Hatutan.com, (11 Marsu 2024), Díli—Prezidente Repúblika (PR), José Ramos-Horta partilla ho Vise-Sekretária Estadu Adjuntu Assuntu Aziátiku no Pasifiku Leste Departementu Estadus Unidus Amérika (EUA), Melissa Bron, kona-bá assuntu internasionál no rejionál liga bá konflitu iha Myanmar.

Vise-Sekretária Estadu Adjuntu Assuntu Aziátiku no Pasifiku Leste Departementu Estadus Unidus Amérika (EUA), Melissa Bron. Foto: Elio dos Santos da Costa.

Hafoin enkontru, Melissa Bron hateten, ohin hetan previléjiu hodi hala’o sorumutu ho Prezidente Repúblika José Ramos-Horta ne’ebé ko’alia kona-bá relasaun bilaterál entre Timor-Leste ho Estadus Unidus Amérika, liu-liu kona-bá saida mak Estadu rua halo tiha ona no saida tan mak sei halo iha futuru.

Lee Mós: Governu-Embaixada EUA Lansa Distribuisaun Ai-han bá Eskola Iha Munisípiu Haat

“Ami mai iha ne’e atu diskute ho ita bo’ot sira nia Prezidente atu fahe ho ami nia sabedoria no koñesimentu kona-bá assuntu internasionál no rejionál liga ba konflitu sira iha Myanmar,” Melissa Bron hateten iha Palásiu Prezidensiál Nicolau Lobato Bairru-Pité, Segunda (11/03/2024).

Durante sorumutu ne’e,  nia dehan, ko’alia mós kona-ba Estadus Unidus Amérika nia programa ida ba iha área dezenvolvimentu ekonómiku.

“Prezidente fó esplikasaun katak programa dezenvolvimentu ekonómiku ne’e útil tebes no presiza kontinua hodi partilla liu tán iha futuru,” nia dehan.

Prezidente Repúblika kompartilla nia koñesimentu bá asuntu rejionál no globál sira no EUA mós komprometidu atu kontinua kontribui ba pas, prosperiwdade no seguransa iha indo-pasífiku.

Jornalista: Vito Salvadór