Hatutan.com, (22 Fevereiru 2024), Díli—Ekipa konjunta kompostu Polisia Nasionál Timor-Leste (PNTL), Departamentu Investigasaun Kriminál (DIK) Nasionál ho Ministériu Saúde (MS), Diresaun Nasionál bá Farmásia no Medikamentus (DNFM), liuhosi atividade buska no inspesaun, konsege identifika ai-moruk hamutuk item neen (6) mak deskonfia fa’an ilegálmente iha farmásia Moris-Foun, Colmera, Díli.

Prossesu buska no identifikasaun ai-moruk sira iha Farmásia Moris-Foun, Colmera, Dili, Kinta (22/02/2024). Foto: Elio dos Santos da Costa.

Ai-moruk item 6 ne’ebé deskonfia durante ne’e na’in bá Farmásia Moris-Foun fa’an ho ilegalmente, tanba la rejísta iha dadus Ministériu Saúde nian.

Lee Mós: Stoke Out Ai-Moruk Tanba Kompañia 22 Ne’ebé MS Kontrata iha 2022 La Fornese Ai-Moruk To’o Agora

Tipu ai-moruk items 6 ne’e mak hanesan, Catopher ho kuantidade 25 mg (miligrama), Pantoges, Mizolf Faginal, Acce Trix MF, Otsu MF 0,90%, no ikus liu maka Dextroce ho 40 mg (miligrama).

“Ita identifika katak, iha ai-moruk ka produtu medikamentus items 6 mak kompañia seidauk hetan autorizasaun hosi MS. Tanba ne’e, bandu atu halo importasaun no labele mós fa’an,” fontes konfirmadu ida ne’ebé lakohi temi nia identidade, informa bá Hatutan.com durante akompaña prossesu buska no identifikasaun ai-moruk sira iha Farmásia Moris-Foun, Colmera, Dili, Kinta (22/02/2024).

Polisia monta hela Police line iha Farmásia Moris-Foun, Colmera, Dili, Kinta (22/02/2024). Foto: Elio dos Santos da Costa.

Hafoin halo buska no inspesaun iha Farmásia Moris-Foun, ekipa konjunta kontinua bá halo identifikasaun no verifikasaun ai-moruk items 150 ne’ebé mak durante ne’e assegura iha armajen ai-moruk farmásia ne’e nian iha área Vila-verde. Rezultadu identifikasaun, detekta katak, maioria ai-moruk rejistadu.

Maibé, farmásia ne’e ninia fatin armajenamentu bá ai-moruk nian ne’ebé lokalizadu iha área Vila-verde ne’e, la tama mós iha baze dadus DNFM, ministériu saúde nian. Signifika, armajenamentu ai-moruk ida daudaun ne’e, ilegál, tanba la hetan rejístu.

“Fatin ida agora dadaun ita mai ne’e, laiha koñesimentu no laiha autorizasaun, laiha lisensa hosi gabinete lisensiamentu ministériu saúde, autoridade ministériu saúde. Loos duni, fó ninia lisensa, mais, lisensa iha ne’ebá Moris-Foun, Colmera. Ida ne’e ita la hatene, naran saida, ita mós la hatene, tanba la rejistu,” fontes konfirmadu ne’e tenik.

Fonte ne’ebé hanesan mós funsionáriu iha MS ne’e, konfirma katak, loloos ne’e atu armajen sasán sira ne’e presiza hetan lisensa.

Tanba ne’e, bainhira empreza na’in sira bá fa’an ai-moruk maka komete violasaun sira hanesan ne’e, entaun prátiku autorizasaun lisenseamentu saúde nian ne’ebé MS tenke halo maka, primeiru iha meius kontrolu, hodi garante efikánsia, seguransa ho produtus sira farmaseutika no medikamentu, nune’e labele fó ameasa bá saúde públika.

Ho ministériu nia papél ida ne’e maka hamosu prátika ida katak, atividade presiza hetan lisensa. Mais, lisensa ne’e fó, bainhira nia priénxe ona rekezitu hamutuk 21, priénxe administrattivamente no terrenu.

Segundu, bainhira nia hetan lisensa, automatikamente, nia importa ona, ka armajena ona no distribui ona, fa’an ona ai-moruk, la’e. Maibé, presiza atu halo uluk tiha rejistu, hafoin bele konsidera katak, produtu sira ne’e legál, no bele ona importa, distribui ka sirkula iha rai-laran.

Detein Suspeitu Na’in-tolu

Liga ho dekonfiansa sira kona-bá na’in bá Farmásia Moris-Foun ne’ebé importa no fa’an ai-moruk ilegál, maka iha kuarta (21/02/2024), horseik, maizumenus tuku 15:00, oras lorokraik, PNTL liuhosi ekipa Departamentu Investigasaun Kriminál Nasionál, ezekuta mandadu rua hosi Tribunál Judisial Primeira Instánsia Dili (TJPID), mak hanesan “Mandado de Detenção (mandadu detensaun), no Mandado de Busca Domicíliária e Apreensão (Mandadu bá Buska Iha Domisíliu no Prende Sasán)”.

Hosi mandadu rua ne’e ho Númeru Úniku Kríme (NUK) 0350/23.PNSIC, hodi fó orientasaun bá Ekipa Departamentu Investigasaun Kriminál Nasionál, atu buka tuir kedan arguidu na’in-tolu, kompostu feto Timoroan ida, ho naran inisial HdC (hanesan Farmasista), no mane na’in-rua hosi Repúblika Indonézia, ho nisial DI (Diretor), JP (Jerente Operasional) iha Klínika Moris Foun.

Kríme ne’ebé promove bá Arguidu sira ninia aktu ne’e mak hanesan, Kríme Fraude Fiskál, Importasaun Ilisitas bém Merkadória, Kontra bandu, ne’ebé mak temi iha Lei Kódigu Penál Timor-Leste, Artigu 314, 315, 316, 317, 303, no 304.

Hafoin kapturasaun, autoridade polisial sira transporta kedan Arguidu sira halo identikasaun no investigasaun iha DIK Nasionál, Kuartel Jerál, PNTL, Caicoli-Dili, no hosi prosesu ida ne’e, detein kedas Arguidu sira iha Sela Detensaun Komandu Munisipiu Dili, durante oras 72, molok, sexta, 23 fevereiru 2024, aban, submete bá Prosesu Primeiru Interrogatóriu Judisial iha Tribunál, Dili, hodi rona desizaun finál hosi Juiz sira.

Informasaun seluk ne’ebé Hatutan.com asesu hosi ekipa investigadór sira DIK nian katak, iha tuku 14:00, oras lorokraik ne’e, ekipa konjunta sei kontinua halo buska no inspesaun bá Ai-moruk hamutuk kontentór tolu ne’ebé oras ne’e estasiona ka para hela iha Portu Tibar.

Jornalista: Rogério Pereira Cárceres