Hatutan.com, (28 Marsu 2024), Díli—Primeiru-Ministru (PM) Kay Rala Xanana Gusmão, halo hela avaliasaun bá membru Governu hotu hodi haree dezempeñu servisu membru Governu ida-idak nian.

Lee Mós: Horta Husu Xanana Avalia Membru Governu

Iha loron, 04 fulan-Janeiru 2024, Primeiru-Ministru (PM), Kay Rala Xanana Gusmão deklara katak, iha fulan-Marsu 2024 bá oin, sei halo remodelasaun bá membru Governu ne’ebé servisu la tuir programa no planu  IX Governu Konstitusionál.

Reuniaun Konsellu Ministru. Foto/Tome da Silva

Primeiru-Ministru dehan, Orsamentu Jerál Estadu (OJE) 2024 aprova ona no Governu iha fulan neen nia laran ne’e hadi’a uma laran, agora mak Governu tenke prepara an atu ezekuta programa ne’ebé sira rasik husu osan hodi aloka bá.

“Ha’u dehan tiha ona bá ministru sira hotu katak, iha Marsu ba oin ha’u la’o buka haree kada ministériu halo saida, se mak la halo, la serve, sai, tau ema seluk atu ita bele mai kumpri. Sai ema bo’ot atu kumpri misaun tanba povu hili atu halo buat ruma ba rai ne’e. Ne’e duni, maka kompromisu hosi Governu maka ida-ne’e,” Xanana Gusmão hateten tempu ne’ebá.

Liga ho komprimisu Primeiru-Ministru (PM) Kay Rala Xanana Gusmão nian ne’e, Vise-Ministru asuntu Parlamentar Adérito Hugo da Costa, Kuarta (27/03/2024), hafoin reuniaun Konsellu Ministru iha Palásiu Governu, hateten avaliasaun sei halao nafatin no sei la para tuir kompetensia Primeiru-Ministru  nian hodi haree pontus-pontus bá servisu dezempeñu membruGgovernu sira to’o autoridade nivel munisípiu, ho kargu xefia sira ne’ebe kompleta ona.

“Ida ne’e mak servisu, sua-exelénsia (PM Xanana_red) kontinua halao nia servisu no nunka para, oinsa halo avaliasaun bá dezempeñu kada membru Governu nian iha liña ministeriu sira hotu,” Adérito Hugo da Costa konfirma.

Adérito Hugo hateten saida mak hakarak interpreta hosi mensajen Primeiru-Ministru nian ne’e katak iha fulan-Marsu xefe governu ne’e hakarak halo vizita bá baze atu haree direitamente faktu dezempeñu admistrasaun públiku nian no dala ruma mós ministeriu sira nian.

Liga ho servisu ne’ebe IX  Governu halo to’o iha fulan-Marsu ne’e tanba iha konsiderasaun progressu servisu bá estabelesimentu bá iha autoridade sira munisípiu ninian ne’ebé foin kompleta iha loron 26 fulan-Marsu ne’e.

Ho admistrasaun munisipiu nian ne’ebe kompleta ona no admistrador postu ne’ebé posse hotu ona, nune’e admistrasaun kompleta ona iha nivel munisipâl nian, bele iha ona oportunidade bá Primeiru-Ministru atu halo vizita hodi haree progresu servisu iha estrutura ezekutivu iha Governu nian iha nivel munisípiu ho Prezidente Autoridade Munisípiu sira ho nia estrutura tuir planu Primeiru-Ministru.

Liga ho isu remodelasaun, Adérito Hugo labele halo komentáriu tanba hola parte mós hannesan membru Governu, nune’e remodelasaun ne’e kompeténsia Primeiru-Ministru nu’udár xefe Governu.

Lee Mós: Remodelasaun Sei Akontese Iha Marsu 2024

Jornalista: Leopoldina de Carvalho