Hatutan.com, (11 Janeiru 2024), Díli—Prezidente Repúblika (PR), José Ramos-Horta sei ko’alia ho Primeiru-Ministru (PM), Kay Rala Xanana Gusmão kona-bá Embaixadór dezignadu bá Repúblika Indonézia (RI) António da Conceição “Kalohan” ne’ebé oras-ne’e Tribunál Judisiál Primeira Instánsia Díli kondena ho prizaun efetivu tinan-lima (5).
![](https://www.hatutan.com/wp-content/uploads/2023/12/Antonio-da-Conceicao-300x165.jpeg)
António da Conceição Embaixadór Timor-Leste bá Repúblika Indonézia, simu pose iha Palásiu Prezidensiál Nicolau Lobato Bairru- Pité, Tersa (12/12/2023). Foto: Elio dos Santos da Costa.
“Há’u sei la ko’alia kona-bá saida mak akontese durante há’u nia auzénsia maibé ha’u sei ko’alia ho Primeiru-Ministru no Embaixadór dezignadu bá Indonézia António da Conceição no ita sei ba haree saida mak sei halo ba oin,” Ramos-Horta hateten iha Aeroportu Internasionál Prezidente Nicolau Lobato, Comoro, Kinta (11/01/2024).
Lee Mós: “Kalohan” Kondenadu Kadeia Tinan Lima bá Kazu Produsaun Masin Atabae
Antes ne’e Tribunál Judisiál Primeira Instánsia Díli (TJPID) liuhosi desizaun ikus iha Segunda 08 Janeiru tinan ne’e, kondena arguidu António da Conceição “Kalohan” ho arguidu Apolinário dos Santos Assunção bá tinan lima kadeia, tanba konsidera akuzasaun sira antes ne’e hosi Ministériu Públiku (MP), maioria provadu no iha prossesu judisiál ida-ne’e, Tribunál absolve arguidu Domingos Gouveia bá kazu produsaun masin iha área Atabae munisípiu Bobonaro.
Juiz deklara iha julgamentu ikus katak, iha altura ne’ebá arguidu António “Kalohan” hanesan Ministru ida, loloos hatene ninia obrigasaun atu halo tuir rejíme konkursu ne’ebé iha maibé nia parte la halo ida-ne’e.
Arguidu Apolinário iha tempu ne’ebá mós hanesan Vise Koordenadór, maibé la hala’o nia kna’ar ho di’ak hodi fó de’it benefísiu bá kompañia ne’e.
Tanba ne’e, Tribunál liuhosi Juiz kolektivu laiha dúvidas no konsidera katak, akuzasaun ne’ebé mai hosi MP provadu.
Ho ida-ne’e maka ikus mai Juiz kolektivu ne’e deside hodi aplika prizaun efetivu tinan-lima (5) bá arguidu António da Conceição no prizaun efetivu tinan-haat (4) bá arguidu Apolinário dos Santos Assunção.
Nune’e mós arguidu Domingos Gouveia hanesan kompañia na’in, Tribunál absolve hosi krime maibé Tribunál kondena bá iha indemizasaun ho osan montante globál $17,587.72 (rihun sanulu resin hitu, dolar atus lima walu nulu resin hitu no sentavu hitu nulu resin rua dolar amerikanu).
Iha loron 12 fulan Dezembru 2023, Prezidente Repúblika (PR), José Ramos-Horta fó posse bá António da Conceição hanesan Embaixadór Timor-Leste bá Repúblika Indonézia (RI) ho mandatu tinan tolu.
Lee Mós: Deputadu Manuel Noronha Substitui “Kalohan” Nu’udár Xefe Bankada PD
Jornalista: Vito Salvadór