Hatutan.com, (27 Fevereiru 2024), Díli– Reprezentante povu iha Parlamentu Nasionál (PN) hosi Bankada KHUNTO, Luis Roberto preokupa ho situasaun família uma-kain 107 Aldeia Raiema, Suku Dukurai,  Postu Administrativu Letefoho Vila, Munisípiu Ermera, to’o agora seidauk asesu eletrisidade.

Tékniku EDTL,E.P hadi’a liña distribuisaun eletrisidade. Foto/Dok.Hatutan.com

“Maluk sira ita restaura ita-nia ukun aan ne’e tinan 20-liu ona, maibé to’o agora iha fatin balun,  hanesan iha Aldeia Rairema, Suku Dukurai, Letefoho, Ermera, seidauk asesu bá eletrisidade,” Deputadu Luis Roberto haktuir iha nia intervensaun iha plenária PN, Tersa (27/02/2024).

Iha fatin hanesan membru PN hosi Bankada PLP, Abel dos Santos mós hato’o preokupasaun komunidade hosi Postu Administrativu Turiskai ne’ebé seidauk asesu mós  eletrisidade.

“Ha’u simu informasaun ida hosi ita-nia komunidade iha Postu Administrativu Turiskai liuliu bá preokupasaun ne’ebé maka kona-bá agora daudaun iha kompañia balu ne’ebé maka halo hela projetu eletrisidade katak obra ne’e to’o ona iha 99% hein para atu lakan de’it on,a maibé ita-nia komunidade uma-kain hitu (7) hosi husi Suku Orana ne’ebé maka baliza ho Suku Fahinihan Fatuberlio, to’o agora ne’e sira só hetan maka ai-riin eletrisidade nian de’it, maibé instalasaun eletrisidade bá sira-nia uma laiha,” Deputadu Abel dos Santos haktuir iha plenária PN.

Vise-Ministru asuntu Parlamentár Áderito da Costa Hugo, hateten bá kestaun eletrisidade baliza entre Turiskai ho Fatuberlio, Suku Orana no Suku Fahinihan sei envia bá Sekretáriu Estadu Eletrisidade Timor-Leste.

“Espera EDTL,I.P bele rezolve kestaun ida-ne’e. Politika bá orsamentu Jerál Estadu (OJE) 2024 nian IX Governu kompremete ona katak iha tinan ida-ne’e nia aloká ona orsamentu atu rezolve tiha mais populasaun  20% ne’ebé iha teritóriu nasionál maka seidauk asesu bá eletrisidade,” Vise-Ministru asuntu parlamentár Áderito da Costa Hugo haktuir  iha plenária PN hodi responde preokupasaun ne’ebé levanta hosi Deputadu Luis Roberto ho Deputadu Abel dos Santos.

Jornalista Estajiária: Zita Menezes