Hatutan.com, (03 Abril 2024), Díli— Prezidente Repúblika (PR), José Ramos-Horta agradese ba apoiu hosi brigada médiku Cubana iha Timor-Leste (TL) ne’ebé fó asisténsia saúde bá komunidade iha nasionál to’o munisípál liu-liu iha ospitál referál sira.

Prezidente Repúblika (PR), José Ramos-Horta kaer liman ho Embaixadora Cuba mai Timor-Leste, Grisel Alina Aldama Inniss, bainhira partisipa komemorasaun tinan 20 misaun brigada médiku Cubana iha Timor-Leste, ne’ebé hala’o iha salaun Nobre MNEK, Kuarta (03/04/2024). Foto: Média PR.

Sentidu agradesimentu ne’e Ramos-Horta hato’o iha nia diskursu komemorasaun tinan 20 misaun brigada médiku Cuba iha Timor-Leste ne’ebé hala’o iha salaun Nobre MNEK, Kuarta (03/04/2024).

Lee Mós: Bolseiru 29 Dezloka Hodi Kontinua Estudu Espesializasaun Iha Cuba

Xefe Estadu dehan, ohin hamutuk selebra tinan 20 misaun brigada médiku Cuba iha Timor-Leste, ne’e nu’udár mós kooperasaun entre Estadu Cuba no Timor Leste iha área saúde, la’ós iha ne’e de’it maibé haree mós oportunidade sira ne’ebé país rua esplora iha kooperasaun sira área oi-oin hodi tulun dezenvolvimentu Timor-Leste nian.

“Ohin ita hanoin hikas memória tinan 20 liu, bainhira Cuba hahú haruka nia médiku sira mai fó asisténsia saúde iha Timor Leste no mós Timor-Leste ba dala uluk haruka Timoroan sira bá estuda medisina iha Cuba. Ohin loron Timor Leste iha médiku barak ne’ebé nu’udár produtu hosi eskola medisina ne’ebé Governu Cuba oferese no ida-ne’e haree katak ohin loron estudante sira fila-fali mai Timor no servisu iha Ministériu Saúde hodi tulun fó asisténsia saúde,” Prezidente Repúblika hateten.

Haree ba kontribuisaun sira ne’ebé brigada médiku Cuba iha Timor Leste, nia dehan,  fó hanoin katak ida ne’e ajuda tebe-tebes atu hadia kualidade moris komunidade Timorense nian iha seitór saúde nian liu hosi prestasaun servisu médiku Cubano sira nian iha ospitál sira.

“Agradese ba solidaridade ho Timor-Leste liu hosi kooperasaun iha área saúde ne’ebé tulun tebes no ami nia gratidaun ba servisu sira ne’ebé médiku sira presta ho kompromisu tomak mezmu iha difikuldade maibé nafatin sai ezemplu liu husi atendimentu ho domin iha servisu professional sira liu-liu liga atendimentu saúde,” nia agradese.

Nia mós agradese ba hotu-hotu, ba sira ne’ebé kompleta ona tinan haat misaun iha Timor-Leste no sei fila ba Cuba, komprimentus ba família no susesu iha kareira, Timor Leste sei konta ho mediku sira nia kontribuisaun iha istória TL tomak.

Iha fatin hanesan, embaixadora Cuba mai Timor-Leste, Grisel Alina Aldama Inniss hateten, ohin loron ida ne’e aniversáriu brigada médiku Cuba iha Timor-Leste ba tinan 20, médiku Cuba iha Timor-Leste kada loron,  sira fó asisténsia medika ba komunidade iha munisípiu 13 inklui RAEOA, iha ne’ebá sira fó asisténsia ba vida, saúde ba populasaun  Timor-Leste no mós asistente kolaborasaun hamutuk ho médiku Timorense.

“Dezafiu hosi médiku balun iha Timor-Leste ne’e kiik liu, tanba haree de’it hosi lingua, médiku Cuba to’o iha ne’e, sira presiza atu fó kursu lingua Español hamutuk ho estudante sira, maibé iha ne’eba sira iha dezafiu iha lingua Tetun. Maski nune’e Timoroan sira sempre ajuda, konsidera sira hanesan. Entaun, iha ne’ebá sira ajuda hanorin estudante sira atu nune’e bele halo materia ka asistensia ba Estudante medisina Timoroan sira,” nia hateten.

Diplomata ne’e hatutan, formasaun sira ne’ebé médiku Cubano sira oferese ba estudante medisina Timoroan agora  kobre ona médiku rihun resin, nune’e agora formasaun ba mediku hamutuk 1.155 ne’ebé kalkula totalmente hosi Cuba no UNTL 1.155 formadu no agora daudaun ida ne’ebé mak aprende iha UNTL hamutuk 900 ne’ebé agora hahu hela sira nia karreira medisina, iha espesialista ne’ebé hasai iha Cuba.

Totál Médiku Cubano ne’ebé oras ne’e iha Timor hamutuk 160, sira hala’o asisténsia iha 13 Munisipiu inklui RAEOA.

Jornalista: Vito Salvadór