Hatutan.com, (27 Dezembru 2023), Díli—Polísia Nasionál Timor-Leste (PNL) liuhosi Portavós komandu jerál, Superintendente Polísia João Belo dos Reis, alerta no fó hanoin bá komunidade katak, iha selebrasaun festa tinan foun 2024, bele sunu de’it fugetes iha kalan 31 dezembru 2023 no iha 01 janeiru 2024,  tanba ne’e hahú halo operasaun tama-sai bairru hodi buka-tuir sira ne’ebé sunu arbiru.

Ekipa Konjunta kompostu hosi Ekipa Investigasaun Móvel, Servisu Informasaun Polísia (SIP), Servisu Nasionál Intelijénsia (SNI) datein ona joven na’in-rua ne’ebé uza farda Arte Marsiál no tenta asalta membru Polísia Nasionál Timor-Leste (PNTL) na’in-ida iha área Taibesi Monumentu Chalma, Suku Lahane Orientál, Postu Administrativu Na’in-Feto, Segunda (28/11/2022) tuku 21:00 otl. Foto/PNTL.

Komandu PNTL alerta ida-ne’e tanba iha selebrasaun festa Santu Natál nian foin lalais 24 to’o 25 dezembru, komunidade sunu fugetes arbiru de’it hodi prezudika tebes ema seluk ninia psikolojia, liu-liu hirak ne’ebé oan sei nurak, inan isin-rua sira, no sira ne’ebé moras hela iha uma.

Lee Mós: PNTL Sei Halo Operasaun bá Loja Fa’an Fugetes Ilegál

“Alin sira, joven sira ne’ebé mak sunu fugetes, polisia sei halo operasaun bá sira, nune’e, aviza bá sira ne’ebé mak fa’an na’in, no sira ne’ebé mak uza, atu uza de’it iha 31 kalan no dia 01 janeiru,” Portavós João Belo dos Reis, informa liu hosi konferénsia imprénsa, Kuarta (27/12/2023).

PNTL alerta atu labele sunu arbiru, tanba iha ona vítima balun, iha mós keixa hosi komunidade ne’ebé mak hateten katak, sira la seguru, sira sente la hakmatek ho fugetes ne’ebé mak loron kalan tarutu iha bairru laran.

Komandu PNTL orienta ona komandante munisipiu sira atu orienta membru sira hodi halo operasaun tama no sai bairru, hodi kontrola joven sira ne’ebé sunu fugetes la tuir regra ka loron ne’ebé Polisia fiksa ona, maka sei halo atuasaun ho rigór.

“Bá oin mak ema ruma sunu, polísia hetan karik, sei halo atuasaun. Bá sira ne’ebé mak fa’an, mós polisia prende,” João Belo hateten.

Jornalista: Rogério Pereira Cárceres