Hatutan.com, (01 Abríl 2024), Díli-Polisia Nasional Timor-Leste (PNTL) Munisípiu Liquiça Sábadu (28/03/2024), kaptura no detein suspeitu na’in-tolu ho inisiál MMH, ET no AM, iha tanba envolve iha kazu krime burla ka na’ok iha área Munisípiu Liquiça.
Lee Mós: Kazu Na’ok Motór, Forsa Konjunta Kaer-tán Supeitu 11 Inklui Na’in bá Ofisina Modifikadór
Suspeitu na’in-tolu ne’ebé utiliza karreta luxu bá na’ok loja Xina nian ida iha Munisípiu Liquiça. Foto/Media PNTL
Tuir prova video CCTV ne’ebé akapta iha loja LEADSO-Xinés nian iha Liquiça nu’udár alvu ne’ebé suspeitu sira na’ok sasán, hatudu suspeitu sira utiliza karreta luxu rua ho marka CX-7, kór mutin, Xapa Matrikula A. 12-4xx TL ho karreta Land Cruiser Prado, kór-silver, xapa matrikula 23-0xx TL.
Karreta rua ne’e mós autoridade polisia sira halo ona apreensaun nu’udár evidénsia iha Komandu PNTL Munisípiu Liquiça.
Portavós Komandu Jerál Polisia Nasionál Timor-Leste (PNTL) Superintendente Polísia António da Luz, informa, kazu ne’e akontese iha Aldeia Leopa, Suku Dato, Kinta, (28/03/2024), tuku 03:45, madrugada. Suspeitu sira halo asaun sobu no estraga tiha odamatan Loja LEADSO.
“Akontesimentu ne’e ita-nia sidadaun na’in-haat ne’ebé tama iha loja Xineza sira nian iha Liquiça. Sira na’in-haat tama hodi na’ok sasán ne’ebé iha loja laran. Antes atu foti sasán hirak ne’e sira kesi tiha loja na’in ho naran Wan Yong Chao, depois maka foti sasán sira ne’e,” Portavós Komandu Jerál PNTL, António da Luz, hateten bá jornalista sira liuhosi konferénsia imprensa, Segunda (01/04/2024).
Hafoin foti tiha sasán iha loja laran, suspeitu sira fila no husik fila-fali loja na’in. Nune’e, loja na’in ne’e informa kedas bá Komandu PNTL Munisípiu Liquiça. Iha tempu hanesan, membru polísia sira halo kedas atuasaun, no hodi halo kapturasaun bá suspeitu na’in-tolu. Tuir loloos na’in-haat, mais, ida konsege halai liu, hetan de’it sira na’in-tolu.
Suspeitu na’in-tolu ne’e, ida ho inisiál ET, halo ona kazu bá dala-lima, tama sai komarka. Ida ho inisiál AM, komete ona mós kazu bá dala-rua, no Suspeitu MMH foin bá dala-uluk envolve iha kazu na’ok sasán.
Iha akontesimentu ne’e, suspeitu sira konsege foti osan ho valór $7,000-resin. Osan tomak ka tahan hamutuk $5,000, no osan rahun hamutuk $2,000. Sasán ne’ebé suspeitu sira lori hodi ameasa loja na’in maka, katana ida ho sabit rua. Depois ho tali ne’ebé mak sira uza hodi kesi loja na’in.
Iha mós gravasaun video hosi CCTV, iha loja laran no mós li’ur, hatudu momoos kona-bá aktu ne’ebé suspeitu sira halo, hodi sobu odamatan Loja LEADSO nian, dolar no tama bá loja laran no foti sasán. Haree hosi aktu ida ne’e, suspeitu sira komete iha Krime Furtu agravadu, ne’ebé rejista ho NUC : 0016/24.LILIQ.
Hafoin kapturasaun ekipa investigasaun Komandu PNTL Liquiça halo kedas prosesu identifikasaun hodi foti sira-nia identidade, no detein iha sela detensaun durante oras 72. Tanba kompleta ona períodu detensaun iha sela, nune’e, ohin meiudia, ekipa Investigasaun Liquiça nian, transporta kedan suspeitu sira mai aprezenta iha Kuartél Komandu Jerál PNTL, no tuir oráriu, suspeitu sira tenke submete ona bá Primeiru Interrogatóriu Judisiál iha Tribunál Díli.
Jornalista: Rogério Pereira Cárceres