Hatutan.com, (15 Fevereiru 2024), Díli-Ministériu Saúde liuhosi komisaun rekrutamentu no Diresaun Rekursu Umanus  (DRH, sigla portugés) halo daudaun rekrutamentu bá pesoál saúde sira atu koloka ka destaka bá postu saúde sira ne’ebé sei menus pesoál saúde.

Lee Mós: Pessoál Saúde Rekrutadu Hosi MS Hahú Servisu iha Semana Ne’e

Jornalista Hatutan.com, Rogério Pereira Cárceres  halo esntrevista ho Ministra Saúde iha Minitériu Finansa, Kinta (15/02/2024). Foto/Tome da Silva

Ministra Saúde, Élia A.A dos Reis Amaral, hatán bá Hatutan.com iha Ministériu Finansa, Díli,  Kinta (15/02/2024), katak daudaun ne’e ministériu ne’ebé nia lidera halo hela rekrutamentu bá pesoál saúde sira atu bele destaka iha postu saúde sira. Ho nune’e, bele fó atendimentu efikásia no efisiénsia bá povu iha konseitu kuidadu  saúde públiku.

Foin lalais ne’e, Xefe Suku Betano, Filipi de Araújo,  liuhosi Hatutan.com husu bá IX Governu Konstitusionál liuhosi Ministériu Saúde (MS) atu aumenta pessoál saúde iha Postu Saúde Aldeia Bee-metan no Loro, tanba durante tinan barak nia laran ona, pessoál saúde na’in-rua de’it mak fó atendimentu saúde bá populasaun Betano ne’ebé hamutuk 7000-resin.

“Husu bá ministériu saúde, atu haree mai iha suku Betano, bá iha postu saúde sira ne’e, tanba ita-nian pessoál saúde sira limitadu tebtebes, atu hodi hala’o atendimentu, karik, iha urjénsia ruma mak komunidade sira iha susar ruma iha sira-nian fatin, sé ita-nian doutór halai tiha bá maka iha ita-nian postu saúde sira ne’e ona. Entaun, labele halo atendimentu bá ita nian komunidade,” Xefe Suku Filipi de Araújo, hatán bá Hatutan.com iha Institutu Politékniku Betano (IPB), foin lalais.

Postu Saúde rua ne’ebé eziste iha Betano Villa mak hanesan, ida iha Aldeia Bee-metan, no ida seluk iha Aldeia Loro. Maibé, problema ne’ebé maka komunidade sira iha Aldeia Sesurai ho Aldeia Seli-Hasan, maka, atu bá de’it fasilidade saúde rua ne’e, distánsia dook tebtebes.

Ho situasaun ne’e, obrigadu komunidade sira tenke bá fali iha Postu Alas nian, tenke halai bá to’o iha Odau-Berek, no komunidade iha Aldeia Sesurai, tenke halai fali bá halo tratamentu saúde iha suku seluk, liu-liu bá Daisua, ne’ebé maka besik liu sira iha área ne’ebá.

“Kona-bá ita-nian pessoál saúde, tebes, limitadu tebes, ita iha parteira ida de’it, no ita iha doutóra ida, ne’ebé maka destaka iha postu saúde ida ne’e. ne’ebé, ho ita-nian komunidade ne’ebé mak barak tebtebes, dala-ruma atu halo atendimentu ne’e, susar bá sira atu halai bá mai,” Xefe Suku Betano ne’e tenik.

Ministra Saúde (MS), Élia  A.A dos Reis Amaral, konfirma katak, dadaun ne’e Ministériu Saúde liuhosi komisaun rekrutamentu no Diresaun Rekursu Umanus, halo hela rekrutamentu, no bainhira prosesu ida ne’e konklui ona, sei koloka pessoál sira ne’ebé rekrutadu bá postu saúde sira ne’ebé menus rekursu.

Hatán kona-bá bainhira mak MS sei halo kolokasaun pessoal saúde sira iha postu saúde ne’ebé menus tebes rekursu umanu hodi bele fó asisténsia saúde bá populasaun sira iha rurál, nia dehan, xefia sira diresaun rekursu umanus nian mak hatene, tanba sira mak halo mapeamentu oinsá koloka pessoál saúde sira bá postu saúde hotu.

Jornalista: Rogério Pereira Cárceres