Hatutan.com, (22 Fevereiru 2024), Díli—Primeiru-Ministru (PM), Kay Rala Xanana Gusmão seidauk iha informasaun kona-bá Sekretaria Estadu Komunikasaun Sosiál (SEKOMS) “hatama” de’it funsionáriu kazuál 109 laliu hosi rekrutamentu normal tuir regra funsaun públiku nian.

Lee Mós: SEKOMS “Hatama” Funsionáriu Kazuál 109

Primeiru-Ministru (PM), Kay Rala Xanana Gusmão. Foto/Elio dos Santos da Costa

“Funsionáriu kazuál  hatudu provas, ami sei hato’o bá sira. Ha’u labele hatene buat hotu-hotu iha mundu ne’e, imi komu imprensa imi hatudu, see mak hatama ona kazuál atus resin ona,” Primeiru-Ministru Xanana Gusmão hateten hodi responde jornalista sira hafoin hasoru malu ho Prezidente Repúblika, José Ramos-Horta iha Palásiu Prezidensiál, Díli, Kinta (22/02/2024).

Xanana afirma problema mak regra atu bá tama nu’udár funsionáriu kazuál ka kontratadu tenke tuir regra, la’ós hatama de’it no Governu ida-ne’e tama funsionáriu kazuál ne’e miliar  no iha Gabinete Primeiru-Ministru rasik “ha’u husu imi halo saida,  sira hatán dehan la hatene no bolu mai atu funsionáriu iha ne’e.”

“Iha Marsu to’o Abríl ha’u sei la’o mak haree iha Ministériu balun ne’ebé la kumpre nia programa sei hasai governante ne’e tanba nia la serve atu ukun, tanba mai atu serbí la’ós mai atu hetan priviléjiu no la’o ho karreta estadu no iha tan seguransa,” Xanana afirma.

Sekretaria Estadu Komunikasaun Sosiál (SEKOMS), iha semana hirak liubá, hatama ka bolu ema na’in-109 hodi sai hanesan funsionáriu kazuál no  destaka iha diresaun  sira ne’ebé tutela bá SEKOMS.

SEKOMS rasik iha diresaun tolu; kompostu hosi Sentru Rádiu Komunidade (CRC, sigla portugés), Diresaun Nasionál bá Diseminasaun Informasaun (DNDI) ho Sentru Formasaun Téknika iha Komunikasaun (CEFTEC, sigla portugés).

Dadus ne’ebé iha agora funsionáriu kazuál sira  ne’e na’in-50 destaka iha Sentru Rádiu Komunidade (CRC, sigla portugés), balun iha  Diresaun Nasionál bá Diseminasaun Informasaun (DNDI), balun fali iha Sentru Formasaun Téknika iha Komunikasaun (CEFTEC, sigla portugés) inklui balun iha Gabinete SEKOMS.

Informasaun ne’ebé Hatutan.com rekolla hosi fontes sira iha diresaun balun iha SEKOMS nia mahan katak, funsionáriu kazuál sira ne’e hahú aprezenta an bá diresaun sira ho de’it memo  ida, iha hirak liubá, katak nia hetan kolokasaun mai servisu iha diresaun refere. Maibé, sira rasik la hatene servisu saida mak sira halo tanba prosesu ne’e laliu hosi rekrutamentu normal no  sira rasik laiha termu referénsia servisu (TOR) nian.

Molok ne’e, iha Segunda 19 fulan-Fevereiru 2024,  Sekretáriu Estadu Komunikasaun Sosiál (SEKOMS), Expedito Dias Ximenes ho Xefe Gabinete SEKOMS, Eliseu Isaac Veloso, klarifika katak prosesu bá funsionáriu kazuál na’in-109 ne’e hanesan rekrutamentu internál tuir politika IX Governu Konstitusionál nian no prosesu rekrutamentu rasik kumpre bá rekizitu sira Funsaun Publika nian.  Make nune’e, informasaun ne’ebé iha katak, funsionáriu kazuál sira ne’e “bolu” de’it no la liuhosi rekrutamentu normal tanba la halo anúnsiu públiku iha mídia, inklui la halo anúnsiu públiku iha portál SEKOMS nian rasik.  

Fontes balun iha gabinete SEKOMS informa mós katak prosesu “hatama” funsionáriu kazuál 109 ne’e hanesan faze primeiru no tuir planu sei iha faze segundu ne’ebé sei hatama ka bolu tan ema na’in-40.   

Atualiza Servisu Governu bá Ramos-Horta

Iha sorumutuk semanál ho Prezidente Repúblika, Kinta (22/02/2024),  Primeiru-Ministru Kay Rala Xanana Gusmão,  informa kona-ba servisu sira IX Governu Konstitusionál nian bá dezenvolvimentu nasionál Timor-Leste nian.

“Prezidente Repúblika mós husu bainhira ami rua enkontru iha kada semana kona-bá servisu governu nian, programa sira no ministériu sira servisu bá ezekuta programa governu nian oin nusa no ha’u informa katak la’o neineik, maibé beibeik tanba di’ak liu neineik duké lalais maibé gasta de’it osan estadu no iha orsamentu sira kahur bá mai no sala hela de’it,” Xanana hateten.

Xefe Governu h informa mós ba Xefe Estadu enkontru sira ne’ebé halo ho embaixadór sira dezde loron hirak liu ba to’o horisehik no Embaixadór sira hotu-hotu iha konfiansa bá situasaun atuál Timor Leste nian.

Embaixadór sira mós oferese área ne’ebé de’it mak Timor Leste presiza no sira bele kontribui no sei haruka ba ministériu sira hotu-hotu liu-liu iha área sira ne’ebé Embaixadór sira dehan bele oferese hodi kontribui bá dezenvolvimentu nasionál Timor Leste nian.

Embaixadór sira ne’e barak hakarak kontribui iha área agrikultura, indústria, edukasaun, saúde, formasaun rekursu umanu no oi-oin ne’ebé Timor Leste presiza. Tan ne’e sente katak sira mai ho kompromisu no vontade atu apoiu.

Jornalista: Vito Salvadór