Hatutan.com, (25 Marsu 2024), Díli– Parlamentu Nasionál  (PN) husu Governu liuhosi Ministériu Saúde atu foti medida urjente hodi halo prevensaun bá virus Rabies (asu bulak) ne’ebé mak agora daudaun hahú espella ona iha Rejiaun Administrativu Espesial Oe-cusse Ambeno (RAEOA).

Virus rabies ka asu bulak sirkula ona iha RAEOA. Foto/Ilustrasaun Espesiál

“Ida-ne’e asuntu seriu tebes, presiza oinsá Governu atu bele tau asuntu urjente hodi prevene lalais situasaun virus Rabies (asu bulak) ne’ebé mak akontese iha RAEOA hodi nune’e labele daet mai to’o Timor-laran tomak. Tuir informasaun ne’ebé asesu mós katak iha fulan hirak liubá katak iha asu-lima mak moras ida-ne’e, maibé iha asu-ida de’it mak hetan vasina,” membru PN hosi  Bankada CNRT, Maria Gorumali Barreto, haktuir liuhosi intervensaun iha Plenária PN, Segunda (25/03/2024).

Deputada Maria Gorumali Barreto husu bá Governu atu bele kontrolu maka’as iha fronteira hanesan Pásabe ne’ebé risku tebes. Nune’e mós fronteira sira seluk hanesan Munisípiu Covalima no Bobonaro tenke antisipa bá situasaun ne’e, hodi nune’e, bele redús virus ne’e espalla iha territóriu laran tomak.

“Iha semana kotuk ita hotu hatene katak akontese iha RAEOA liuliu iha Pásabe no Pante Makasar, virus Rabies (asu bulak), ne’e afeta makaas bá komunidade, no tuir dadus ne’ebé ha’u akompaña katak, to’o horisehik akontese ona bá ema  na’in-21 ne’ebé mak asu tata,”Nia espliká

Nia haktuir teste Laboratoriu Nasionál ne’e hatudu Rabies pozitivu no ema-na’in-rua (2) mak transfere mai Ospitál Nasionál Guide Valadares (HNGV) no na’in-ida konsege lakon vida.

Deputadu Bankada KHUNTO António Verdiál, hateten Virus Rabies (asu bulak) ne’ebé mak afeita animal liuliu asu, konfirma sirkula ona iha  Passabe-RAEOA. Tuir informasaun ne’ebé asesu katak, virus ne’e tata ona ema na’in-19 halo kanek no ema na’in ida infekta. liuhosi teste konfirmasaun katak Rabies Positive.

“Husu bá Governu liuhosi Ministériu da Saude no Ministeriu Agrikultura Pekuaria, Peskas, no Floresta atu serbisu hamutuk atu bele prevene virus ida-ne’e hodi labele daet bá Munisípiu seluk iha teritóriu laran tomak,” Nia subliña.

Vise-Ministru Asuntu  Parlamentár, Áderito da Costa Hugo hateten rejista preokupasaun sira-ne’e, hodi nune’e, bele envia bá Ministériu relevante sira hodibele toma medida bá virus Rabies ne’e rasik.

“Governu liuhosi Ministériu Saúde ho Ministériu relevante sira hala’o hela servisu namanas bá medida prevensaun ho entidade seluk hanesan parseiru sira sobre asuntu ida-ne’e bá medida prevensaun no atuasaun bá kazu sira konkreta ne’ebé akontese iha fatin sira ne’ebé ohin deputadu sira foti ona,” Nia hateten.

Jornalista Estajiária : Zita Menezes