Connect with us
Pakote Ahi

Nasionál

Ministru Justisa Amândio De Sá Benevídes Haloot Iha Semitériu Becusse

Published

on

Hatutan.com, (22 Janeiru 2024), Díli—Maktoban Ministru Justisa (MJ), Amândio De Sá Benevídes, haloot ona nia isin-mate iha Semiteriu Públiku Becusse iha Segunda, 22 janeiru iha tuku 15:00 lorokraik.

Maktoban Ministru Justisa (MJ), Amândio De Sá Benevídes, haloot ona nia isin-mate iha Semiteriu Públiku Becusse iha Segunda, 22 janeiru iha tuku 15:00 lorokraik. Foto: Elio dos Santos da Costa.

Matebian Amândio de Sá Benevides hakotu iis iha loron sábdu 20 Janeiru 2024 iha tuku 13:30 iha Ospitál Nasionál Guido Valadares, tanba atakasaun fuan.

Lee Mós: Ministru Justisa, Amândio dé Sa Benevídes Husik-iis ho Idade 60 Tanba Atakasaun Fuan

Hafoin lori mate-isin sai hosi mortuáriu HNGV lori bá rezidénsia privádu iha Malinamuk Comoro ne’ebé ha-toba durante kalan rua no fó biban ba família ho entidade hotu-hotu Estadu nian sivíl no militár presta omenajen.

Advertisement

Iha segunda, 22 janeiru 2024 hale’u tuku 12:30, transporta isin mate bá halo vizita ikus no hetan presta omenajen ikus hosi estrutura no kuadru tomak iha sede partidu CNRT nian iha Bairro dos Grilhos iha tuku 13:00.

Fila hosi sede CNRT lori saudózu Amândio nia isin-mate bá halo tán vizita ikus nian iha nia servisu fatin Ministériu Justisa haleu tuku 14:30.

Ikus hosi ida-ne’e, lori bá haloot iha Semiteiru Públiku Becusse no rai hela isin-mate iha Kapeliña laran besik oras ida tanba Pe. Venâncio da Costa Pereira, SJ prezide missa korpu prezente molok haloot iha fatin deskansa ikus nian.

Reprezentante família, Amilcar hato’o agradesimentu wa’in bá parte hotu-hotu ne’ebé tulun ona sira, liu-liu feto faluk ho oan ki’ak sira, durante enfrenta situasaun susar no terus ida-ne’e to’o lori tán maktoban nia isin-mate bá haloot iha semitériu.

Maktoban Ministru Justisa (MJ), Amândio De Sá Benevídes, haloot ona nia isin-mate iha Semiteriu Públiku Becusse iha Segunda, 22 janeiru iha tuku 15:00 lorokraik. Foto: Elio dos Santos da Costa.

“Ho biban ida-ne’e, ami hakarak agradese tebtebes, bá Governu Timor-Leste ne’ebé fó fiar hili ami nia família ida hodi servi Governu maske la to’o nia rohan,” Amilcar agradese.

Família mós agradese bá partidu CNRT ho estrutura tomak ne’ebé durante ne’e tulun tebes sira hodi halo buat hotu-hotu iha tempu susar ida-ne’e nia laran.

Advertisement

Amilcar agradese mós bá Ministériu Justisa ne’ebé sira nian matebian, hanesan tutela bá ho sira nia prezensa, nomós sira nian tulun, mak ohin loron, serimónia fúnebre ida ne’e bele to’o mai hamutuk iha rate.

“Hanesan ita ema moris iha mundu, la hameno bá malu, mate mós la hameno bá malu. Ne’e duni, ami dala-ida tán iha liafuan ida atu temi iha fatin ida ne’e, só de’it ami nia agradese bá ema hothotu, maske ami labele teni ida-idak iha ne’e, hosi parte estadu nian, hosi parte sívil nian, hosi parte militár nian, ho mós NGO’s, ho mós kompañia sira, ne’ebé loron hirak ne’e nia laran mai tulun hamutuk ho matebian nia familia sira ho faluk ho família sira hodi bele realiza serimónia ida ne’e to’o mai ohin lokraik iha rate bá iha seremónia hakoi nian,” nia agradese.

Saudozu Ministru Justisa, Amândio de Sá Benevides moris iha loron 15 fulan Juñu 1964 iha Munisípiu Ainaro, no Saudozu mate ho idade 60.

CNRT Lakon Kuadru Potensiál

Partidu Congresso Nacional de Reconstrucção Timorense (CNRT) liuhosi Prezidente Partidu, Kay Rala Xanana Gusmão lori kuadrus no militante sira tomak partidu CNRT nian hato’o sentiment triste, tánba lakon ona figura no kuadru di’ak ida hanesan maktoban Ministru Justisa, Amândio De Sá Benevídes, ne’ebé hakotu jornada ikus iha mundu.

Advertisement

Xanana Gusmão espresa nia sentimentu triste ida-ne’e durante fó omenájen ikus bá maktoban nia mate isin ne’ebé lori bá halo mós vizita bá iha Sede CNRT nian, iha Bairo dos Grilhos, Suku Gricenford, Postu Administrativu Na’in-Feto, Munisipiu Dili.

“Ita hotu ema hothotu serteza boot ida ne’ebé ida-idak iha mak ida-ne’e, sei mate. Laiha ema ida ke bele evita ka hasees aan hosi ne’ebá. Ita hotu-hotu sei mate. Serteza ida, ema hothotu iha ninia moris mak ida ne’e,” Prezidente CNRT, Kay Rala Xanana Gusmão, nia intervensaun durante simu vizita ikus Saudozu Amândio nia isin-mate iha Sede CNRT.

Maibé, Xanana dehan serteze ida ne’e mós lori inserteza boot ida. Buat hotu-hotu iha nia pro ho nia kontra. Inserteza boot ne’e maka ema hotu-hotu la hatene bainhira mak atu mate no mate ida oinsá.

Primeiru-Ministru IX Governu Konstitusionál ne’e haktuir, bainhira nia ho delegasaun fila hosi vzita estadu b’a Suiça, iha sábadu (20/01/2024), nia haree katak, membru governu sira hotu bá simu nia, no sira komprimenta hela malu.

Xanana konta, bainhira sira tama tiha bá iha salaun VIP ninian, nia hein hela membru Governu sira ne’e hamutuk, atu ko’alia ho sira kona-bá saida mak nia bá halo iha liur, ho nune’e maka Xefe Governu ne’e haree Ministru Justisa, Amândio De Sá Benevídes tuur tiha.

Advertisement

“Nia tuur ona sira bá haree, to’o labele tiha, latan tiha iha rai. Ha’u mós la espera katak nia atu hakotu nia iis iha ne’ebá. Prezidente Repúblika to’o, ha’u bá ko’alia tiha, lori tiha Prezidente bá aviun, fila-fali mai ha’u husu, sira dehan, ambulánsia bá ona, lori tiha ona bá ospitál. Fila-fali bá uma, besik ona jardim Lecidere, maka rona dehan iis kotu tiha ona,” PM Xanana konta tuir.

Ne’e duni, kona-bá saudózu nia bibliográfia hatudu katak, durante nia vida, nia la hanoin bá nia aan rasik, hanoin bá devér nu’udár timoroan, dever mós nu’udár kuadru partidu CNRT.

“Ne’e duni bá família tomak partidu CNRT, ho triste boot, fó ami nia sentimentus kondolénsia liu-liu bá labarik oan sira no bá família tomak. Ita presta tiha ona grasa bá nia, hodi husu katak, iha leten ne’ebá, fó hanoin nafatin mai ita hotu nu’udár kuadru CNRT, atu servisu bá rai ida-ne’e no povu ida-ne’e,” Xanana hateten.

Jornalista: Rogério Pereira Cárceres

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Nasionál

Konstrusaun Altar Misa ho Papa Francisco Atinje 80%, Sekretariadu Komisaun Altu Nível iha Motael

Published

on

Hatutan.com, (19 Abríl 2024), Díli—Projetu konstrusaun altar misa hamutuk ho Papa Francisco iha Tasi-tolu, oras ne’e daudaun atinje ona 80%.

(more…)

Kontinua Le'e

Nasionál

KSTL Organiza Asaun Pasífiku Ezije Governu Hasa’e Saláriu Mínimu $115 bá $150

Published

on

Hatutan.com, (19 Abríl 2024), Díli – Konfederasaun Sindikatu Timor-Leste (KSTL) organiza asaun pasifika  da-uluk iha Díli  hodi  ezije Governu hasa’e saláriu mínimu  $115 bá  $150.

(more…)

Kontinua Le'e

Nasionál

Kandidatu Na’in-41 Sei Kompete iha Eleisaun Suku 10

Published

on

Hatutan.com, (18 Abríl 2024), Díli—Totál kandidau ne’ebé admitidu bé 𝐄𝐥𝐞𝐢𝐬𝐚𝐮𝐧 𝐎𝐫𝐠𝐚𝐮𝐧 𝐒𝐮𝐤𝐮 𝟐𝟎𝟐𝟒, ne’ebé sei realiza iha loron 27 fulan abril tinan ne’e hamutuk na’in-41, kompostu hosi 𝐌𝐚𝐧𝐞-𝟑𝟗 𝐧𝐨 𝐅𝐞𝐭𝐨-𝟐.

(more…)

Kontinua Le'e
Advertisement

Trending