Hatutan.com, (18 Dezembru 2024), Díli—Prezidente Repúblika (PR), José Ramos-Horta husu timoroan hotu-hotu atu hakuak metin unidade no rekonsiliasaun hodi simu-malu nune’e bele kontribui bá prossesu dezenvolvimentu nasionál.

Prezidente Repúblika (PR), José Ramos-Horta. Foto: Elio dos Santos da Costa.

José Ramos-Horta hato’o assuntu ne’e liu hosi mensajen Natal 2023 no tinan foun 2024 bá povu Timor-Leste tomak ne’ebé hela iha rai laran no mós diáspora, nune’e hotu-hotu bele selebra Natal no tinan foun ho domin no dame.

Lee Mós: Ramos-Horta “Salva” Emília Pires-Madalena Hanjam ho Indultu

“Hamutuk iha unidade, soe violénsia hodi simu Nai Maromak nia mensajen dame no rekonsiliasaun iha tinan foun 2024, atu Timor-Leste bele haksoit bá oin iha dezenvolvimentu nasionál,” Ramos-Horta hateten iha Palásiu Prezidensiál Nicolau Lobato Bairru-Pité, Segunda (18/12/2023).

Xefe Estadu konsidera situasaun iha mundu susar tebe-tebes, funu bo’ot iha Gaza-Palestina, funu nafatin iha Ukraina no problema oin-oin nafatin iha Afeganistão, Síria, Yemen, Sudão no rai bara-barak kontinua ho konflitu oin-oin.

Situasaun Ekonómia mundiál aat tebe-tebes kauza husi konflitu sira ne’e, tamba poténsia bo’ot sira ne’e la tau atensaun ba malu, la simu malu no la halo diálogu.

“Ne’e dunik ita Timor-Leste tenke buka halo no hakle’an ita nia dame, ita nia demokrásia no Governu tenke buka tau-matan di’ak liu tán bá ki’ak sira, fó tulun ba seitór privadu atu sira bele fó empregu bá Timoroan sira no hatun ka redúz númeru dezempregu hodi hadi’a povu nia moris,” Ramos-Horta hateten.

Dala ida tan, Xefe Estadu hato’o Natal kmanek no tinan foun di’ak bá Timoroan hotu-hotu.

Jornalista: Vito Salvadór