Hatutan.com, (22 Janeiru 2024), Vatikanu– Sua Santidade Papa Francisco konfirmandu vizita Timor-Leste iha tinan ne’e.

Lee Mós: Posibilidade Papa Francisco Vizita Indonézia, Singapura no TL iha Agostu

PR Ramos-Horta halo enkontru ho Papa Francisco iha Vatikanu, Segunda (22/01/2024). Foto/Vito Salvadór

Disponibilidade vizita Papa nian mai Timor-Leste ne’e hato’o diretamente hosi Papap Franciaco bá Prezidente Repúblika (PR), José Ramos-Horta, liuhosi enkontru ofisial ne’ebé hala’o iha Bazílika Santa Marta Vatikanu, Segunda (22/01/2024).

Jornalista Hatutan.com, Vito Salvadór ne’ebé akompaña vizita Xefe Estadu Timor-Leste hosi Vatikanu relata katak Ramos-Horta halo enkontru dahuluk ho Papa Francisco ho kualidade hanesan Prezidente Repúblika Timor-Leste no enkontru ne’e Papa Francisco hateten nia kontente ho Timor-Leste, Papa hadomi Timor, akompaña no koñese situasaun di’ak Timor nian no hakarak vizita Timor-Leste iha tinan ne’e.

“Amu Papa Francisco konfirma hakarak vizita Timor-Leste iha tinan ne’e, maibé bá programa no data loloos ne’e Santa Sé hamutuk Governu no Igreja Timor-Leste mak sei anunsia ofisiálmente kona-bá loron vizita ho programa sira hotu,” Prezidente Repúblika José Ramos-Horta informa hafoin hasoru malu ho Papa Francisco.

Xefe Estadu hatutan iha loron 26 fulan-Janeiru, tinan ne’e, sei iha delegasaun ida husi Vatikanu bá Díli halo estudu bá kondisaun lojístika no infraestrutura nuudár preparasaun bá vizita Papa Francisco nian ne’ebé sei akontese.

Ramos-Horta deklara nia parte sei la fó sai ba públiku kona-ba data lolos Papa Francisco nia vizita mezmu hatene tamba tenke tuir bá prosedimentu sira Vatikanu nian no Santa Sé nia regra kona-bá vizita Papa Francisco nian, tanba iha protokolu igreja nian ne’ebé tenke submete ba.

Kona-ba vizita ofisiál Papa Francisco nian bá Timor-Leste, konjuntamente no simultaneamente sei anunsia ba públiku.

“Papa Francisco hateten no repete fila-fila mai ha’u nia hakarak bá vizita Timor-Leste iha tinan ida ne’e,” Ramos-Horta tenik tan.

Xefe Estadu husu atu povu Timor-Leste reza ba Santu Padre Papa Francisco nia saúde nune’e nia bele vizita Timor-Leste iha tempu ne’ebé determina ona.

Papa Francisco Admira ho Rekonsiliasaun iha Timor-Leste

PR Ramos-Horta hasoru malu ho Papa Francisco iha Vatikanu, Segunda (22/01/2024). Foto/Vito Salvadór

Prezidente Repúblika José Ramos-Horta, informa Papa Francisco no Sekretáriu Estadu Vatikanu sente orgullu ho prosesu rekonsiliasaun ne’ebé Estadu Timor-Leste halo iha país no mós ho Indonézia ne’ebé di’ak los.

“Difisil loos iha mundu hetan rekonsiliasaun modelu ida nune’e, funu naruk ema barak mate, susar tebes atu perdua malu, maibé Timor-Leste bele halo no ida-ne’e hanesan orgullu no Papa Francisco admira,” José Ramos-Horta haktuir.

Santa Sé Haksolok Relasaun Igreja no Estadu iha Timor-Leste Armonia

Prezidente Repúblika José Ramos-Horta hateten iha sorumutuk ho Sekretáriu Estadu Vatikanu Pietro Parolin ne’ebé asume mós responsabilidade hanesan Primeiru-Ministru Vatikanu hato’o nia orgullu no apresiasaun bá kontribuisaun no servisu hamutuk ne’ebé Estadu no Igreja Timor-Leste iha.

“Santa Sé kontente ho buat ne’ebé Prezidente Repúblika no Primeiru-Ministru Timor-Leste halo ba relasaun Igreja no Estadu di’ak, konstrutivu, independente no ida la interfere ida seluk, maibé kolabora institusionálmente nu’udár Timoroan,” Prezidente Repúblika José Ramos-Horta hateten.

Vizita Xefe Estadu nian ne’e susesu boot bá Timor-Leste tanba mezmu nasaun ki’ik no kiak, maibé ema hotu iha mundu rona no konvida  Prezidente Repúblika bá ko’alia iha fatin-fatin.

Jornalista: Vito Salvadór