Hatutan.com, (21 Dezembru 2023), Díli—Ministériu Transportes no Komunikasaun (MTK) liuhosi Diresaun Nasionál bá Transportes Terrestres (DNTT), hamutuk ho Polísia Nasionál Timor-Leste (PNTL), Departamentu Tránzitu Nasionál, alerta bá motorista sira atu kumpri Lei Kódigu Estrada númeru 06/2023, tula pasajeiru másimu ema na’in-24 de’it, durante selebra loron boot Natál 2023 no tinan foun 2024.

Diresaun Nasionál bá Transportes Terrestres (DNTT), hamutuk ho Polísia Nasionál Timor-Leste (PNTL), Departamentu Tránzitu Nasionál, alerta bá motorista sira liu hosi konferensia imprensa atu kumpri Lei Kódigu Estrada númeru 06/2023, tula pasajeiru másimu ema na’in-24 de’it, durante selebra loron boot Natál 2023 no tinan foun 2024. Foto: Elio dos Santos da Costa.

Diretór interinu DNTT, Nelson Sequeira Martins alerta mós katak, molok atu halo viájen, tenke haree didi’ak dokumentu sira mak hanesan, liverete, folla inspesaun nian no mós lisensa tarjetu.

Lee Mós: Mikrolete Greve, DNTT Mantein Tarifa $0.15-$0.25

Dokumentu hirak ne’e, motorista sira tenke prepara hotu, inklui karta kondusaun atu nune’e, bainhira halo viájen hosi kapitál Dili bá munisipiu, bele la’o ho seguru no labele difikulta, bainhira autoridade seguransa liu-liu polisia tránzitu, halo pasa revista iha estrada públiku.

“Hakarak fó hatene mós bá motorista sira katak, ita-boot sira tenke kumpri regras ne’ebé mak estabelese ona iha ita-boot sira nian lisensa tarjetu, hanesan Bus, ita-boot sira bele tula de’it 24 pesoas, labele liu hosi ne’e,” Nelson Sequeira Martins informa liuhosi konferénsia imprénsa iha kna’ar fatin Balide-Dili, Kinta (21/12/2023).

Bá Mikrolete sira, tula de’it pasajeiru ema na’in-12, bá angguna sira ne’ebé ki’ik ho pasajeiru 12, bá sira ne’ebé mak boot, tula pasajeiru to’o de’it ema 24. Ida ne’e, tuir númeru ne’ebé mak Diresaun Nasionál Transportes Terrestres estabelese ona iha motorista sira ninia lisensa tarjetu.

Labele Hasa’e Tarifa

Diretór interinu DNTT, Nelson Sequeira Martins. Foto: Elio dos Santos da Costa.

Diretór interinu DNTT ne’e mós kontinua fó hanoin bá motorista sira atu labele hasa’e fali folin ka présu tarifa nian bá pasajeiru sira.

Motorista sira tenke obedese nafatin bá sirkulár ne’ebé molok ne’e VIII Governu liuhosi eis ministru Transportes no Komunikasaun (MTK), José Agostinho da Silva, hasai ona kona-bá tarifa iha ne’ebá ne’e define tiha ona to’o agora, seidauk iha mudansa.

“Bá maluk kondutór sira, ami husu labele hasa’e tarifa tuir ita-boot sira nia hakarak. Bá maluk pasajeiru sira, bainhira kondutór sira mak hasa’e tarifa, la tuir regras ne’ebé mak iha, ita-boot sira bele halo keixa mai DNTT, ka bá polisia tránzitu ne’ebé mak besik iha área ne’ebé mak ita-boot sira dezloka bá atu nune’e ita hola medidas, tuir regras ne’ebé mak iha. Tanba ne’e, husu bá maluk sira, kumpri nafatin regras ne’ebé iha,” tenik nia.

Hatán kona-bá sosializasaun Lei Kódigu estrada nian bá motorista sira, diretór interinu DNTT ne’e informa, durante ne’e atividade sosializasaun, sira halo hela no remata iha semana kotuk. Sosializasaun ida ne’e sei halo fila-fali iha tinan oin 2024, atu nune’e fó koñesimentu lei bá motorista sira, hodi la’o tuir.

Dadaun ne’e, DNTT mós servisu hamutuk hela ho Ministériu Saúde (MS), hodi realiza sosializasaun bá populasaun tomak iha munisipiu no postu administrativu sira hotu, tanba dadus MS nian hatudu katak, númeru mortalidade kada tinan aumenta.

Tránzitu Nasionál

, Komandante Tránzitu Nasionál, Superintendente Asistente Luis Costa. Foto: Elio dos Santos da Costa.

Iha biban hanesan, Komandante Tránzitu Nasionál, Superintendente Asistente Luis Costa, hatutan, Komandu PNTL liuhosi Departamentu Nasionál ho ninia Sesaun Tránzitu nian sira iha munisipiu, sei halo kontrolu másimu iha selebrasaun loron ida ne’e, no baihira identifika, sei laiha toleránsia.

Xefe Departamentu Tránzitu Nasionál ne’e dehan, PNTL firme nafatin no sei informa bá iha seksaun tranzitu iha munisipiu 14, atu bele observa, atu halo kontrolu bá movimentasaun transporte públiku iha territóriu timor laran tomak.

Iha Lei Kódigu Estrada númeru 06/2023, Artigu 54, koalia momós kona-bá kondutór sira ne’ebé mak tula pasajeiru liu dotasaun ne’e, sira tenke selu multa ho montante totál osan hosi $11 to’o iha $15.

Transporte Públiku Hadau-Malu Pasajeiru Iha Becora

Bus ne’ebé halo operasaun bá munisipiu Baucau, Viqueque no Lospalos. Foto: Tomé da Silva.

Transporte públiku ne’ebé halai bá mai munisipiu  Lautém, Viqueque, Baucau no Manatuto menus pasajeiru nune’e, tenki hadau-malu iha estasionamentu Becora.

Motorista diresaun Baucau, Jekijanto Soares hateten iha loron bain-leet ne’e pasajeiru susar no kada loron hetan $100-resin de’it maski mina folin Karun no pasajeiru balun selu la loos, nune’e ba transporte publiku susar nafatin.

“Ita besik tama ona ba loron boot Natal nian pasajeiru laiha tanba ne’e ami halai ema nakonu de’it kadeira sira no dalaruma kadeira balun mós mamuk. Baibain hosi Dili bá Baucau ema ida selu $5 maibé balun selu la to’o fó de’it $4 mós ami simu,” Jekijanto Soares hateten bá Hatutan.com iha Becora, Kinta (21/12/2023).

Bus ne’ebé halo operasaun bá munisipiu Baucau, Viqueque no Lospalos. Foto: Tomé da Silva.

Iha fatin hanesan pasajeiru Duarte Fernandez da Costa hateten, agora daudaun pasajeiru ladun preokupa hodi ha’au malu tanba karreta agora barak liu.

“Ha’u haree atu tama ba  loron Natal ida-ne’e la hanesan ho loron finadu nian. Tanba ha’u kompara tempu agora ne’e loron boot finadu mak ema barak bá foho, maibé hanesan Paskua ho Natál ne’e ema ladun movimentu ba foho,” Duarte Fernandez da Costa hateten iha estasionamentu Becora.

Tuir observasaun Hatutan.com iha estasionamentu Becora, bus hosi Lautém, Viqueque, Baucau no Manatuto barak mak para no hadau malu loos pasajeiru ne’ebé uza transporte públiku ba munisípiu.

Jornalista: Rogério/Estajiáriu Quefi