa ne’ebé Japaun ho ASEAN konstrui to’o agora no atu hametin liu-tán relasaun entre Japaun ho ASEAN.

Hatán bá deklarasaun ne’e, Primeiru-Ministru, Kay Rala Xanana Gusmão apresia nia vizita ne’e simu ho di’ak hosi autoridade Japaun nian, no desde Timor-Leste nia independénsia to’o ohin loron Japaun suporta maka’as Timor-Leste iha área oioin.

Primeiru-Ministru Timor-Leste ne’e mós afirma katak, sei dezenvolve liu-tán kooperasaun bilaterál entre Timor-Leste ho Japaun.

Kay Rala Xanana Gusmão hato’o agradesimentu bá apoiu sira hosi Japaun inklui suporta Timor-Leste nia adezaun bá ASEAN no deklara katak, nia governu ne’e sei kontinua serbisu hamutuk ho Japaun iha área oioin.

Jornalista: Vito Salvadór