Hatutan.com, (04 Janeiru 2024), Díli—Tribunál Judisiál Primeira Instánsia Díli (TJPID), iha Kinta 04 Janeiru 2024 konklui ona prossesu julgamentu bá kazu eis Ministra Negósiu Estranjeiru no Kooperasaun (MNEK), Adaljiza Albertina dos Reis Xavier Magno, duun eis konsuladu jerál Timor-Leste (TL) nian iha Sidney-Austrália, Luciano Valentim da Conceição “Timor Maubere” troka fali númeru konta bankária Estadu RDTL nian.

Eis Konsul Jerál Timor-Leste bá  Estadu Nova Gales do Súl, Sidney-Australia, Luciano Valentim da Conceição “Timor Maubere” ho Defensór Publiku, Sergio Quintas, hatama keixa ba TDD kontra MNEK Adaljiza Magno, Tersa (04/10/2022). Foto/Dok. Hatutan.com.

Defensória Públika liuhosi Defensór Sérgio Paulo Dias Quintas informa, julgamentu ohin, atu rona testamuña ne’ebé arroladu hosi reo no julgamentu bá kazu ne’e termina ona ho alegasaun ne’ebé parte autór ho reo hato’o ona.

Lee Mós: TJPID Kontínua Rona Sasin bá Kazu Luciano Timor Maubere vs Adaljiza Magno

Maibé nia hatutan, finalidade hosi julgamentu ne’e autór ezíje kona-bá indeminizasaun hosi Estadu RDTL liuhosi MNEK, atu selu bá danos materiais ka naun-materiais ho montante osan $12.600.

“Indeminizasaun ne’ebé ami husu bá Estadu ne’e ho valór $12.600. Ita espera katak Tribunál bele haree  petisaun ne’ebé autór hatama liuhosi produsaun de prova, tantu hosi prova testamuñal no provas dokumentál, Tribunál bele konsidera katak, petisaun ne’e presedente hodi nune’e ita husu Estadu liuhosi MNEK bele selu indeminizasaun bá autór,” Sergio Quintas hateten hafoin akompaña ninia kliente hala’o julgamentu ikus iha TJPID, Mandarin-Dili, Kinta (04/01/2024).

Sérgio Quintas salienta katak, valór osan ne’ebé sira husu Estadu atu halo indeminizasaun ne’e razoável, tanba hosi atuasaun, eis ministra Adaljiza Magno nian, iha altura ne’ebá assume kargu públiku nu’udár ministra, tanba nia deklarasaun iha média, ne’e mak hamosu buat ida prejuizu hodi halo nia kliente Luciano Timor Maubere sente moe perante komunidade iha rai-laran, nomós komunidade internasionál liu-liu iha Austrália.

Tanba kliente Luciano Timor Maubere, hanesan diplomata iha Austrália no kuandu mosu estetmentu “duun matak” nune’e sai iha públiku, ne’e hatuun nia dignidade nu’udár diplomata.

“Ida ne’e mak ita nia objetivu atu hatama asaun ne’e atu Estadu liu-liu Tribunál rekoñese katak, nia sofre hela prejuizu ruma liu-liu estraga hela nia kredibilidade, bom nome no reputasaun. Ne’ebé, ami husu valór indeminizasaun ne’e maka $12.600. Ita espera, Tribunál bele haree katak, petisaun ne’ebé ami hatama ne’e, prosedente ho provadu,” nia tenik.

Defensór Quintas dehan, valór indeminizasaun ne’ebé mak sira fiksa iha petisaun inisiál ne’e, la’ós valór ne’ebé mak Tribunál tenke bazeia bá ida-ne’e, tanba Tribunál mós tenke konsidera buat ida Prinsípiu Espozitivu.

Katak, Tribunál labele fó liu buat ne’ebé mak parte sira husu, maibé bele limite hosi petisaun inisiál ne’e no bele menus hosi $12.600, ka bele valór ne’ebé mak sira artikula iha petisaun inisiál. Bele mós valór $12.600, ka bele menus hosi ne’ebá, Tribunál mak sei haree ida ne’e.

Tanba ne’e maka, valór indeminizasaun ne’ebé sira tau iha petisaun inisiál seidauk fiksu, tanba sei hein mós desziaun Tribunál nian.

Maibé nia hatutan, parte autór sira iha dokumentu sira ne’ebé mak kompletu, liu-liu eis konsuladu iha Sidney-Austrália, Luciano Timor Maubere, iha altura ne’ebá, nia hasai nia osan rasik, depois nia empresta tán ema nia osan, tanba haree bá interese Estadu nian.

“Nia reprezenta Estadu iha rai-liur, nia lakohi Estadu nia naran ne’e fo’er iha Austrália. Entaun, de kualkér maneira, nia halo esforsu tenke hetan osan atu selu atividade operasionál diplomasia nian, no ne’e nia hasai nia osan rasik,” Quintas halo defeza.

Tanba ne’e, nia dehan, karik prossesu ne’ebé mak parte autór hatama, Tribunál konsidera katak, faktus ne’ebé artikula iha petisaun ne’e provadu no prosedente maka Estadu tenke kumpri desizaun Tribunál ne’e hodi selu indeminizasaun.

Sei Keixa tán Adaljiza Kontra Individualmente

Maski iha loron 04 fulan-Outubru 2022, Luciano Timor Maubere akompaña hosi nia defensór Sérgio Quintas hatama ona keixa kontra Estadu, maibé Luciano Timor Maubere mós hakarak atu hatama tán ninia petisaun ka keixa bá Tribunál hasoru eis MNEK Adaljiza Magno ho individualmente, tanba ninia deklarasaun sira iha média ofende tebes eis konsuladu jerál TL nian iha Sideny-Austrália.

Quintas esplika, sidadaun sé de’it iha Timor-Leste ne’e, bom-nome ka naran di’ak, reputasaun, integridade ne’e, garantidu iha konstiuisaun RDTL rasik, nomós iha kódigu sívil.

Tanba ne’e nia hatutan, kualkér sidadaun ne’ebé mak sente prezudikadu hosi ema seluk, tanba bom-nome, integridade, reputasaun, nia bele hatama assaun bá iha Tribunál, depois mak Tribunál sei haree.

“Prosesu sivil ne’ebé ami hatama ne’e la’ós kontra Estadu. La’ós bá señora Adaljiza, naquela altura nu’udár Ministra Negósiu Estranjeiru. Ne’e mak ohin ha’u dehan ami sei hatama fali prossesu foun ida, individualmente kontra señora Adaljiza, iha tempu mai,” Sérgio Quintas informa.

Jornalista: Rogério Pereira Cárceres