Hatutan.com, (25 Marsu 2024), Díli-Kazu konfrontu entre membru grupu arte-marsiál iha Beto Leste, Suku Madohi, Postu Administrativu Dom Aleixo, Munisípiu Díli, Sábadu kalan (23/03/2024), rezulta uma ida rahun no ajente polísia ida kanek gráve.
Komandante PNTL Eskuadra Dom Aleixo, Inspetór Xe Polísia Alex da Costa “Samurai” fó orientasaun bá membru arte-marsiál ho arte-rituál sira iha atividade limpeza jeral konjunta, Sábadu (06/08/2022). Foto/Dok.Hatutan.com
Polísia Nasionál Timor-Leste (PNTL) Munisípiu Díli liuhosi komandante Eskuadra Dom Aleixo, Inspetór Xefe Polísia Alex da Costa “Samurai”, haktuir kronolójia akontesimentu ne’e katak, kazu ne’e mosu bainhira grupu juventude sira-ne’e fila hosi seremiteiru, hafoin hala’o fúnebre (hakoi) mate-isin ida iha área tasi-ibun ka Marínir.
Informasaun katak, mate-isin ne’e, uluk, hanesan mós membru ativu ida hosi Ikatan Keluarga Silat Putera Putra Timor-Leste (IKS-PTL) Kera Sakti, tanba ne’e maka, matebian ne’e nia maun-alin sira hosi fatin oioin iha kapitál Díli, bá hato’o sira-nia sentidu kondolénsia no konsentra hotu iha mate uma, to’o lorokraik lori bá hakoi iha semiteiru.
Bainhira fila to’o iha área Betó Leste, mosu uluk asaun provokasaun hosi grupu joven balu iha área ne’ebá, hodi hamosu kedas reasaun, ikus mai, sira konfronta malu to’o komunidade sira ne’ebé hela besik estrada ibun ne’e, sai hotu vítima, tanba sira tuda ema nia uma to’o rezulta vítima balu.
Inspetór Xefe Polísia Alex da Costa “Samurai”, hateten bá jornalista sira iha Edifísiu provizóriu Eskuadra Dom Aleixo iha Akadémia Polísia Comoro, Segunda, (25/03/2024), katak membru PNTL ida kanek grave dadaun deskansa hela iha uma, tanba nia kondisaun seidauk di’ak, no komandu rasik mós autoriza ona atu nia deskansa lai iha uma hodi bele halo tratamentu bá nia saúde.
“Vítima ida ne’ebé mak nia uma hetan estragu ne’e mós, bá hato’o tiha ona keixa bá Polisia Eskuadra Comoro, no iha mós asasaun ofensa integridade fízika hasoru vítima. Suspeitu sira uza mós rama ambon ne’ebé maka hanesan belit mós iha vítima ida nia ulun. Suspeitu nain-ualu (8) ami kaptura ona,” Alex da Costa “Samurai” tenik.
Suspeitu na’in-ualu (8) ne’e, polisia deskonfia maka’as katak, sira sai hanesan autór prinsipál bá kazu konfrontu iha área Betó Leste no investigadór sira konklui ona prosesu investigasaun iha Eskuadra Dom Aleixo, no lori bá detein ona iha sela detensaun komandu Díli nian durante oras 72 molok submete bá prosesu primeiru interrogatóriu judisial iha Tribunál Judisial Primeira Instánsia Dili (TJPID).
Polísia Identifika Xefe Suku Madohi
Relasiona ho kazu insidente ne’e, Polísia Eskuadra Dom Aleixo, kaptura ona mós Xefe Suku Madohi, Bernardino Cristo Pereira, tanba informasaun hosi vítima sira katak, molok kazu ne’e mosu, suspeitu sira bá konsentra uluk iha xefe suku nia rezidénsia, no deskonfia mós katak, vítima ne’ebé ulun belit hela ho besi kanuk ida hanesan kro’at ne’e, tanba xefe suku ninia oan mane mak hana ho rama-ambon.
“Tuir informasaun, tanba kazu ida ne’e prosesu investigasaun la’o hela, ita detein oras 72 nia laran lori bá Tribunál maka foin ita hatene ida-ne’e,” Alex da Costa “Samurai” hateten.
Komandante Alex “Samurai” hatutan, informasaun ne’e, la’os hanesan inventa, maibé, depende bá informasaun ne’ebé mak informa hosi komunidade sira ne’ebé mak enfrenta problema ne’e maka fó sira nian informasaun katak, labarik sira ne’e bá hamutuk iha xefe suku nia uma, depois maka haruka mai hodi halo asaltu,” tenik nia.
Kona-bá Xefe Suku Madohi, Bernardino Cristo Pereira ninia oan mane ne’ebé envolve mós involve iha kazu konfrontu ne’e, autoridade másimu iha suku Madohi ne’e, rekoñese, maibé, lakohi fó ninia komentáriu naruk, tanba husik Polísia sira maka maka hala’o sira-ninian servisu tuir lei.
“Iha momentu ne’e ha’u atu tun bá haree saida maka akontese loloos, depois komunidade hatete balun hateten dehan ha’u nia oan. Sim, loos ha’u nia oan ,maibé arte marsiál la’ós ha’u nia oan, maibé sei mosu kazu konkretu hanesan ne’e entaun ne’e krime, so lei de’it atu hatete atu ajusta ema ida nia espetadu ema ida nia justu. La’ós ita povu ka ha’u hanesan Xefe suku maka halo buat ne’e” nia hateten.
Xefe Suku Bernardino mós fó sasin katak, kazu konfrontu ne’e envolve ema barak tebes, la’ós de’it na’in-50 resin, maibé ema liu-liu grupu juventude sira ne’e bá hamutuk besik atus-ida resin.
Enkuantu, informasaun prelemináriu ne’ebé polísia hetan iha terrenu katak, kazu konfrontu ne’e, deskonfia envolve hosi membru Persaudaraan Setia Hati Terate (PSHT) no membru IKS-PTL Kera Sakti ne’ebé mak durante ne’e estadu suspende sira-nia atividade.
Jornalista: Rogério Pereira Cárceres