Hatutan.com, (24 Janeiru 2024), Paris- Prezidente Repúblika (PR), José Ramos-Horta ho Prezidente Fransa, Emmanuel Macron iha kompromisu boot bá kombate pobreza no sub nutrisaun infantíl ne’ebé sai preokupasaun mundiál.

Lee Mós: Ramos-Horta no Papa Francisco iha Preokupasaun Hanesan Kona-bá Situasaun Umanidade

Prezidente Repúblika José Ramos-Horta iha Palásiu l’Elysée Paris, simu direita husi Prezidente Fransa Emmanuel Macron, Kuarta (24/01/2024). Foto/Vito Salvadór

Kompromisu Xefe Estadu rai rua ne’e hato’o bainhira sira-rua hasoru malu iha Palásiu l’Elysée, Paris, Kuarta (24/01/2024). Jornalista Hatutan.com, Vito Salvadór ne’ebé akompaña vizita Xefe Estadu Timor-Leste hosi Paris-Fransa, informa Prezidente Repúblika José Ramos-Horta halo enkontru ho nia omólogu Prezidente Repúblika Fransa Emmanuel Macron, hahú  tuku 15:30  to’o  tuku 16:00 Oras Fransa.

Durante enkontru ne’e PR Ramos-Horta hato’o informasaun breve  kona-bá Timor-Leste nia situasaun ne’ebé pasifika, laiha violénsia, ekonomia la’o daudaun, apezar de krize rejionál no internasionál.

Ramos-Horta Informa mós kona-bá Timor-Leste nia planu bá projetu Tasi-Mane no konstrusaun bá Portu Tibar ne’ebé empreza Franses Bolore hamutuk ho Banku Mundiál finaliza no agora empreza Bolore mak kontinua jere administrativamente.

Prezidente Fransa Emmanuel Macron kontente rona informasaun sira kona-bá Timor-Leste no Xefe Estadu rua, ko’alia mós kona-ba Timor-Leste nia adezaun ba organizasaun rejionál ASEAN, ko’alia mos kona-bá situasaun politika iha rejiaun Sudeste Aziátiku liu-liu konflitu iha Myanmar tamba lider opozisaun sira iha Myanmar mós husu atu ko’alia ho Prezidente Fransa Emmanuel Macron hodi apoiu sira iha rekursu umanu, atu nune’e, bainhira rejime militár monu sira bele iha rekursu no preparasaun hodi re-organiza sira nia Estadu.

Husi asuntu lubuk ida ne’ebé diskute ikus mai Xefe Estadu rua hamosu kompromisu atu oinsá bá oin Timor-Leste no Fransa bele haree no halo inisiativa ruma iha nivel internasionál, liu-liu kona-bá luta kontra estrema pobreza, sub nutrisaun infantil.

Foin daudauk Fransa organiza reuniaun internasionál ne’ebé ko’alia kona-bá alimentasaun mundiál, tanba ne’e hanoin katak importante atu Timor-Leste servisu hamutuk ho Fransa bá kombate sub nutrisaun no kiak.

 Fransa Kompromete Loke Embaixada iha Timor-Leste

Prezidente Repúblika José Ramos-Horta hateten Fransa liu husi Prezidente Emmanuel Macron iha kompromisu atu loke embaixada iha Timor-Leste  tanba Timor-Leste no Fransa iha kooperasaun ida di’ak.

“Prezidente Emmanuel Macron simu pedidu ne’e ho di’ak, aban bá oin, nia sei enkontru kedas ho Ministériu Negósiu Estranjeiru Fransa nian para haree loke embaixada iha Timor-Leste,” Prezidente Repúblika José Ramos-Horta haktuir.

Ikus liu, Prezidente Repúblika José Ramos-Horta informa mós ba Prezidente Emmanuel Macron kona-bá Timor-Leste nia esforsu atu lori investor sira bá investe iha área infraestrutura Otél no Fransa hanesan mós nasaun ne’ebé iha investor boot no iha investimentu ba área otél nian iha rai barak iha Asia, Austrália, Europa no fatin barak iha mundu.

Tuir ajenda, Iha loron 25 fulan-Janeiru, Xefe Estadu mós sei hala’o sorumutuk ho Cedric Perrin – Prezidente Senadu ba Komisaun Negósiu Estranjeiru, Defeza no Forsa Armada Fransa nian.

Prezidente Ramos-Horta sei partisipa mos iha eventu “2023 Smart Peace Prize” ne’ebé organiza husi “Leaders pour la Paix.”

Prémiu da Pás ne’ebé di’ak ba labarik no foin-sa’e sira iha tinan 2023 nu’udar prémiu ida-ne’ebé fó kolen no fó atensaun ba esperiénsia ne’ebé susesu hodi estabelese pedagojia dame ida-ne’ebé sustentavel ba foin-sa’e sira, no organiza husi Leader Pour la Paix ne’ebé hanesan organizasaun non-profit, kria liu husi inisiativa eis Primeiru-Ministru Jean-Pierre.

Prezidente Ramos-Horta sei partisipa nu’udar konvidadu  onra no sponsor ofisiál ba Prémiu da Pás “2023 Smart Peace Prize”. Serimónia ne’e sei hala’o durante han-kalan ofisiál iha  25 fulan-Janeiru 2024 no sei halibur konvidadu sira ne’ebé iha prestíjiu hamutuk atus ida.

Iha loron 26 fulan-Janeiru Xefe Estadu Timor-Leste sei Partisipa iha Konferénsia Siénsia Politika iha Eskola Asuntu Umanitáriu. ***