Hatutan.com, (06 Janeiru 2024), Díli- Klube Futeból Timor-Leste AD SLB Laulara derrota hasoru nia adversáriu Timor-Leste Galaxy United ho eskore 3-2 iha jogu kontinuasaun Timor Cup 2023 ne’ebé hala’o iha Melbourne-Austrália.

Lee Mós: AD SLB Laulara Manán ADT UK 5-0 iha Jogu Timor Cup 2023

Ekipa AD SLB Laura. Foto/Espesiál

Sita hosi komunikadu ne’ebé Hatuta.com asesu husi Klube Futeból AD SLB Laulara, Sábadu  (06/01/2024), katak klube estimadu komunidade Laulara, Munisípiu Aileu ne’e tenke rende bá sira-nia adversáriu ho eskore ikus 3-2 no ho fuan boot fila ho liman mamuk iha jogu daruak Timor Cup 2023.

Uainhira jogu hahú, ekipa AD SLB Laulara no ekipa adversáriu Timor-Leste Galaxy United idak-idak tun ho nia ritmu jogu ne’ebé iha. AD SLB Laulara ne’ebé domina liu jogu iha minutu dahuluk halo jogu ida atrativu no domina bola hosi ain áa ain ho pasajen ne’ebé iha ikus mai Jogadór AD SLB Laulara Memet marka uluk golu ida bá adversáriu Timor-Leste Galaxy United hodi muda skor provizóriu bá 1-0.

Ho golu ne’ebé ekipa AD SLB Laulara marka halo adversáriu mós badinas no muda táktika jogu hodi buka halo balansu no ikus mais konsege halo empata bá jogu ho eskore provizóriu 1-1.

Ekipa rua mantein ho ritmu jogu ne’ebé iha too primeira parte termina laiha ekipa ida mak aumenta tan golu ho nune’e ekipa rua ba deskansa primeira parte ho pontu hanesan.

Tama bá segundu etapa, klube rua kontinua hatudu idak-idak ninia ritmu jogu ho táktika ne’ebé iha. Ho esforsu ne’ebé iha klube AD SLB Laulara aumenta tan golu ida liu husi jogadór estimadu AD SLB Laulara Kay Olok Gusmão  hodi lori ekipa muda eskore iha tabela no ukun provizóriu ho eskore 2-1.

Hafoin golu ida-ne’e, ekipa AD SLB Laulara ho fiar aan katak, sira sei rekolla vitória, maibé ekipa adversáriu Timor-Leste Galaxy United halo esforsu atake maka’as no domina bola iha kampu laran ho di’ak konsege hatama golu ida hodi lori ekipa rua empata ho eskore balansu 2-2.

Jogu kontínua la’o ho intensidade as no ekipa rua hatudu jogu ida atrativu halo ema rihun ne’ebé asiste jogu, inklui Vise-Primeiru-Ministru no Ministru Koordenadór ba Asuntu Ekonomiku, Ministru Turizmu no Ambiente, Fransisco Kalbuadi Lay no Patrosinadór AD SLB Laulara, Aero Díli, Lourenço de Oliveira ho espresaun kontente fó suporta bá ekipa AD SLB Laulara ne’ebé hatudu performa dixiplina tebes.

Tama ba minutu ikus Jogadór Timor-Leste Galaxy United Melbourn ne’ebé halo jogu ida agresivu no lais konsege hatama golu hodi muda eskore ba 3-2. To’o jogu termina ekipa Timor-Leste Galax United nafatin lidera, no AD SLB Laulara obrigadu tenke simu derrota.

Mesmu derrota, Treinadór AD SLB Laulara, Rafael konsidera katak nia ekipa AD SLB Lauara sei iha nafatin oportunidade atu hakat ba semi final no final hodi reprezenta Timor-Leste iha jogu Timor Cup 2023.

“Jogu ida ne’e la’o ho di’ak, iha primeira parte ita domina jogu liu husi bola ne’ebé iha. Timor-Leste Galaxy United iha jogador Akademia ida ka rua ne’ebé  halo ita nia jogadór AD SLB Laulara lakon iha fíziku, maibé durante jogu buat hotu di’ak no ekipa rua disiplina no ita lakon iha minutu ikus, no ida ne’e la tau iha kestaun, tamba ita iha nafatin esperansa ba jogu tuir mai no ita fiar an sei manan Klube sira seluk,” Rafael hateten.

Ekipa Klube Futeból AD SLB Laulara Rafael konvoka kedas reuniaun ho ekipa jogadór sira hodi trasa táktika jogu ne’ebé di’ak hodi prepara aan hasoru Klube Craigieburn Pythons  iha loron 07 fulan-Janeiru 2024 ne’ebé sei hala’o iha kampu futeból Melbourne Austrália.

Jogu Timor Cup ne’e asiste másimu hosi komunidade Timoroan sira iha Austrália inklui mós komunidade rai seluk ho klube lubuk ida ne’ebé partisipa taxa Timor CUP 2023.

Jornalista: Vito Salvadór