Hatutan.com, (31 Dezembru 2023), Díli—Klube Futeból AD SLB Laulara rekolla vitória dahuluk iha jogu Taxa Timor Cup 2023 hafoin halakon nia adversáriu ADT United Kingdom (UK) ho skore 5-0.

Klube Futeból AD SLB Laulara rekolla vitória dahuluk iha jogu Taxa Timor Cup 2023 hafoin halakon nia adversáriu ADT United Kingdom (UK) ho skore 5-0, iha sidade Melbourne-Austrália, Sábadu (30/12/2023). Foto: AD SLB Laulara.

Klube Futeból AD SLB Laulara ne’ebé refeorsa hosi maioria Jogadór selesaun nasionál Timor-Leste hatudu performa ida di’ak iha primeiru jogu bá Taxa Timor Cup 2023 ne’ebé hala’o iha kampu futeból Melbourne Austrália.

Lee Mós: Klubu Futeból AD SLB Laulara Partisipa Jogu Timor Cup 2023 iha Austrália

Ekipa AD SLB Laulara domina kedan bola iha minutu dahuluk jogu hahú, ho jogu ne’ebé lais no tátika bola hosi ain ba ain halo AD SLB Laulara sai favoritu iha jogu kontra adversáriu ADT UK no rezultadu lori duni ekipa estimadu komunidade Laulara ne’e bá ukun iha tabela skore ninian.

Iha jogu primeira parte, ekipa AD SLB Laulara domina kedan bola ho di’ak no halo kedan atake liu hosi bola ne’ebé iha no Jogador Canavaro konsege hatama golu dahuluk hodi muda skore iha tabela no AD SLB Laulara ukun provizóriu ho skore 1-0.

Jogu kontinua la’o ho intensidade jogu ne’ebé ekipa rua iha no ekipa ADT United Kingdom tenta atu halo balansu ba jogu hodi muda skore maibé la konsege no ikus mai AD SLB Laulara liu hosi jogadór Nono Corsino marka tán golu ida hodi muda skore bá 2-0.

Ekipa rua mantein jogu ho tátika ne’ebé iha no to’o primeira parte termina AD SLB Laulara kontinua ukun provizóriu ho skore 2-0.

Tama bá segunda parte, ekipa AD SLB Laulara  kontinua domina jogu iha kampu,  nune’e, Jogadór Nono Corsino marka segundu golu bá nia ekipa AD SLB Laulara hodi muda skore bá 3-0.

Ekipa ADT UK halo esforsu atu responde golu ne’ebé iha maibé Jogadór AD SLB Laulara kontinua disiplina no halo jogu ida defensivu ho kontra atake lais no ikus mai Jogadór Ameta marka tán golu ida ba nia ekipa AD SLB Laulara hodi muda skore bá 4-0.

Molok jogu termina, jogadór avansadu AD SLB Laulara Nono Corsino marka tán golu datoluk bá nia ekipa hodi muda skore bá 5-0 no ekipa AD SLB Laulara rekolla pontu tolu dahuluk enkuantu ekipa ADT UK tenke fila ho liman mamuk.

Hafoin jogu, Kapitaun Klube Futeból AD SLB Laulara, Filomeno Junior da Costa hateten, fiar metin ninia ekipa sei jogu ho di’ak nafatin hodi reprezenta Timor-Leste iha jogu semi finais to’o finais bá taxa jogu Timor CUP 2023.

Kapitaun ekipa ne’e konsidera maski AD SLB Laulara ne’ebé reprezenta Timor-Leste foin primeiraves partisipa iha jogu Timor CUP iha Melbourne, maibé fiar metin ba tátika ne’ebé  iha, sei konkista vitória  iha jogu sira bainhira hasoru klube Timor oan sira hosi nasaun Austrália, Inglatera no Nova Zelândia.

“Agora ami kontinua treinu makas, maski jogu Timor Cup ne’e foin primeira vez mak AD SLB Laulara partisipa no reprezenta Timor-Leste. Ami optimista ho ekipa tomak sei halo esforsu makas, jogu ho di’ak atu lori ekipa sai kampiaun,” Hatutan.com sita deklarasaun Filomeno Junior da Costa iha komuniakdu, Sábadu (30/12/2023).

Tuir oráriu ba jogu Timor Cup 2023, iha loron 05 janeiru 2024, ekipa AD SBL Laulara  sei hala’o nia jogu daruak hasoru klube Galaxy United no iha loron 07 janeiru 2024 kontinua hasoru tan  Klube Craigieburn Pythons no ekipa hirak ne’e mai hosi Klube Timor oan sira iha Austrália.

Durante jogu, komunidade Timoroan sira iha Austrália kontinua fó suporta másimu bá ekipa AD SLB Laulara no mós ekipa hotu ne’ebé partisipa iha jogu Timor Cup 2023 ne’ebé hala’o iha sidade Melbourne-Austrália.

Jornalista: Vito Salvadór