Hatutan.com, (24 Fevereiru 2024), Díli- Prezidente Repúblika (PR), José Ramos-Horta, halo viajen bá Emiradu Arabes Unidus (EAU) hodi partisipa iha asinatura tratadu fornalizasaun Timor-Leste nian bá Organizasaun Mundiál Komérsiu (OMK) no kontinua vizita estadu dahuluk ba Laos hodi hametin liután kooperasaun bilaterál entre país amigu rua.
Lee Mós: Xanana Agradese Ngozi Okonjo-Iweala Ne’ebé Aseita TL Sai Membru OMK
Prezidente Repúblika (PR), José Ramos-Horta. Foto/Elio dos Santos da Costa.
Komunikadu Imprensa ne’ebé Hatutan.com asesu hosi Gabinete Média Palásiu Prezidensiál, Sábadu (24/02/2024), informa Prezidente Repúblika José Ramos-Horta, hahú ona viajen bá Emiradu Arabes Unidus (EAU) no Repúblika Demokrátika Povu Laos husi loron 24 fulan-Fevereiru to’o loron 03 fulan-Marsu 2024.
Durante iha EUA, liu-liu iha sidade Abu Dhabi, Prezidente José Ramos-Horta hamutuk ho delegasaun Timor-Leste nian sei asina tratadu formaliza Timor-Leste nia adezaun ba Organizasaun Mundiál Komérsiu (OMK) iha Konferénsia Ministerial bá da-XIII OMK nian.
Iha loron 26 fulan-Fevereiru, tinan ne’e, sei iha konferénsia inter ministeriál no iha ne’e mak sei aprova Timor-Leste nia adezaun tuir kedan ho serimónia asinatura.
Iha Abu Dhabi Prezidente Repúblika José Ramos-Horta sei ko’alia liután kona-bá kompromisu Timor-Leste nian atu utiliza estatutu membru OMK nian hodi hadi’a infraestrutura, kapitál umanu no kapasidade administrativa hodi aselera kreximentu no diversifikasaun ekonómiku.
Aprende hosi esperiénsia Membru Pais Menus Dezenvolvidu sira seluk, Timor-Leste fiar metin katak Timor-Leste nia adezaun sei lori reformasaun ekonómika no serbí tuir Timor-Leste kompromisu atu kria kuadru ida-ne’ebé sistemátiku bazeia bá regra sira.
Ramos-Horta hateten, sai membru OMK nian marka pasu boot ida bá Timor-Leste hodi liberaliza komérsiu, integra an iha ekonomia globál, no fasilita asesu bá merkadu internasionál sira.
Prezidente Repúblika Timor-Leste ne’e husu bá OMK atu kontinua fó asisténsia téknika no kapasitasaun hafoin adezaun hodi permite reformasaun sira ne’ebé aliña ho prinsípiu OMK nian.
Prezidente José Ramos-Horta sei fó prémiu bá Diretór Jerál OMK, Ngozi Okonjo-Iweala áa nia apoiu durante prosesu adezaun Timor-Leste nian.
Hafoin konferénsia ne’e, Prezidente Ramos-Horta sei halo vizita estadu istórika dahuluk nian ba Laos husi loron 27 fulan-fevereiru to’o loron 2 fulan-Marsu 2024.
Prezidente sei hala’o sorumutuk bilaterál ho lider Laos sira, inklui Prezidente Thongloun Sisoulith no Primeiru-Ministru Sonexay Sipjandone, hodi hametin liután parseria no relasaun bilaterál entre Timor-Leste no Laos ne’ebé estabelese ona dezde 2002.
“Timor-Leste apresia tebes Laos nia apoiu ne’ebé konsistente bá ami-nia kandidatura sai membru ASEAN no objetivu hodi hetan informasaun huoi lideransa Laos ne’ebé esperiénsia barak nu’udár Prezidente ASEAN 2024,” Xefe Estadu Timor-Leste haktuir iha komunikadu ne’e.
Timor-Leste iha tempu ne’ebé hanesan negosia hela adezaun atu sai membru ASEAN, reforsa nia kompromisu ba integrasaun ekonómika rejionál no globál tuir enkuadramentu bazeia ba regra ba dezenvolvimentu sustentavel.
Prezidente Repúblika José Ramos-Horta hein atu reforsa kooperasaun iha setór hotu-hotu durante vizita istórika dahuluk estadu nian ida-ne’e, hodi reforsa relasaun fraterna entre Timor-Leste no Laos.
Jornalista: Vito Salvadór