Hatutan.com, (17 Janeiru 2024), Díli—Governu Timor-Leste (TL) ho Repúblika Sosialista Vietname (RSV), iha tempu besik sei selebra akordu ida kona-bá izensaun vistu bá titulares pasaporte ordináriu, tituláres pasaporte diplomátiku no servisu nian.

Akordu ida-ne’e ho baze bá projetu ne’ebé aprezenta hosi Vise-Ministra bá Asuntu ASEAN, Milena Maria da Costa Rangel, iha sorumutu Konsellu Ministru, Kuarta 17 janeiru ne’ebé delibera ona hodi aprova akordu entre país rua ne’e.

Lee Mós: Vietname Sei Apoia Adezaun TL bá ASEAN

“Akordu hirak ne’e ho objetivu atu hametin relasaun amizade entre país rua ne’e no sei fasilita viájen sidadaun sira nian bá objetivu turístiku,” Hatutan.com sita komunikadu.

Haree bá prosesu adezaun Timor-Leste nian ne’ebé la’o hela nu’udár membru ASEAN bá da-11, no ninia estatutu observadór iha Simeira ASEAN, deliberasaun ida-ne’e hakarak atu aliña ho dispozisaun Akordu Turizmu ASEAN no Roteiru Adezaun Repúblika Demokrátika Timor-Leste bá ASEAN.

Objetivu ne’e atu promove turizmu ho efetivu iha rejiaun no hametin lasu amizade entre sidadaun ASEAN nian, no hatudu kompromisu Timor-Leste nian hodi implementa no respeita instrumentu hotu-hotu ASEAN nian, inklui akordu-Kuadru ASEAN kona-bá izensaun vistu.

Jornalista: Rogério Pereira Cárceres