Hatutan.com, (01 Marsu 2024), Díli– Kondenadu kazu abuzu poder, korrupsaun no partisipasaun ekonomia, António da Conceição “Kalohan”, submete karta bá xefe Bankada Partidu Demokrátiku (PD) hodi husu atu asume fali knaar nu’udár membru  Parlamentu Nasionál. 

Lee Mós: Prezidente Repúblika Ezonera António da Conceição hosi Kargu Embaixadór TL bá RI

António Conceição “Kalohan”. Foto/Espesiál

“Liuhosi biban ida-ne’e ha’u mai informa katak ha’u deside fila-fali  bá Parlamentu Nasionál, hodi hala’o ha’u nia knaar nu’udár deputadu VI Lejislatura períodu 2023-2028, iha loron 4 fulan-Marsu 2024,” sita karta ofisial António da Conceição “Kalohan” bá Xefe Bankada PD iha PN ne’ebé ho data 29 Fevereiru 2024.

Razaun António da Conceição “Kalohan” fila-fali bá nia knaar hanesan deputadu no reprezentante povu nian iha PN tanba misaun deiplomatiku ne’ebé nia simu nu’udár embaixadór Timor-Leste bá Indonézia hodi simu pose iha loron 12 fulan-Dezembru 2023 laiha kontinuidade.

“Ha’u hetan ona ezonerasaun hosi Prezidente Repúblika, José Ramos-Horta, tanba ne’e laiha inkompatibilidade atu ha’u bá ezerse fali ha’u nian mandatu nu’udár deputadu,” António “Kalohan” hateten iha nia karta ne’e.

Liuhosi karta ne’e, António da Conceição “Kalohan” mós agradese bá deputada Rosena Martins ne’ebé hatudu nia disponibilidade hodi asume ona funsaun temporáriu hahú hosi loron 12 fulan-Dezembru 2023 to’o iha loron 01 fulan-Marsu 2024. Nune’e, António “Kalohan” husu atu Xefe Bankada PD  hato’o pedidu  bá Presidente Parlamentu Nasionál (PPN), Maria Fernanda Lay hodi anunsia ninian inísiu bá funsaun nu’udár deputadu Bankada Partidu Demokratiku nian hahú iha loron 04 fulan-Marsu 2024.

Jornalista Estajiária : Zita Menezes