Hatutan.com, (19 Dezembru 2023), Díli— Iha 11 dezembru 2023, kliente sira ne’ebé durante ne’e utiliza internet hodi hala’o servisu, halo peskiza no estuda, halerik tanba hosi loron bá loron kapasidade internet aat liu ka lentu liu, prezudika tebes servisu, nune’e husu bá Parlamentu Nasionál (PN) atu halo fiskalizasaun bá operadór Telekomunikasaun tolu iha Timor-Leste (TL) hodi haree direta implementasaun akordu ne’ebé halo ho Governu liuliu investimentu bá komunikasaun nian.

Edifísiu Autoridade Nasionál Komunikasaun (ANC sigla portugés) iha Caicoli Díli. Foto: Tomé da Silva.

Bainhira Jornalista Hatutan.com halo konfirmasaun ho Parlamentu Nasionál (PN), parte reprezentante povu husu hikas bá parte Autoridade Nasionál Komunikasaun (ANC sígla portugés) hanesan órgaun reguladór bá operadór telekomunikasaun sira atu halo kontrolu másimu no tenke klarifika bá kliente sira liuliu povu Timor Leste.

Lee Mós: Kliente Halerik ho Problema Internet, PN Husu Responsabilidade TT-Telemor-Telkomcel

Kona-bá ne’e, Jornalista Hatutan.com halo esforsu oioin hodi halo konfirmasaun ho Prezidente ANC João Olivio Freitas no tenta dala barak atu halo entrevista hodi halo klarifikasaun ruma iha ninia servisu fatin maibé laiha tempu atu ko’alia bá média ho razaun servisu barak liu.

Iha loron 11 dezembru jornalista Hatutan.com to’o duni iha edifísiu Ministériu Transporte no Komunikasaun Caicoli Díli, konfirma ho funsionáriu (resepsionista) Autoridade Nasionál Komunikasaun (ANC) maibé informa katak, bainhira atu mai halo entrevista ho Prezidente ANC tenke haruka uluk karta ne’ebé tenke anexa kedan ho assuntu atu bele haree Prezidente nia tempu hodi halo entrevista.

“Lori karta mai, karik Prezidente iha tempu mak ami telefone ita mai entrevista. Nia kritéria ne’e hanesan ne’e,” resepsionista ne’e hateten bá Jornalista Hatutan.com.

Iha fali loron 14 dezembru jornalista Hatutan.com tenta nafatin iha fatin hanesan atu halo entrevista maibé Prezidente ANC tempu laiha nafatin no haruka Jornalista prienxe duni karta audieésia ida atu hein funsionáriu sira kontaktu.

Kontinua iha loron 15 dezembru resepsionista ANC rasik telefone diretamente bá jornalista Hatutan.com atu enrevista iha loron Segunda 18 dezembru no iha loron nee Jornalista hakat duni bá to’o edifísiu Ministeriu Transporte no Komunikasaun.

Bainhira to’o iha fatin, resepsionista sira hateten fali bá jornalista Hatutan.com katak, Prezidente ANC okupadu ho servisu.

“Maun agora labele halo entrevista tanba Prezidente ANC enkontru hela,” resepsionista hateten bá Jornalista Hatutan.com.

Lee Mós: Problema Internet, ANC Mak Tenke Kontrola TT-Telemor-Telkomcel

Jornalista Estajiáriu: Lazaro Pereira Quefi