Hatutan.com, (20 Dezembru 2023), Díli- Ministériu Juventude, Desportu Arte no Kultura (MJDAK) rejista sentru treinamentu arte-marsiál rihun 300 husi Organizasaun Arte Marsiais Ikatan Keluarga Silat-Putera Timor-Leste (IKS-PTL), Kmanek Oan Rai Klaran (KORK) ho Persaudaraan Setia Hati Terate (PSHT).

Lee Mós: Profesór Japonés Na’in-Hitu Sei Hanorin Voluntáriu  Prátika Arte-Marsiál Iha TL

Atrasaun husi PSHT iha eventu lansamentu ofisiál atividade GAM iha Jinaziu Dili, 26 Maiu 2022. Foto/Dok.Hatutan.com

Durante fiskalizasaun no rejistrasaun bá sentru treinamentu (Ranting) sira ne’ebé halo husi Komisaun Reguladór Arte-Marsiál (KRAM) bá iha OAM sira-ne’e sei hetan kontrolu másimu husi Governu liuhosi KRAM.

Ministru Juventude Desportu Arte no Kultura, Nelio Isaac Sarmento hateten bá arte-marsiál no arte-rituál sira ne’ebé iha ne’e laiha buat foun ne’ebé atu ko’alia tanba iha hela tempu suspensaun nia laran no sei iha hela fiskalizasaun hosi KRAM no rezultadu sei mai iha fulan-Fevereiru 2024, atu nune’e, bele hatene difikuldade no problema sira ne’ebé hasoru iha kraik.

Nia hatutan, arte-rituál ne’e fiar ida ne’ebé ema ida-idak iha, desde tempu rezisténsia, no ba grupu arte-marsiál tanba agora la’o iha prosesu fiskalizasaun no besik atu remata ona tamba ne’e presija hein ituan no KRAM identifika ona sentru treinamentu sira hotu iha balun subar maibé identifikadu hotu ona nune’e rejista ona atu ba oin bele kontrola diak liután.

“Iha sentru formasaun husi arte-marsiál PSHT, IKS-PTL no KORK besik rihun 300. Sentru formasaun sira ne’e balun ofisiál katak loke duni iha fatin públiku atu ema haree, no balun subar de’it no ida ne’ebé subar ne’e mak Governu ba halo fiskalizasaun atu buka hatene sira nia intensaun ne’e saida,” Ministru Nelio Isaac Sarmento hateten durante diálogu ho representante OAM no OAR iha Palásiu Prezidensiál Nicolau Lobato, Kuarta (20/12/2023).

Governu liuhosi KRAM la’o hela hodi fiskaliza no halo rejistu ida kompletu bá iha organizasaun OAM no OAR sira hotu, liu atu hatene di’ak liután organizasaun sira nia preparasaun no estrutura sira iha kada sentru treinamentu no treinadór sira nia kualifikasaun oinsa.

Governante ne’e espera katak hafoin rezultadu fiskalizasaun ne’ebé sei mai, liu-liu ba organizasaun arte-marsiál hanesan PSHT, KORK, no IKS-PTL sei tur hamutuk fila fali atu haree ba rezultadu ne’ebé iha.

Representante PSHT, Vicente Teotonio Lopes hateten OAM nia preokupasaun ne’ebé agora daudaun suspende atividade arte-marsiál no arte-rituál tanba buat sira ne’e mak sai hanesan supreza ba OAM ho AOR tanba hetan hela apoiu husi governu liu husi MJDAK atu halo kompetisaun nu’udar preparasaun FESTIL atu bele ba tuir kompetisaun iha li’ur.

Prezidente IKS-PTL, Silvetre Xavier Sufa hateten IKS-PTL estruturadu hahú husi nasionál to’o baze no iha Timor-Leste rasik IKS hahú moris iha 1996.

Nia afirma IKS-PTL sempre tuir regra estadu desde inisiu kedas to’o agora bainhira KRAM fó rekezitu lubun bo’ot ida liu husi primeiru no segundu diritiva nasionál atu reativa arte marsiais IKS-PTL, ita tuir kedas rekezitu sira ne’e.

“IKS mós halo formasaun bá membru sira tuir métodu ne’ebé iha no treinamentu bá treinadór sira ne’e la’o iha fatin-fatin iha territóriu nasionál,” Silvetre Xavier Sufa informa.

Nia sublina matéria ne’ebé fó bá treinadór sira inklui kona-bá patriotizmu, nasionalizmu, valores kulturál, étika morál no espirituál.

Jornalista: Vito Salvadór