Hatutan.com, (21 Dezembru 2023), Díli-Iha tinan 2021, Governu hasai Dekretu-Lei númeru 21/2021 hodi determina subsídiu transporte mensál nian bá funsionáriu públiku hotu tuir ida-idak nia grau. Ho nune’e, patrimóniu Estadu ka veíkulu nian, hanesan karreta ho motór labele ona lori bá estasiona iha uma privadu, maibé tenke estasiona iha repartisaun Estadu nian.
Lee Mós: Funsionáriu Públiku Uza Nafatin Karreta Estadu ba Uma Sei Kondena ho Lei MPCC
![](https://www.hatutan.com/wp-content/uploads/2022/05/Karreta-Estadu-2-300x195.jpeg)
Karreta Estadu ne’ebé DGGPE rekolla husi ministeriu sira no estasiona iha Edifisiu DGGPE, Balide, Díli. Foto/Dok.Hatutan.com
Realidade, to’o oras ne’e, kargu xefia balun, inklui funsionáriu baibain balun, kontinua lori karreta ho motór Estadu nian bá uma to’o balun utiliza lori bá munisípiu hodi pasa ferias.
Relasiona ho aktu irregularidade no dezobediénsia bá orientasaun ne’ebé prevee iha dekretu Lei númeru 21/2021 konjuga ho rezolusaun Governu númeru 130/2021, parte kompetente sira, liuliu Polísia Nasionál Timor-Leste (PNTL), liuhosi Departamentu Tránzitu Nasionál to’o komandu munisípiu sira sei halo fali operasaun hodi tau-matan bá sirkulasaun veíkulu Estadu nian durante loron boot Natal 2023 no tinan foun 2024.
Komandante Tránzitu Nasionál, Superintendente Asistente Luis Costa, informa katak, sira iha sirkulár númeru 2 no númeru 3, no despaixu konjunta 80/2022, ne’ebé servisu hamutuk entre liña ministériu neen (6) hodi atribui kompeténsia sira atu halo kontrolu bá veíkulu Estadu nian.
“Durante ne’e, ita la’o, no hosi parte tránzitu ne’e, ita halo operasaun, ita konsege prende karreta Estadu no mós funsionáriu sira ne’e. Agora, sira ne’ebé mak nia prosesu kontinuasaun bá iha funsaun públika no mós Komisaun Anti Korrupsaun,” Superintendente Asistente Polísia Luis Costa, informa hodi responde jornalista sira iha nia servisu fatin, Díli, Kinta (21/12/2023).
Daudaun ne’e autoridade sira prosesa ona kazu 11 bá iha Komisaun Anti Korrupsaun (CAC) relasiona ho violasaun bá utilizasaun veíkulu Estadu nian iha loron feriadu no sábadu ho domingu, inklui sira ne’ebé lori veíkulu Estadu nian bá estasiona iha sira-nia uma privadu.
Komandante Luis Costa, esplika katak, hosi sirkulár ne’e ema hothotu mós hatene katak, uzu bá karreta Estadu ne’e, iha buat rua; Ida, bá iha fins operasionál nian, no ida seluk, bá fins pesoal nian. Tanba ne’e, veíkulu estadu sira ne’e ninian dezlokasaun bá iha ne’ebé de’it, durante oras servisu no mós fora hosi oras servisu, ka fin semana, Polísia Tránzitu sei haree iha buat rua-ne’e.
“Sé iha fins de operasionál, sira iha karrta autorizasaun iha ka lae. Sé ida ne’e mak laiha, ita prende. Tanba ne’e maka ita firme nafatin, ita aviza bá iha servidór Estadu, hahú hosi diretór sira, diretór jerál, xefe departamentu sira atu uza veíkulu Estadu nian tuir nia regra,” nia afirma.
Komandante Polísia Tránzitu Nasionál ne’e husu nafatin bá iha funsionáriu hothotu iha órgaun Estadu nian, liu-liu diretór sira, bainhira utiliza transporte Estadu nian tenke ho kuidadu. Labele dehan sai diretór ona, sira bele lori karreta bá uma.
Jornalista: Rogério Pereira Cárceres