Hatutan.com, (29 Novembru 2023), Díli—Prezidente Repúblika (PR), José Ramos-Horta husu ba asosiasaun Permayouth Timor-Leste atu kontinua servisu no fó kontribuisaun makas bá konservasaun bee no restaura ambiente atu komunidade sai reziliente liu-tán hasoru problema mudansa klimátika iha país ne’e.
Prezidente Repúblika (PR), José Ramos-Horta, partisipa iha serimónia abertura bá Semináriu no primeiru kongresu Nasionál Asosiasaun Permayouth Timor-Leste ne’ebé hala’o ho tema “Hamutuk ita kuda bee, Restaura Ambiente, Reforsa Produsaun Ai-han no halo komunidade sai reziliente liu-tan hasoru problema mudansa klimátika”, iha salaun Laline Larigutu CNE Caikoli, Kuarta (29/11/2023). Foto: PR.
Xefe Estadu hato’o deklarasaun ne’e bainhira partisipa iha serimónia abertura ba Semináriu no primeiru kongresu Nasionál Asosiasaun Permayouth Timor-Leste ne’ebé hala’o ho tema “Hamutuk ita kuda bee, Restaura Ambiente, Reforsa Produsaun Ai-han no halo komunidade sai reziliente liu-tan hasoru problema mudansa klimátika”.
Lee Mós: Xefe Estadu Sei Husu Governu Foun Apoia PERMATIL Konserva Bee Iha Teritóriu Nasionál
Prezidente Repúblika José Ramos-Horta kontente tebe-tebes no fó apoiu makas bá organizasaun Permayouth Timor-Leste ne’ebé halo servisu di’ak, klean no kualidade para rekopera bee matan sira iha Timor-Leste.
Xefe Estadu konsidera Foin-sa’e sira, inan aman no komunidade sira tenke konserva bee matan sira, kuidadu ambiente, labele tesi ai arbiru no sunu rai bebeik atu nune’e mota, bee matan no lagoa sira labele maran iha loron ruma.
“Bainhira ita la konserva bee matan sira loron ruma ema sei oho malu tamba bee, no bee kestaun ida seguransa nasionál, entaun ita buka labele estraga bee moos. Ha’u hare dala ruma populasaun rasik husik bee sulin estraga deit, halo aat torneira ne’ebé governu ka doador sira tau, ne’e kontribui ba problema iha sosiedade tamba bee moos fahe la hanesan no balun sai vítima tamba lahetan bee moos,” Ramos-Horta hateten iha salaun Laline Larigutu CNE Caikoli, Kuarta (29/11/2023).
Ramos-Horta husu atu Permayouth Timor-Leste nafatin organiza didi’ak foin-sa’e sira para kuda ai, tau matan ba bee matan sira, kuidadu ambiente no konserva bee atu iha tinan lima oin mai bele restaura hikas bee matan sira iha Timor-Leste.
Xefe Estadu mós promete ba asosiasaun Permayouth Timor-Leste atu mobiliza finansiamentu internasionál hodi apoiu atividade sira, importante katak asosiasaun Permayouth Timor-Leste tenke iha Planu, konseitu no programa ne’ebé feitu atu garante sustentabilidade fundus ne’ebé sei oferese.
Iha fatin hanesan Fundadór Asosiasaun Permayouth Timor-Leste, Ego Lemos hateten, Permayouth Timor-Leste hanesan asosiasaun ida ne’ebé fo espasu ba foin-sa’e sira, liu-liu juventude permakultura atu lidera no iha espasu ida atu foin-sa’e sira bele aprende oinsa sai lideransa, no mobiliza foin-sa’e permakultura sira seluk ativu iha atividade konservasaun bee no kuidadu ambiental iha Timor-Leste.
“Asosiasaun Permayouth Timor-Leste sei fortifika nia atividade sira atu joven sira bele halo asaun barak iha terenu hodi salva guarda bee matan sira atu bele kria fornesimentu bee moos ne’ebé diak, no kuidadu ambiente no salva animal fuik sira atu komunidade ne’e reziliente liu-tan hasoru problema mudansa klimátika ne’ebé maka afeita ba mundu no Timor-Leste ohin loron,” Ego Lemos hateten.
Fundadór ne’e informa, Asosiasaun Permayouth Timor-Leste iha membru ativu hamutuk Rihun lima liu iha teritóriu nasionál no husi númeru ne’ebé iha pursentu hatnulu ne’e Feto no sira ativu iha kampu liu-liu ba atividade sira liga ho konservasaun bee no reziliensia ba meiu ambiente.
Jornalista: Vito Salvadór