Hatutan.com, (09 Fevereiru 2024), Covalima-Veteranu sira, lia-na’in ho povu Munisípiu Covalima husu bá Governu liuhosi Ministériu Petróleu no Minerais (MPRM) atu aselera projetu supply base hodi bele apoiu dezenvolvimentu ekonomia povu no nasaun nian.

Lee Mós: Governu Kontínua Halo Sosializasaun Dezenvolvimentu Projetu Supply Base iha Kosta Súl

Ekipa MPRM observa mina-matan tolu iha Covalima, Sesta (09/02/2024). Foto/Rogério Pereira Cárceres

Veteranu, lia-na’in ho povu Cavalima sira hato’o rekomendasaun ne’e iha ámbitu  vizita Ministru Petróleu no Minerais (MPRM) Ministru Francisco da Costa Monteiro ho nia ekipa bá mina-matan tolu ne’ebé lokaliza iha Covalima,  Sesta (09/02/2024).

Mina-matan tolu ne’e, ida maka Feto Kmaus, lokaliza iha Aldeia Tabaco Lot, Suku Debos, Mina Matan Liurai, iha Aldeia Sanfuk, Suku Camanassa, Pastu Administrativu Suai, Mina Matan Lafaek, lokaliza iha Suku Matai, Postu Administrativu Maukatar.

Reprezentante Veteranu no lia-na’in Suku Camanassa, Jorge Alves, ho  ksolok ko’alia direta ho MPRM atu oinsá mak bele aselera projetu Suai supply base atu bele fó benefísiu ekonómiku bá nasaun no povu Timor-Leste tomak.

Lia-na’in Camanassa ne’e hatutan, komunidade ninia rai sira ne’ebé mak afetadu hosi projetu ne’e, Governu liuhosi Timor Gap, iha tempu ne’ebá kompensa ka indeminiza tiha ona, maibé, ohin loron rai hirak ne’e nakunu de’it ho duut no ai-tuan laran nafatin.

“Ami hakarak rekomenda bá MPRM atru aselera projetu Suai supply base atu loke kampu traballu ne’e boot liu bá ami, Purke ami hela tiha ona toos ida ne’e, rai ida ne’e ami para tiha, entaun, ami ne’e atu moris hodi saida. Entaun, projetu suplly base ne’e, mina ne’e loke lalais bá, atu nune’e ita ninia joven sira, matenek oan sira bele dehan sai hanesan kampu  traballu bá sira. Ida ne’e mak ami kontente, atu loke lalais, komesa ona bá,” Jorge Alves hateten.

Jornalista: Rogério Pereira Cárceres