Hatutan.com, (19 Janeiru 2024), Díli—Ministra Edukasaun, Dulce de Jesus Soares to’o agora seidauk simu karta ruma hosi professóres kontratadu tinan 2023 na’in 1.715 ne’ebé kuaze semana ida ona halo protestu kona-bá sira nia estatutu, nune’e parte Ministériu Edukasaun (ME) planeia ona atu halo rekrutamentu liu hosi loke vaga foun hamutuk 800 atu bele responde preokupasaun sira kona-bá falta professores iha eskola sira.

Ministra Edukasaun, Dulce de Jesus Soares. Foto: Tome da Silva.

Dulce de Jesus haktuir, Komisaun G ne’ebé trata Assuntu Edukasaun Joventude Sidadania no Kultura  mak simu ona karta hosi profesores ne’ebé hetan kontratu iha tinan 2023, nune’e Ministériu Edukasaun ho Sekretáriu Estadu fó ona klarifikasaun kona-bá artigu sira iha Dekretu Lei númeru 31/23 ne’ebé sai kestaun hosi profesór sira ne’ebé hetan kontradu hosi Ministériu Edukasaun iha 2023.

Lee Mós: Ensinu Bazikú 08 Umu-Sege Uatulari Presiza Tan Sala bá Aula no Aumenta Profesór

Ministra Edukasaun mós halo ona audiénsia ho Komisaun G iha PN, Sesta (19/01/24) hodi esklarese kona-bá asuntu ne’e no informa mós katak, Ministériu Edukasaun halo ona kuadru pessoál bá rekrutamentu ne’e.

“Liu hosi kuadru pessoál ne’e maka sei konsentra bá iha Ensinu Báziku porvolta 800 profesóres maka presiza duni iha Timor laran. Maibé, la’ós eskola hotu-hotu. Hosi rezultadu fiskalizasaun, ami mós hakarak atu hetan lista eskola sira ne’e atu ami mós bele halo verifikasaun fila-fali katak loos duni eskola ida-ne’e mak laiha professór ka iha profesór balun mak la to’o bele hahú fila-fali bá sistema ensinu iha Timor ne’e estabelesimentu liohosi agrupamentu atu koloka fila-fali sé karik iha professór balun mak seidauk to’o,” nia hateten.

Ministra ne’e esplika, hosi kuadru pessoál ne’e Ministériu Edukasaun sei halo transferénsia bainhira iha eskola balun maka profesóres barak liu, tenki transfere fali bá eskola ne’ebé maka menus profesóres.

“Semana oin sei hahú halo rekrutamentu bá bolsa kandidatu das profesóres. Ita sei koloka bazeia bá nesesidade. Ida-ne’e maka Ministériu Edukasaun sei halo hodi responde dehan katak falta profesóres. To’o agora ami seidauk simu karta ofisiál hosi profesóres kontratadu ne’ebé halo hela manifestasaun, maibé tuir Lei ema hotu-hotu iha direitu atu espresa ninia hanoin tuir regras ne’ebé mak iha,” Ministra Edukasaun deklara.

Professór Kontratadu 1.715 Ezije Estatutu

Liuhosi Konferénsia imprensa ne’ebé hala’o iha loron (18/01/24) iha jardin 5 de Maio, reprezentante profesóres kontratadu iha territóriu nasionál tomak hamutuk 1.715 husu Ministériu Edukasaun atu buka solusaun bá sira nia problema ne’ebé daudaun ne’e sira hasoru.

Porta-vós, Agostinho Pinto hateten, professores kontratadu sira sente triste tanba tuir loloos iha tempu inisiu aprendizazen hanesan ne’e, sira hamutuk ho estudante sira hodi aprende hamutuk iha aula laran maibé Ministra Edukasaun no Sekretáriu Estadu Ensinu Sekundáriu Jerál no Téknika Vokasionál hapara tiha profesóres sira nia kontratu sem karta notifikasaun ruma, maibé bandu ona profesór sira labele hamriik tán iha aula hodi hanorin no eduka estudantes sira.

Profesóres kontratadu sira ne’e simu kontratu iha tinan 2023 hamutuk 1.715 lamenta tebes ho desizaun Governante na’in rua ne’e tanba konsidera la respeita valores no boa governasaun no la assegura direitu no interese lejitimu sidadaun nian.

“Ministra Edukasaun no Sekretáriu Estadu foti desizaun ne’ebé la haree ba vantajen no desvantajen. Kuandu hapara ami kontratadu sira, entaun ninia implikasaun maka públiku bele haree ohin loron eskola balun taka ona tanba profesores laiha, eskola balun menus Profesóres,” nia hateten.

Portavós ne’e mós konta katak, professores kontratadu hirak ne’e simu kontratu iha tinan 2023 no halo sakrifisiu, balun fali dedika an bá servisu hanesan voluntáriu durante tinan 10-resin molok hetan rekoñesimentu hosi mandatu VIII  Governu Konstitusionál.

Nia husu atu Ministra ho Sekretáriu Estadu buka rezolve kestaun ne’e la’ós atu hapara maibé rezolve estatutu professór kontratadu tinan 2023 nian tuir Dekretu Lei númeru 31/2023 de 3 1 de Maiu kona-bá estatutu karreira profesores ne’ebé previstu iha artigu 11.

Professores hirak ne’e mós husu atu rezolve uluk problema professór kontratadu tinan 2023, reklamante no voluntáriu sira molok loke teste bolsa kandidatu bá públiku.

Bainhira Governu la konsidera ezijénsia ne’e maka sira sei halo asaun Marsa Pasífika ne’ebé tuir planu sei realiza iha dia 22 de Janeiru 2024 iha Díli.

Jornalista Estajiária: Zita Menezes