Hatutan.com, (20 Marsu 2024), Díli—Governu Timor-Leste (TL) kontinua ho pasiénsia simu realidade rede internet ne’ebé lentu tebes to’o ohin loron no operadór telekomunikasaun sira mós la iha solusaun ruma.

Rede internet kontinua sai preokupasaun bá kliente sira. Foto: Internet lentu.

Ministru Transporte no Komunikasaun (MTK), Miguel Marques Manetelo hateten, realidade mak ida ne’e duni maski Ministru rasik mós ko’alia bebeik ona asuntu ne’e no dala-ruma públiku baruk atu rona.

Lee Mós: Problema Internet, Prezidente ANC “Laiha Tempu” Atu Klarifika bá Públiku

“Ne’e ha’u ko’alia bebeik ona. Imi labele husu buat ida ke ha’u ko’alia repete bebeik ne’e, públiku mós baruk atu rona. Ha’u hanoin, ita nia problema maka ne’e duni,” Ministru Manetelu hatán bá jornalista Hatutan.com, hafoin partisipa sorumutuk ordináriu Konsellu Ministru iha Palásiu Governu, Díli, Kuarta (20/03/2024).

Governante ne’e dehan, solusaun ne’ebé di’ak liu hodi solusiona rede internet iha Timor-Leste maka, daudaun ne’e Governu halo hela esforsu oinsá kanaliza Cabo Fibra Ótica Submarina mai Timor Leste, nune’e bele reponde bá kestaun ida-ne’e no atu mai dadaun ona.

“Solusaun maka ne’e. Agora, nia lentu duni, realidade maka ne’e. Agora ita atu halo nusá mak nia atu laís, tantu operadór sira ne’e mós ita la hatene sira-nia satélite ne’e oinsá. Ita la hatene. Mais, bom sira nia kapasidade atu fornese internet mak ne’e ona. Ne’e realidade. Ne’ebé, solusaun maka Fíbra Ótika ne’e. Preokupasaun públiku nian ne’e, nia direitu, ne’e sira-nia direitu atu preokupa, mais ha’u hateten katak, realidade ohin loron nian mak ida ne’e ona,” Manetelu responde preokupasaun públiku.

Kona-bá notifikasaun bá empreza telekomunikasaun sira ne’e, Ministru Manetelu dehan, Autoridade Nasionál Komunikasaun mak iha liu kompeténsia atu halo notifikasaun bá na’in bá empreza sira ne’e, nune’e bele normaliza no halaís rede internet, hodi hatán bá espetativa públiku.

Jullu, Cabo Fibra Ótica Submarina To’o TL

Ministru Transportes no komunikasaun ne’e informa katak, tuir kalendáriu ne’ebé iha, fulan-jullu tinan ne’e, Cabo Fibra Ótica Submarina sei to’o Timor-Leste (TL).

“Tuir informasaun ne’e katak, maizumenus fim de jullu ne’e to’o iha Timor. Mais, ne’e informasaun ne’ebé sira hateten hela, roo iha ona dalan, mais ita la-hatene nia bele to’o mai iha ne’e, sá fulan. Uluk temi maiu, mais agora monu tiha bá jullu. Importante bá ita katak, prosesu konstrusaun ne’e sei konklui iha tinan ida-ne’e,” Manetelu informa.

Hatutan.com mós asesu informasaun iha Pájina facebook ofisiál “Ministério dos Transportes e Comunicações” ne’ebé fó-sai kedan iha loron 04 fulan-marsu 2024 ne’e katak, Cabo Fibra Ótica Submarina 619 Km sei to’o iha Timor-Leste iha fulan Julhu 2024 hodi lansa bá tasi no halo ligasaun Network Submarinu entre Dili–Darwin no PortHedland ho objetivu asegura konektividade internet ho kualidade ás no lais iha Timor-Leste.

Iha loron 26 fulan fevereiru 2024, membru na’in-rua hosi Steering Committee bá Projetu fábrika Timor-Leste South Submarine Cable (TLSSC), Ministru Planeamentu no Investimentu Estratéjiku no Ministra Finanças, inklui Diretór Jerál Transportes no Komunikasoens no Prezidente ANC inklui Diretor Ezekutivu TIC Timor, bá to’o França ninia Porto Calais hodi observa Roahi/Navio  ILE D´AIX (IMO 9009310) hosi empréza Alcatel Submarine Networks (ASN), tula Cabo  Fibra ótica Submarinu Timor-Leste nian ho naruk 619 Km hodi lansa bá tasi okos ho objetivu,  liga  sidade Díli bá sidades Australianas Darwin no PortHedland. Tuir Planu, Projetu ne’e remata tinan 2024 nia rohan.

Koordenadór TLSSC Romualdo Guterres ne’ebé integra mós iha delegasaun ne’e, dezloka bá França iha âmbitu observa besik karegamentu Cabo Fibra Ótica Submarino bá Roahi.

Enkuantu, Ministru Miguel Marques Gonçalves Manetelu labele hola parte iha delegasaun ne’e, tanba iha tempu hanesan, nia tenke partisipa iha  serimónia adezaun Timor-Leste bá Organizasaun Mundial Komérsiu iha Abu Dhabi).

Diretor Jerál Transportes no Komunikasoens, Constantino Ferreira Soares ne’ebé reprezenta ministru iha delegasaun ne’e, informa katak progresu hosi ezekusaun bá Projetu Fibra ótika atinje ona 50%.

Sasukat ka karómetru hosi atinjimentu ne’e mak finaliza ona fábrikasaun kabu fibra ótika iha Fransa, ho komponentes kona-bá Repeaters, Branching Units, no seluk tán ne’ebé tuir planu sei to’o iha Timor-Leste iha fulan Jullu 2024 nia rohan, no sei lansa cabo fibra Ótica submarina bá tasi hodi halo ligasaun hosi Darwin-PortHedland mai Timor-Leste iha tinan 2024 nia rohan.

Paralelamente konstrusaun infraestruturas iha rai maran hodi simu aterajem Cabo Fibra Ótica Submarina iha tasi ibun Bebonuk mós rejísta progresu signifikativu hosi empréza RMS no DXN ne’ebé superviziona hosi Empréza NEM.

Enkuantu informasaun seluk ne’ebé fó sai hosi Governu Australia liuhosi sira-nia pájina ofisial facebook “Australia in Timor-Leste”, iha tersa (19/03/2024) informa katak, Timor-Leste nia kabu internét submarinu iha ona nia prosesu hodi entrega! Ró kabu refere daudaun ne’e iha hela dalan hosi Calais, Fransa no sei to’o mai iha Dili iha fulan Jullu tinan ne’e.

Iha karta komunikadu ne’e mós Governnu Austrália expressa sira-nia sentimentu orgullu atu servisu hamutuk ho Governu Timor-Leste hodi ajuda fornese konetividade internét ne’ebé lalais, baratu no konfiável liu.

Jornalista: Rogério Pereira Cárceres