Hatutan.com, (09 Fevereiru 2024), Díli—Organizasaun Internasionál g7+ konsidera média iha papél importante atu promove pás, demokrasia no estabilidade.

Adjuntu Sekretáriu Jerál g7+, Habib Urrehman Mayar partisipa iha forum editoriál ne’ebé organiza hosi Conselho Imprensa (CI) durante loron ida iha Kintál Boot, Sesta (09/02/2024). Foto: Tomé da Silva.

Adjuntu Sekretáriu Jerál g7+, Habib Urrehman Mayar hateten ida-ne’e iha forum editoriál ne’ebé organiza hosi g7+ partisipa hosi Conselho Imprensa (CI) no media nasional sira durante loron ida iha Palasiu Governu, Sesta (09/02/2024).

Lee Mós: g7+ Kongratula Eleisaun Prezidensiál iha TL La’o ho Trankuilidade

Tuir Habib Mayar obsevra katak, média Timor-Leste nian iha papél ne’ebé importante no krusiál tebes iha situasaun mundu ohin loron nian tanba notísia internasionál sira ne’ebé ko’alia kona-bá Timor-Leste sempre liga ho Timor-Leste nia passadu, hanesan funu, moras, no sira la haree bá dezenvolvimentu ne’ebé atinji ona.

Advertisement

“Situasaun ida-ne’e fó impaktu ne’ebé la di’ak bá imajen Timor-Leste nian iha mundu globál. Bainhira ha’u bá halo vizita iha nasaun sira, ema sempre husu maka Timor-Leste sei funu ka la’e. Ha’u dehan la’e,” nia hateten.

Hanesan nasaun membru hosi g7+ ka organizasaun intergovermentál ne’ebé halibur nasaun kuaze 20 ho karákter no faze dezenvolvimentu ne’ebé la hanesan, Timor-Leste nu’udár nasaun ida ne’ebé okupa númeru dahuluk iha liberdade espresaun nu’udár pozisaun as liu iha nasaun sira iha Aziátiku.

Tanba ne’e, iha oportunidade ne’e Habib mós husu bá média hotu-hotu iha Timor-Leste atu uza oportunidade ne’e ho di’ak hodi bele promove pás, estabilidade no demokrasia.

“Ha’u espera katak, depois de enkontru ida-ne’e média bele promove di’ak liu tán kona-bá estabilidade iha rai laran,” nia iha esperansa.

Lori g7+ nia naran hato’o agradesimentuá média sira ne’ebé apoia ona servisu g7+, nune’e g7+ sempre koordena hodi servisu hamutuk ho média iha rai liur no rai laran hodi kontinua divulga informasaun kona bá organizasaun internasionál ne’e.

Advertisement

Jornalista: Leopoldina de Carvalho