Hatutan.com, (12 Fevereiru 2024), Díli-Vise-Ministru Saúde bá Fortalesimentu Instituisional Saúde, José dos Reis Magno, husu bá pesoal saúde sira iha Ospital Nasionál Guido Valadares (HNGV) ho ospitál referral, Sentru Saúde ho Postu Saúde iha territóriu nasionál no atu servi pasiente sira nakonu ho domin.
Lee Mós: Pasiente Mate iha HNGV La’ós Tanba Ai-moruk Laiha no Estoke Mamuk Sempre Bazeia bá Dadus
Pasiente sira simu komiñaun iha misa selebrasaun loron mundiál bá pasiente sira iha HNGV, Díli, Segunda (12/02/2024). Foto/Tome da Silva
José dos Reis Magno rekoñese katak buat balun profisionál saúde sira halon ona, hosi serbí nafatin povu sira ne’ebé sofre moras no halo konsulta iha ospitál sira, liuliu iha HNGV nune’e, to’o ohin lorin HNGV sei eziste ho dezafiu rasik.
“Karik pasiente sira nesesita ita sempre prontu hodi oferese kuidadu saúde ne’ebe sira prezisa iha nivel hot-hotu iha nasionál to’o munisípiu no postu administrativu sira,” Vise-MS José dos Reis Magno hateten bainhira partisipa iha selebrasaun missa agradesimentu loron mundiál bá ema moras bá dala-XXXIII iha HNGV, Segunda ( 12/02/2024)
Ministeriu Saúde (MS) ezije nafatin bá pesoal saúde hotu tenke servisu ho ekipa, nune’e bele kuidadu saúde no oferese tratamentu bá pasiente sira nakonu ho domin no ho pasiensia.
“Hanesan pesoal saúde satisfasaun mak bainhira pasiente sira fila bá uma ho di’ak. Ida-ne’e ita-nia satisfeitu,” José Reis Magno hateten.
Nia apresia ho profisionál no pesoál saúde sira hotu iha HNGV no iha teritoriu nasional tomak no husu atu kontínua mantein servisu ho di’ak.
Mezmu sei hasoru problema menus rekursu umanu, maibé MS husu ba pesoal saúde sira atu esforsa di’ak liután ho buat ne’ebe Estadu iha nune’e bele fó tratamentu di’ak bá pasiente sira no sira bele senti ksolok bá sira-nia moris tomak.
Iha biban ida ne’e, Padre Angelo Salsinha liuhosi nia omilia misa agradesimentu bá loron mundiál bá ema moras sira ne’e hato’o nia apresiasaun iha kle’an bá pesoal saúde sira hotu, katak ema hot-hotu ne’ebé serbisu iha saúde mesak ema rahun di’ak hodi serbí ema moras sira.
“Loron- loron Ami nunka rekoñese imi, maibe iha situasaun ne’ebé fraku no kbiit-laek ona maka ami prezisa imi, tanba imi ema ne’ebe maka rahun di’ak,” Padre Angelo Salsinha hateten.
Padre Angelo Salsinha fó bensaun bá paseinte sira iha HNGV iha loron mundiál bá pasiente sira, Segunda (12/02/2024). Foto/Tome da Silva
“Ha’u laduvida kona-ba ha’u nia profisaun, primeiru ha’u tenke koko ha’u ema rahun di’ak, vida espasu, oportunidade no tempu, ne’e la’ós ha’u nian, maibé Maromak nian. Se ha’u hanoin ha’u halai, lakohi haree sofrimentu, Ema nia mate, ema nia raan, moras aat Sira, maibe ha’u la hakribi, tamba ida-ne’e vokasaun ida Maromak nian,” Padre Angelo Salsinha hateten tan.
Diretóra Ezekutiva HNGV Cecilia Barros Mendonça mós akresenta nu’udár pesoal saúde nia prezensa importante tebes bá moras ka pasiente sira iha ospitál.
Nia reforsa katak moras sira persiza pesoál saúde nia akompañamentu ne’ebe masimu atu fó kuidadu ne’ebe di’ak, seguru no kualidade. Nune’e, nunka bele husik moras sira mesak iha ospitál sira.
“Tulun sira ho fuan no domin atu sira sente katak ita -ia prezensa ne’e folin liu bá sira kompara ho ai-moruk no ekipamentus avansadu sira,” nia afirma.
Nia parte Agradese ba médiku espesialista, médiku jerál sira, enfermeiru sira, parteira sira no tekniku aliadus sira, nivel konsellu to’o baze, bá hotu-hotu nia servisu hamutuk ne’ebe hatudu ona pasiente barak mak hetan salvasaun husi HNGV maske sei enfrenta limitasaun barak.
Jornalista : Leopoldina de Carvalho