Hatutan.com, (04 Janeiru 2024), Díli—Prezidente Repúblika (PR), José Ramos-Horta ho Primeiru-Ministru (PM), Kay Rala Xanana Gusmão hato’o apresiasaun bá komportamentu sidadaun sira nian no mós FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) ne’ebé kontribui bá situasaun hakmatek durante periódu selebrasaun Natál to’o tinan foun nian.

Primeiru-Ministru (PM) Kay Rala Xanana Gusmão hasoru-malu ho Prezidente Repúblika, José Ramos-Horta, Kinta (30/11/2023). Foto: Elio dos Santos da Costa.

Prezidente Repúblika hato’o apresiasaun ne’e hafoin primeiru enkontru semanál ho Xefe Governu  iha 2024 nian, iha Palásiu Prezidensiál Nicolau Lobato Bairru-Pité, Kinta (04/01/2024).

Lee Mós: Membru F-FDTL 833 no PNTL 272 Ofisialmente Entrega Atributu “Jura” Husik GAM-GAR

“Ami nia observasaun liu hosi relatóriu polísia nian no autoridade sira seluk iha munisípiu, ami nia observasaun rasik mós hatudu katak buat hotu-hotu la’o di’ak tebtebes. Situasaun seguransa kapás loos, komportamentu povu nian, joven sira nian di’ak tebtebes. Ne’e duni fó parabens ba povu tomak,” Ramos-Horta hateten.

Iha fatin hanesan, Primeiru Ministru, Kay Rala Xanana Gusmão hateten, ema hotu-hotu kontente tanba hahú hosi Natál to’o fim do anu kalma tebtebes no ida-ne’e mak halo Xefe Estadu rasik temi dehan juramentu ne’ebé PNTL no F-FDTL halo ne’e influénsia tebes duni joven sira.

Alende ne’e, iha 28 Dezembru 2023 Xanana bá Karabau, lian na’in sira tuur hamutuk ho grupu arte marsiais sira iha ne’ebá halo juramentu la’o kapás.

Ne’e duni Xanana husu bo’ot atu klima ida-ne’e, klima ida armonia, klima ida pás, domin, bele la’o iha tinan 2024 tomak, atu bele preokupa ho buat ne’ebé atu halo ba rai ida-ne’e.

“Ita tenke agradese bá Xefe Estadu bá prezépiu sira iha arredór palásiu Prezidensiál nian ne’ebé hatudu ita hasa’e valores Kristaun iha ita nia moris. Tanba la’e ita haluhan tiha valór sira ne’ebé mai hosi ita nia tradisaun rasik no mós hosi relijiaun. Ida ne’e mak apresiasaun bo’ot tebtebes hosi Estadu ba joven sira nia komportamentu no husu katak tinan ida ne’e atu kontinua kria nafatin armonia entre ita iha sosiadade nia laran hodi hatutan bá Timor tomak, atu ita bele bo’ok an la’o daudaun ona bá dezenvolvimentu rai ida-ne’e nian,” Kay Rala Xanana Gusmão hateten.

Xefe Governu haktuir Iha loron 31 Dezembru, depois kalan fahe rua bá iha Portu Dili haree joven barak, feto no mane ne’ebé halo movimentasaun tama sai iha fatin ne’ebá maibé buat ida la akontese.

Prezidente Repúblika mós iha hela hanoin atu konvoka reuniaun Konsellu Superiór no Defeza hodi halo avaliasaun bá tinan ida-ne’e no haree saida mak hosi institutusaun defeza seguransa bele halo hodi proteze nafatin no fó nafatin mensajen di’ak ba joven sira.

Jornalista: Vito Salvadór