Hatutan.com, (12 Fevereiru 2024), Díli- Reprezentante Santa Sé mai Timor-Leste, Mgr. Marco Sprizzi, lori Santa Sé nia naran hato’o apresiasaun bá Governu Timor-Leste ne’ebé halo preparasaun ho exelente atu simu vizita Papa Francisco.

Lee Mós: Konfirmadu, Tinan Ne’e Papa Francisco Vizita Timor-Leste

Xanana Gusmão Hasoru Papa Francisco iha Palásiu Apostóliku Santa Sé, Roma, iha loron 25 fulan-Agostu 2022. Foto/Dok. Media PR

Reprezentante Santa Sé mai Timor-Leste, Mgr. Marco Sprizzi bá jornalista sira iha Palásiu Prezidensiál Nicolau Lobato, Segunda (12/02/2024), infroma katak ninia hasoru-mal ho  Prezidente Repúblika José Ramos-Horta, atu atualiza mós kona-bá importánsia hosi vizita ne’ebé halo iha Vatikanu no Sorumutuk Xefe Estadu Timor-Leste nian ho Papa Francisco, foin lalais ne’e, iha Vatikanu.

“Ita-boot sira hatene no mundu tomak ko’alia kona-bá posibilidade vizita Papa Francisco mai Timor Leste, entaun ita seidauk bele konfirma data loloos tanba ida-ne’e sei anunsia husi Santa-Sé juntamente ho Governu Timor Leste, mais la’ós ona segredu maibé iha ona preparasaun bá posibilidade Papa Francisco nia vizita ne’ebé Timoroan hotu-hotu hein no presiza servisu maka’as,” Mgr. Marco Sprizzi hateten.

Advertisement

Tuir nia haree,  Governu Timorense halo hela preparasaun exelente no simu delegasaun hosi Vatikanu iha loron hirak liubá ne’ebé hela iha Timor loron tolu nia laran hodi halo observasaun bá fatin hotu-hotu ne’ebé durante vizita Papa Francisco nian sei bá, atu iha eventu hotu-hotu ne’ebé sei akontese iha vizita Papa Francisco nian ne’e povu Timorense hanesan konvidadu bele partisipa ho másimu.

Reprezentante Santa Sé mai Timor-Leste ne’e hatutan, Igreja halo ona reuniaun barak ho ekipa Governu nian, ho ministériu oin-oin ne’ebé lidera hosi Primeiru-Ministru no delegasaun husi Vatikanu apresia no orgullu ho servisu ne’ebé Governu Timor-Leste halo kona-bá preparasaun atu simu Papa Francisco nia vizita iha Timor-Leste.

Reprezentante Santa Sé mai Timor-Leste, Mgr. Marco Sprizzi hasoru-malu ho Prezidente Repúblika, José Ramnos-Horta iha Pálasiu Prezidésial, Segunda (12/02/2024). Foto/Elio dos Santos da Costa

“Ha’u hakarak agradese hodi Santa-Sé nia naran bá Estadu Timor-Leste, Prezidente Repúblika, Primeiru-Ministru, no ministériu hotu-hotu bá servisu sira kompetente, exelente no efisiente ne’ebé feitu nu’udár preparasaun ba eventu vizita Papa Francisco.” Nia tenik.

Vizita Santu padre Papa Francisco nian nu’udár vizita estadu mas prinsipál liu nu’udár vizita pastorál, hanesan pastor ne’ebé mai vizita nia povu no preokupasaun ne’ebé Santu padre Papa Francisco iha mak oinsá povu bele hasoru nia no nia bele hasoru povu.  

Iha país hanesan Timor-Leste no iha mundu tomak hakarak hasoru Papa Francisco inklui mós ho maun alin sira husi relijiaun seluk ne’ebé hakarak partisipa iha festa povu nian ne’e. Tan ne’e tenke garante seguransa, saúde, transporte no fatin ne’ebé dignu ho kondisaun dignu mós atu ema hotu bele partisipa ho di’ak iha eventu sira no misa ne’ebé Santu Padre mak sei prezide.

Preokupasaun seluk mak liga ho konsekuénsia sira tanba ne’e presiza organiza ho di’ak no efisiente para Papa Francisco bele iha espasu livre bá deskansa hodi rekupera enerjia atu bele iha sorumutuk sira ho forsa fízika, intelektual, nune’e bele ho másimu hasoru povu.

Advertisement

Nia fó sasin katak, Santu Padre Papa Francisco koñese besik liu povu Timor no iha domin boot bá Timoroan sira no bá nasaun ida-ne’e. Papa Francisco iha espetativa no ho ksolok prepara nia vizita.

Jornalista: Vito Salvadór

Advertisement