Hatutan.com, (13 Fevereiru 2024), Díli—Antigu membru Parlamentu hosi Malázia ho Timor-Leste ne’ebé hola parte iha ASEAN Parliamentarians for Human Rights (APHR) buka hatene ho Komisaun Nasionál Eleisaun ka Komisi Pemilihan Umum (KPU) kona-bá kandidatura Gibran Rakabuming Raka hanesan kandidatu vise-prezidente ho númeru sorteiu rua (2) hamutuk ho kandidatu Prezidente Repúblika  Prabowo Subianto.

Lee Mós: Eleisaun Indonezia 2024” Prabowo ka Ganjar/Anis: Se Los mak Diak Liu ba RDTL?

Kandidatu Vise-P:rezidente Repúblika no numeru sorteiu 2, Gibran Rakabuming Raka. Foto/Instagram @gibran_walikotasolo.id

Delegasaun APHR hala’o vizita ofisial bá estúdiu KPU iha Segunda, 12 fulan-Fevereiru 2024, relasiona ho eleisaun jerál Indonézia nian ne’ebé sei hala’o iha loron 14 fulan-Fevereiru 2024.

APHR ne’e reprezenta hosi antigu membru Parlementu Timor-Leste Abel da Silva ho  membru Parlamentu  Malázia Syed Ibrahim Syed Noh.

Advertisement

Sita hosi TEMPO.Co katak membru KPU ne’ebé simu vizita delegasaun APHR ne’e Mochammad Afifuddin, ne’ebé asume mós pozisaun hanesan xefe divizaun Lei no Supervizaun inklui Vise xefe divizaun Data ho Informasaun.

Syed Ibrahim esplika katak membru  APHR na’in-rua; ida hosi Timor-Leste no ida seluk hosi Malázia, aprezenta pergunta balun bá KPU, inklui relasiona ho prosesu KPU hanesan órgaun  bá jestaun eleitorál atu organiza eleisaun boot iha tinan ida-ne’e ho mós problema sira liberdade espresaun nian iha espasu dijitál.

 “Ami husu bá KPU kona-bá efeitu sira relasiona ho mudansa bá konstituisaun Indonézia nian to’o kandidatu vise-prezidente ida ne’ebé nia idade tinan 40 mai kraik, espesialmente bá Gibran,” Abel da Silva haktuir hafoin audiénsia iha edifísiu KPU, Jakarta.

Abel da Silva mensiona katak APHR mós hato’o rekomendasaun atu lejislasaun hotu ne’ebé relasiona ho eleisaun tenke halo antes eleisaun atu bele fasilita knar no kompeténsia KPU nian.

APHR aprezenta duvida kona-bá intervensaun balun iha KPU, maske nune’e, la detallu mekanizmu no modelu intervensaun ne’e rasik oinsá.

Advertisement

Hosi perspetiva estranjeiru nian ne’e, Syed Ibrahim haree katak prosesu eleisaun ne’ebé hala’o daudaun iha Indonézia la’o ho pozitivu no nia espera katak prosesu hotu sei la’o ho di’ak meske parte balun sei la satisfás ho nia rezultadu.

Relasiona ho kandidatu Gibran nian iha eleisaun 2024, Afifuddin responde katak pergunta sira membru APHR ne’e la iha tempu bá KPU atu responde ho imediata tanba desizaun ne’e mai nanis hosi Mahkamah Konstitusi (MK).

 Desizaun MK nian ne’ebé fó sai iha loron 16 fulan-Outubru 2023, fó oportunidade bá sidadaun ho tinan 40 mai kraik atu bele kandidatu aan bá prezidente repúblika no vise-prezidente repúblika, inklui kandidatu bá autoridade lokál.  

Desizaun MK nian ne’e sai baze no loke oda-matan bá Gibran ho idade tinan 37 avansa nu’udár kandidatu vise prezidente ho nia kandidatu prezidente Prabowo Subianto.

Fontes: TEMPO.Co

Advertisement