Hatutan.com, (16 Dezembru 2023), Díli— Korpu bá Pás halo juramentu bá grupu voluntáriu  foun ida hosi Amerika kompostu hosi ema na’in-12 hodi hala’o servisu iha Timor-Leste liuliu servisu direta ho komunidade iha baze.

Korpu bá Pás halo juramentu bá grupu voluntáriu foun ida hosi Amerika kompostu hosi ema na’in-12 hodi hala’o servisu iha Timor-Leste liuliu servisu direta ho komunidade iha baze. Foto: Embaisada EUA iha Díli.

Iha tinan rua oin mai, voluntáriu sira ne’e sei serbí iha munisípiu Baucau, Manufahi, Manatuto no Aileu, iha ne’ebé sira sei promove edukasaun lian Inglés no dezenvolvimentu ekonomia komunidade nian.

Lee Mós: EUA Oferese $200.000 Hodi Dezenvolve Jestaun Iha MS

Serimónia ne’ebé hala’o iha Salaun Konferensia João Paulo II iha Tasi Tolu, Dili, foun lalais ne’e, partisipa hosi Governu Estadus Unidus no Timor-Leste nia ofisiál no parseiru sira, marka konkluzaun bá programa formasaun intensivu durante semana 10, inklui kursu Tétum no kultura, dezenvolvimentu abilidade téknika, no treinamentu kona-bá saúde no seguransa.

“Ami kontente tebes tanba grupu voluntáriu daruak halo ona juramentu iha tinan 2023, nune’e aumenta totál númeru voluntáriu Korpu-da-Pás ba na’in 26,” Hatutan.com sita deklarasaun Diretór Korpu-da-Pás iha Timor-Leste, Jamie Fouss iha komunikadu.

Hahú hosi tinan 2002, Estadus Unidus ho orgullu halo parseria ho Timor-Leste hodi organiza Voluntáriu Korpu bá Pás hodi apoia dezenvolvimentu komunidade Timor-Leste nian.

“Sira-nia servisu refleta ami-nia objetivu investe iha povu Timor-Leste atu nune’e sira bele hari’i nasaun ida-ne’ebé saudável, seguru no prósperu liután,”  nia hateten.

Voluntáriu na’in neen ne’ebé fó formasaun ba manorin-nain lian Inglés sira sei promove edukasaun lian Inglés iha eskola pré-sekundária no sekundária sira, no voluntáriu na’in neen ne’ebé fó formasaun bá dezenvolvimentu ekonómiku komunitáriu (CED) sei promove dezenvolvimentu ekonomia komunidade nian liu hosi kolaborasaun ho komunidade, sentru foinsa’e sira, sentru formasaun ospitalidade, Uniaun Kréditu no Kooperativa sira, sentru formasaun sira Governu nian, no ONG lokál sira.

Iha serimónia juramentu ne’e, voluntáriu sira kompromete atu tane-aas valór no prinsípiu sira Korpu bá Pás nian no halo servisu hodi hadi’ak povu Timor-Leste nia moris.

Hafoin serimónia ne’e, voluntáriu sira sei destaka kedan ba sira-nia fatin, iha ne’ebé sira sei hela hamutuk ho família akolledór sira.

Korpu bá Pás Timor-Leste iha istória naruk kona-bá parseria susesu ho komunidade Timoroan sira. Hahú hosi tinan 2002, voluntáriu liu na’in-200 mak hala’o ona servisu iha Timor-Leste, serbisu iha projetu hirak-ne’ebé fó impaktu ba moris hosi ema sira ne’ebé sira serbí tiha ona.

Aleinde grupu foun ida-ne’e, Korpu bá Pás kontinua nafatin ninia kompromisu hodi apoia povu Timor-Leste no hametin ligasaun entre povu Amerikanu no povu Timor-Leste.

Jornalista Estajiária: Zita Menezes