Hatutan.com, (19 Fevereiru 2024), Díli—Prezidente Repúblika (PR), José Ramos-Horta simu karta kredensiál hosi Embaixadór naun rezidentes 11, mai hosi nasaun Repúblika Arab Ejitu, Kanadá, Dinamarka, Repúblika Helenika (Grece), Repúblika Islamista Iran, Repúblika Islámika Pakistaun, Reinu Kamboza, Repúblika Demokratika Povu Laos, Repúblika Demokratika Povu Algeria, Repúblika Afrika Sul no Suesia.

Prezidente Repúblika (PR), José Ramos-Horta simu karta kredensiál hosi Embaixadór naun rezidentes 11, Segunda (19/02/2024). Foto: Elio dos Santos da Costa.

Aprezentasaun karta kredensiál hosi Embaixadór naun rezidente sira ne’e hanesan meiu bá kooperasaun bilaterál entre Timor-Leste ho nasaun sira, hodi haree oportunidade servisu hamutuk ba kooperasaun iha área oioin ne’ebé bele tulun dezenvolvimentu ekonómiku iha Timor-Leste.

Lee Mós: Prezidente Repúblika Simu Karta Kredensiál Hosi Nasaun 11

Prezidente Repúblika akompaña hosi Ministru Negósiu Estranjeiru no Kooperasaun (MNEK), Bendito dos Santos Freitas simu karta kredensiál hirak ne’e iha Palásiu Prezidensiál Nicolau Lobato Bairru-Pité, Segunda (19/02/2024).

Serimónia ne’e formaliza relasaun diplomátika entre Timor-Leste ho nasaun sira tuirmai ne’e: Repúblika Arab Ejitu, Kanada, Dinamarka, Repúblika Helenika (Grece), Repúblika Islamista Iran, Repúblika Islamika Pakistaun, Reinu Kamboja, Repúblika Demokratika Povu Laos, Repúblika Demokratika Povu Algeria, Repúblika Afrika Sul no Suesia.

Nu’udár Estadu soberanu independente, hametin amizade no kooperasaun iha nivel globál no rejionál ne’e imperativu ba Timor-Leste. Estabelesimentu kanál diplomátiku foun sira-ne’e loke dalan atu hasa’e kolaborasaun polítika, ekonómika, sosiál no kulturál ba benefísiu ba malu hosi nasaun hotu-hotu ne’ebé envolve.

Embaixadór naun-rezidente sira hosi nasaun sanulu-resin-ida ne’ebé aprezenta sira-nia kredensiál;

1. Yasser Hassan Farag Elshemy, Embaixadór Estraordináriu no Plenipotensiáriu Repúblika Arab Ejitu ne’ebé rezidénsia iha Jakarta – Indonesia;
2. Jess Dutton, Embaixadóra Estraordinária no Plenipotensiária Kanada nian ne’ebé rezidénsia iha Jakarta – Indonesia;
3. Sten Frimodt Nielsen, Embaixadór Estraordináriu no Plenipotensiariu Dinamarka, rezidénsia iha Jakarta – Indonesia;
4. Georgios Dogoritis, Embaixadór Estraordináriu no Plenipotensiáriu Repúblika Hellenic (Grece) ne’ebé rezidénsia iha Singapura;
5. Mohammad Boroujerdi, Embaixadór Estraordináriu no Plenipotensiáriu Repúblika Islamika Iran ne’ebé rezidénsia iha Jakarta – Indonesia;
6. Ameer Khurram Rathore, Embaixadór Estraordináriu no Plenipotensiáriu Repúblika Islamika Pakistaun ne’ebé rezidénsia iha Jakarta – Indonesia.
7. Tean Samnang, Embaixadór Estraordináriu no Plenipotensiáriu Reinu Kamboja nian ne’ebé rezidénsia iha Jakarta – Indonesia.
8. Khamfeuang Phanthaxay, Embaixadór Estraordináriu no Plenipotensiáriu Repúblika Demokratika Povu La’o ne’ebé rezidénsia iha Jakarta – Indonesia.
9. Nor Eddine Benfreha, Embaixadóra Estraordináriu no Plenipotensiáriu Repúblika Demokratika Povu Algeria ne’ebé rezidénsia iha Canberra – Australia.
10. Mpetjane Kgaogelo Lekgoro, Embaixadór Estraordináriu no Plenipotensiáriu Repúblika Afrika Sul ne’ebé rezidénsia iha Jakarta – Indonesia.
11. Daniel blockert, Embaixadór Estraordináriu no Plenipotensiáriu Suesia ne’ebé rezidénsia iha Jakarta – Indonesia.

Serimónia ne’e ko’alia liu kona-bá Timor-Leste nia perfíl internasionál ne’ebé aumenta no dezenvolvimentu relasaun diplomátika ho nasaun sira iha mundu tomak dezde restaura independénsia iha 2002.

Jornalista: Vito Salvadór