Hatutan.com, (16 Janeiru 2024), Díli– Kaderneta pasaporte ho kuantidade 20.650, Segunda (15/01/2024), to’o ona iha Timor-Leste no tempu badak nia laran Servisu Notariadu sei halo atendimentu online bá públiku.

Lee Mós: Kaderneta Pasaporte Hotu, MJ Garante Estoke Foun Sei To’o TL iha Tempu Badak

Pasaporte komún ho pasaporte servisu RDTL . Foto/Dok.Hatutan.com

Diretór Jeral Notariadu, João Fernando Martins Borges, konfirma katak kaderneta  pasaporte  20.650, to’o  ona iha Timor-Leste no ami ba halo tiha ona resedimentu hodi orgniza hela para atu hakaat bá  atendimentu liuhosi ajendamentu online. Ne’ebé ami seidauk loke atendementu bá públiku sei hein lansamentu bá sistema ne’e depois ami halo atendimentu bá públiku,” Diretór Jeral Notariadu, João Fernando Martins Borges bá informa bá jornalista sira nia knaar fatin, Servisu  Notariadu, Tersa (16/01/2024)

Atu evita abitante sira forma naruk no sena-malu iha repartisaun  Servisu Notariadu nian, maka parte sira sei halo atendimentu liuhosi online no fasilita abitante sira ho lais liu aplika liuhosi online bainhira halo ona lansamentu iha tempu badak,” nia tenik.

 Atendimentu manual nian,  João Fernando Martins Borges, sei kontinua halo maibé loron ida bele atende de’it ema na’in-140 . ho nia oráriu mak hanesan ema ne’ebé apliká hosi numeru 01 to’o 70 sei mai iha tempu dadeer no hirak ne’ebé hosi numeru 71 to’o 140 sei mai iha loraik. Depois to’o numeru ida-ne’e sistema sei taka aan no sei apliká loron tuir mai.

Diretór Jeral Notariadu, João Fernando Martins Borges. Foto/Tome da Silva

“Atendimentu norma kuandu ita lansa tiha ona sistema, ita tenta para posivel sistema prontu ona, Ministru Justisa Amandio Lopes sei halo lansamentu no ami sei apliká fazeadamente no sei hahú hosi servisu sentrais. Pasaporte kuandu ita loke ona hanesan ne’e signifiká bá ema hotu-hotu, maibé hanesan ha’u dehan ona ne’e ita nafatin hein sistema ne’e lansa tiha lai tuir orientasaun hosi Ministru nian para evita ema labele forma nafatin. Atendimentu maka ami muda hosi forma bá sistema online, maibé pagamentu nafatin ho $100, $75  no $50 dolar sei nafatin,” Diretór Jeral Notariadu,  João Fernando Martins Borges esplika.

Jornalista Estajiária: Zita Menezes