Hatutan.com, (21 Fevereiru 2024), Díli-Prezidente Partidu Demokrátiku (PD) atuál Vise-Primeiru Ministru, Ministru Asuntu Sosiál no Ministru Dezenvolvimentu Rurál ho Abitasaun Komunitáriu, Mariano Asanami Sabino, afirma katak nia la iha kompeténsia atu halo intervensaun bá  desizaun Prezidente Repúblika nian hodi ezonera Antóni da Conçeição  “Kalohan” hosi kargu Embaixadór Timor-Leste nian bá Republika Indonézia.

Lee Mós: Prezidente Repúblika Ezonera António da Conceição hosi Kargu Embaixadór TL bá RI

“Prontu ne’e prezidente Repúblika nia podér, ha’u la interven bá ne’ebá. Ohin, ha’u mai Parlamentu Nasionál hanesan Vise-Primeiru Ministru, Ministru Asuntu Sosiál no Ministru Dezenvolvimentu Rurál ho Abitasaun Komunitáriu. Buat hotu, ida-idak iha nia podér nia Konstituisaun fó dalan, fó fatin, fó podér fó bá instituisaun ida-idak atu bele asume nia responsabilidade,” Mariano Asanami Sabino haktuir hodi responde jornalista sira iha PN, Kuarta (21/02/2024).

Prezidente Repúblika (PR), José Ramos-Horta konversa ho Prezidente Partidu Demokrátiku (PD), Mariano Asanami Sabino iha ámbitu serimónia aniversaériu PD ba dala 22 iha sede nasionál Colmera, Sábadu, (10/06/2023). Foto/Dok.

Prezidente Repúblika (PR), José Ramos-Horta liu hosi Dekretu Prezidente Repúblika númeru 14/2024, loron 13 fulan-Fevereiru 2024, deside ezenora  Sekretárou Jerál Partidu Demokrátiku (PD) António da Conceição  “Kalohan” hosi nia kargu hanesan Embaixadór Estraordináriu Plenipotensiáriu Repúblika Demokrátika Timor-Leste (RDTL) bá Repúblika Indonézia (RI).

 Iha Dekretu Prezidensiál ne’ebé Hatutan.com asesu, Tersa (20/02/2024), mensiona desizaun Prezidente Repúblika nian baze kompeténsia Prezidente Repúblika nian ne’ebé konsagra iha Konstituisaun Repúblika Demokrátika Timor-Leste (KRDTL) iha área relasaun internasionál, atu nomeia no ezonera embaixadór, reprezentante permanente no enviadu estraordináriu, tuir proposta Governu nian, ne’ebé prevee iha artigu 87, alinea b).

Antes ne’e, António da Conceição simu pose hanesan Embaixadór Timor-Leste bá Repúblika Indonézia hosi Prezidente Repúblika José Ramos-Horta iha loron 12 fulan-Dezembru 2023 ho mandatu tinan tolu tuir konstituisaun haruka.

Prizaun Tinan-lima

Sekretáriu Jerál PD, António da Conceição Kalohan. Foto/Dok.Hatutan.com.

Tribunál Judisiál Primeira Instánsia Díli (TJPID) liuhosi desizaun ikus iha Segunda 08 Janeiru tinan ne’e, kondena arguidu António da Conceição “Kalohan” ho arguidu Apolinario dos Santos Assunção bá tinan lima kadeia, tanba konsidera akuzasaun sira antes ne’e hosi Ministériu Públiku (MP) maioria provadu no iha prossesu judisiál ida-ne’e, Tribunál absolve arguidu Domingos Gouveia bá kazu produsaun masin iha área Atabae munisípiu Bobonaro.

Juiz deklara iha julgamentu ikus katak, iha altura ne’ebá arguidu António “Kalohan” hanesan Ministru ida, loloos hatene ninia obrigasaun atu halo tuir rejíme konkursu ne’ebé iha maibé nia parte la halo ida-ne’e.

Arguidu Apolinário iha tempu ne’ebá mós hanesan Vise Koordenadór, maibé la hala’o nia kna’ar ho di’ak hodi fó de’it benefísiu bá kompañia ne’e. Tanba ne’e, Tribunál liuhosi Juiz kolektivu laiha dúvidas no konsidera katak, akuzasaun ne’ebé mai hosi MP provadu.

Ho ida-ne’e maka ikus mai Juiz kolektivu ne’e deside hodi aplika prizaun efetivu tinan-lima (5) bá arguidu António da Conceição no prizaun efetivu tinan-haat (4) bá arguidu Apolinário dos Santos Assunção.

Nune’e mós arguidu Domingos Gouveia hanesan kompañia na’in, Tribunál absolve hosi krime maibé Tribunál kondena bá iha indemizasaun ho osan montante globál $17,587.72 (rihun sanulu resin hitu, dolar atus lima walu nulu resin hitu no sentavu hitu nulu resin rua dolar amerikanu).

Prosesu ne’e prezide hosi juiz kolektivu, Ivan Suritai, Ana Paula, Ersília de Jesus no Ministériu Públiku, reprezenta hosi prokuradoria Lidia Soares, arguidu hetan asisténsia legál hosi Advogadu Privadu Pedro Camões no Defensór Públiku, Marçal Mascarinhas.

Jornalista Estajiária: Zita Menezes