Hatutan.com, (20 Fevereiru 2024), Díli-Governu Fransa liuhosi nia Embaixada iha Timor-Leste iha tempu besik nia laran sei lansa projetu ida kona-bá oinsá fasilita formasaun lingua Fransés bá diplomata Timoroan sira iha Timor-Leste.

Lee Mós: Prezidente Repúblika Simu Karta Kredensiál Hosi Embaixadór Naun Rezidente 11

Kompromísiu ida ne’e hato’o hosi Embaixadór Fransa mai Timor-Leste, Laurent Legodec hafoin hasoru malu ho Primeiru-Ministru Kay Rala Xanana Gusmão iha Palásiu Governu, Díli, tersa (20/02/2024). Embaixadór Laurent, hato’o nia agradesementu ne’ebé uain tebes bá Primeiru-Ministru tanba disponibiliza ona tempu hodi hasoru malu ho nia ekipa sira.

Embaixadór Fransa mai Timor-Leste, Laurent Legodec. Foto/Elio dos Santos da Costa

“Ami ko’alia maizumenus oras ida no ha’u tenke dehan katak ida-ne’e fó fuan barak. Sempre di’ak atu iha diskusaun no koñesimentu balun ho ema sira ne’ebé iha esperiénsia boot kona-bá Asuntu nasionál no internasionál,” Embaixadór Laurent, hateten bá jornalista sira hafoin sorumutu ho PM Xanana iha Palásiu Governu, Díli, Tersa (20/02/2024).

Embaixadór Laurent ho Xefe Governu diskute mós kona-bá situasaun Timor-Leste nian ne’ebé sai hanesan prioridade bá dezenvolvimentu nasaun ne’e nian no diskute mós relasaun entre Fransa no Timor-Leste.

Hafoin aprezenta karta kredénsial bá Prezidente Repúblika, Ramos-Horta, iha Segunda (19/02/2024), Embaixadór Laurent hateten bá Prezidente  Repúblika katak, sira fiar metin bá dezenvolvimentu relasaun nian, tanba Fransa hafolin tebes parseria ne’ebé sira iha ho TL.

“Ami apoia sistema multilaterál ordén internasionál ne’ebé bazeia bá regra, nune’e ami fiar kontestu internasionál ida-ne’e ne’ebé agora dadaun iha tensaun uitoan ho problema barak, liu-liu ho funu agresaun ne’ebé Rúsia halo hasoru Ukrainia,” nia hateten.

Embaixadór Laurent haree katak, funu entre Rússia ho Ukrainia  hanesan situasaun ida ne’ebé komplikadu tebes mak ohin loron mundu enfrenta. Tanba ne’e, tuir nian, nasaun sira ne’ebé demokrátiku, presiza sai unidade no hamriik metin.

Embaixadór Fransa ne’e, hatutan, durante sorumutu ho PM Xanana, sira ko’alia kona-bá buat hotu ne’ebé País rua ne’e tenke halo hamutuk. Perspetiva sira-ne’e interesante tebes no promete tebes no iha Embaixada Fransa iha Timor-Leste.

“Ami hakarak atu marka prezensa no lansa projetu foun no ideia foun sira. Tán ne’e mak mensájen importante ne’ebé ami prontu atu apoia. Governu TL hatene katak nia bele konta bá ita de’it atu mai hasoru ita no ita sei koko atu ajuda fatin ne’ebé ita bele,” Embaixadór Laurent, afirma tán.

To’o oras ne’e, Governu Fransa liuhosi sira-nian embaixada iha TL koko atu fó apoiu iha área espesífiku balun ne’ebé konsidera importante tebes bá dezenvolvimentu nasaun nian. Pore-zemplu, Fransa iha projetu balun atu fó formasaun bá funsionáriu públiku sira, liu-liu feto sira ne’ebé Fransa haree hanesan orgullu, sira mós dezenvolve projetu balun iha área agro-ekonómia nian nune’e mós agro-ekolójia iha jestaun Rekursu Bee,” nia esplika.

Fransa hakarak tulun atu suporta diversifikasaun ekonómia nasaun nian no karik lori espesializasaun téknika balun, hanesan ezemplu, dezenvolvimentu atividade portu nian hatene ona Portu Tibar ne’e harii no opera ona hosi kompañia Fransa.

Jornalista: Rogério Pereira Cárceres