Hatutan,com, (28 Fevereiru 2024), Abu Dhabi—Kafé Timor-Leste (TL) morin iha Abu Dhabi iha ámbitu konferénsia Ministeriál Organizasaun Mundiál Komérsiu (OMK) bá dala-13, ne’ebé hala’o iha Sentru Espozisaun Nasionál Abu Dhabi (ADNEC), Emiradus Arabes Unidus (EAU), hahú hosi 26 to’o 29 fulan-fevereiru 2024, ne’ebé halibur Estadu membru sira hosi nasaun 166 no ema hamutuk 6.000-resin mak partisipa.

Stand Kafé Timor iha Sentru Espozisaun Nasionál Abu Dhabi (ADNEC), Emiradus Arabes Unidus (EAU), Kuarta (27/02/2024). Foto: Rogério Pereira Cárceres.

Eventu internasionál ida-ne’e, país barak mós hatudu sira-ninia produtu oioin iha fatin sira espozisaun nian no Timor-Leste mós hatudu ninia prudutu kafé Timor nian.

Lee Mós: Estadus Unidus Kongratula Timor-Leste Nia Adezaun bá OMK

Observasaun Hatutan.com nian iha fatin expozisaun nian hatudu katak, maioria Estadu membru sira OMK nian ne’ebé mak partisipa iha eventu altu nível ne’e, hakbesik bá stand TL nian hodi koko no hemu kafé Timor nia.

Sidadaun Emiradu Ali Mohammad ne’ebé hanesan mós jornalista, koko hemu kafé Timor-Leste nian no sente katak kafé gostu liu no di’ak tebes, tanba kafé ne’ebé orgániku duni.

Jornalista Hatutan.com Rogerio Carceres halao entrevista ba sidadaun Emiradu Ali Mohammad ne’ebé hanesan mós jornalista bainhira koko kafe Timor iha Abu Dhabi.

“Oh, kafé Timor ne’e gostu no di’ak tebes. Foin primeira-vez mak ha’u koko. Ha’u gosta tebes,” Ali Mohammad hateten bá Hatutan.com, hafoin koko kafé Timor iha Sentru Espozisaun Nasionál Abu Dhabi (ADNEC), Emiradus Arabes Unidus (EAU), Kuarta (27/02/2024).

“Ha’u hanoin katak kafé ne’e la iha kímiku. Kafé ne’ebé morin tebes, orijinál no ha’u hakarak hola,” nia tenik.

Iha fatin hanesan, Profesór ida hosi Universidade Estadus Unidus Amérika (EUA) ho naran Dan SD, sente  kontente tebes iha Abu Dhabi hodi partisipa iha konferénsia ministeriál OMK nian no kontente tebes hodi selebra Timor-Leste tama ona bá OMK.

Profesór ida hosi Universidade Estadus Unidus Amérika (EUA) ho naran Dan SD koko kafe Timor iha Abu Dhabi.

“Timor tama ona OMK iha loron ikus ida-ne’e. Ha’u kontente tebes tanba hetan kafé ne’e. Klaru katak iha eskala mundiál iha kualidade,” Dan SD hateten.

Dan SD introdús nia aan katak, nia hanesan profesór ida iha Universidade Yale halo serbisu barak kona-bá asuntu komérsiu no movimentu Sistema Komérsiu nian bá futuru sustentável.

Sidadaun Beljianu ida ho naran Eric ne’ebé hemu mós kafé Timor hateten, nia koko kafé demoralista bá dadeer-san no nia hanoin katak ida-ne’e furak tebes.

“Di’ak tebes, bonita no forte. Entaun, ha’u gosta ekipa ne’e. Ha’u koko kafé, ne’e loos duni, di’ak loos no gostu loos. Ha’u gosta liu mak nia morin. Obrigadu barak,” nia hateten ho orgullu.

Barrista Timoroan, Domingos da Costa Freitas ne’eb’e durante ne’e tuur hein kafé iha Sentru Espozisaun Nasionál Abu Dhabi (ADNEC) informa, nia prezensa iha Abu Dhabi tanba grupu sira mak eskolla nia hodi reprezenta grupu kafé sira atu halo promosaun bá kafé Timor.

Durante halo promosaun bá kafé Timor hosi loron 25 to’o 27 fevereiru ne’e, nasaun membru OMK sira barak mak hakbesik bá stand Timor-Leste nian, hodi koko hemu kafé Timor nian.

“Ema barak gosta loos Kafe Timor, tanba ita-nia kafé ne’e úniku duni, la hanesan ho kafé sira hosi nasaun seluk nian. Bainhira sira mai koko kafé Timor sira senti hanesan gosta tebes no sira husu bebeik sira hakarak hetan kafé Timor iha Uniaun Emiradus Arábe ka lae. Ha’u koko esplika bá sira katak, ami seidauk bele halo exportasaun mai nasaun ne’e tanba seidauk iha kooperasaun, maibé ami espera katak bá futuru, ami sei bele importa kafé mai iha Abu Dhabi,” Domingos da Costa Freitas hateten.

Nia dehan, ema sira ne’ebé partisipa iha eventu boot ne’e hakarak atu sosa kafé Timor, maibé tanba de’it ekipa ne’e mai atu halo de’it mak promosaun bá kafé Timor rasik, entaun ekipa oferese gratuita de’it bá sira.

Tuir nia, kada loron ema besik 200 (atus-rua) mak hakbesik an bá TL nia stand, hodi hemu koko kafé Timor.

Jornalista: Rogério Pereira Cárceres