Hatutan.com, (08 Janeiru 2024), Díli—Prezidente Repúblika (PR), José Ramos-Horta semo ona bá Índia hodi partisipa Simeira Vibrant Gujarat Globál Summit 2024 iha sidade New Delhy,  ne’ebé sei ko’alia kona-bá polítiku sira-ne’ebé atu foti desizaun kona-bá investidór sira atu promove kolaborasaun hodi explora oportunidade bá investimentu, Segunda (08/01/2024).

Prezidente Repúblika (PR), José Ramos-Horta semo ona bá Índia hodi partisipa Simeira Vibrant Gujarat Globál Summit 2024 iha sidade New Delhy, ne’ebé sei ko’alia kona-bá polítiku sira-ne’ebé atu foti desizaun kona-bá investidór sira atu promove kolaborasaun hodi explora oportunidade bá investimentu, Segunda (08/01/2024). Foto: Tomé da Silva.

Sorumutu Vibrant Gujarat Global Summit 2024 bá dala sanulu-resin-ida (XI) ne’e  hatudu kompromisu bá dezenvolvimentu no kresimentu sósio-ekonómiku hanesan haree hosi Primeiru-Ministru Honble Índia, shri Narendra Modi Ji. Gujarat iha pozisaun di’ak atu kontribui no aselera vizaun Aatmanirbhar Bharat no Vixit Bharat 2047.

Lee Mós: Prezidente Repúblika Partisipa Asembleia Jerál ONU bá dala-LXXVIII

Iha tinan 20 nia laran, hahú hosi Simeira Vibrant Gujarat hahú, iha dekade rua ne’e, inisiativa ne’e sai hanesan trailblazer no tendénsia.

“Ida-ne’e hatudu katak, hanoin boot mak pasu primeiru hodi fó impaktu boot. Ida-ne’e hatudu oinsá Estadu India ida bele institusionaliza dalan ida atu liga investidór indianu no internasionál sira ho aspirasaun sira hosi nia foin-sa’e sira. Ida ne’e mós estabelese referénsia nasionál ida-ne’ebé Estadu barak emula ho susesu, nune’e hametin ekonomia India nian. Simeira Vibrant Gujarat kontinua ho vizaun kona-ba Gujarat ida-ne’ebé prósperu ba India ida-ne’ebé ukun an rasik,”  Hatutan.com sita komunikadu.

Prezidente Repúblika (PR), José Ramos-Horta arranka bá Índia hodi partisipa Simeira Vibrant Gujarat Globál Summit 2024 iha sidade New Delhy, Segunda (08/01/2024). Foto: Tomé da Silva.

Simeira vibrante 2024 Gujarat ne’e sei partisipa hosi líder mundiál sira inklui Prezidente Repúblika, José Ramos-Horta no mós Primeiru-Ministru Repúblika Checa, Peter Fiala.

Eventu bienal ne’e inisia hosi Primeiru-Ministru Índia, Narendra Modi iha tinan 2003. Bainhira Ministru-Xefe Estadu ba Gujarat, nakfilak nu’udár plataforma krusiál bá polítiku sira-ne’ebé atu foti desizaun kona-bá investidór sira atu promove kolaborasaun hodi explora oportunidade ba investimentu.

Simeira Vibrant Gujarat Global Summit 2024 refere sei hala’o durante loron rua hahú hosi loron 09 to’o 10 Janeiru tinan ne’e, ne’ebé Índia mak hanesan uma-na’in bá eventu mundiál ne’e.

José Ramos-Horta bá partisipa iha Simeira Vibrant Gujarat Globál Summit 2024 ne’e hamutuk ho delegasaun hosi Palásiu Prezidensiál no akompaña hosi Ministru Negósiu Estranjeiru no Kooperasaun Bendito dos Santos Freitas.

Jornalista: Vito Salvadór