Hatutan.com, (27 Marsu 2024), Díli-Tribunál Judisiál Primeira Instánsia Díli (TJPID), liuhosi Juiz Singulár Afonso Carmona, Kuarta (27/03/2024), deside medida koasaun Termu identidade rezidénsia (TIR) bá arguido ho inisiál ZL nu’udár sidadaun estranjeiru ho nasionalidade Xina tanba deskonfia halo falsifikasaun bá dokumentu pasaporte.

Lee Mós: Sidadaun Xina Ida Submete Bá Primeiru Interrogatóriu Tanba Halo Falsifikasaun Pasaporte

Medida koasaun ne’e ho nia obrigasaun bá arguido ZL tenke kumpre aprezentasaun periódika, semana  ida dala-rua iha Eskuadra PNTL Vera Krús, no Proibisaun bá Aujénsia, katak, bandu arguido atu halo viajen estranjeiru.

Autoridade Polísia Timor-Leste aprezenta arguido ZL nu’udár sidadaun estranjeiru ho nasionalidade Xina bá TJPID, Kuarta (27/03/2024). Foto/Tome da Silva

Desizaun ida ne’e sai, hafoin primeiru interrogatóriu judisiál durante oras-haat (4) nia laran hasoru arguid ZL. Iha prosesu inkéritu ne’e, Ministériu Públiku (PM) liuhosi Prokuradór Pedro Baptista, alega arguido ho krime Falsifikasaun Dokumentu.

Defeza hosi arguido ZL, Octâvio Cardoso, hateten, simplesmente iha prosesu ida ne’e atu hatete katak iha indísiu bá iha falsifikasaun identidade. Ministériu Públiku promove katak, falsifikasaun dokumentu.

“Tuir parte defeza nia entendimentu katak, falsifikasaun identidade. Ida-ne’e indísiu, mais atu hatete katak, estadu RDTL iha prosesu ne’e la sofre buat ida, tanba dokumentu la’ós emite iha Ministériu Justisa Timor-Leste, maibé, dokumentu ne’e emite iha Repúblika Xina. Entaun, tuir loloos, atu ko’alia kona-bá Prejudikadu ka Prejuizu, ne’e Estadu Xina, la’ós Estadu Timor,” Advogadu Octâvio Cardoso, hateten bá jornalista sira, hafoin primeiru interrogatóriu judisiál iha TJPID.

Octâvio Cardoso, haktuir, antes ne’e mós iha prosesu balu ne’ebé maka iha indisiu bá arguido, entre sira,  katak, iha indisiu bá promosaun iha NUK seluk ne’ebé mak hein nia atu bá presta deklarasaun. Mais, altura kuandu MP notifika, pozisaun arguido nian laiha Timor.

“Ha’u hanesan mandatóriu, ha’u mak fó resposta bá ne’ebá, katak, bainhira nia fila mai, ha’u sei aprezenta. Entaun, ho krime lubuk ida ne’ebé maka alende falsifikasaun, iha mós krime lubuk ida ne’ebé mak ohin MP promove, mais, Tribunál intende katak, bá interesse prosesu atu husu sira-nian kooperasaun, maka, aplika bá nia proibisaun bá nia atu sai bá rai-li’ur. Ha’u hanoin ida ne’e,” nia esplika.

Ho ida ne’e, desizaun Tribunál nian mak bandu arguido labele sai bá rai-liur, proibisaun auzénsia  bá estranjeiru no mós aprezentasaun periódika. Mais, Octâvio Cardoso haree katak, ida-ne’e mós prejudika nia bá iha andamentu normál, ne’ebé mak tuir nia esperiénsia, nia koko oinsá atu haree fila-fali para rekorre bá iha despaxu tribunál nian.

Daudaun ne’e arguido nia dokumentu sira Tribunál foti hotu ona, karik iha bá iha dokumentu refere atu uza bá nia interesse hanesan emprezáriu, maka hanesan saida mak nia ko’alia ona.

“Iha momentu balu ha’u sei husu, para atu devolve fila-fali, tanba Tribunál mós, ohin ne’e, laiha despaxu katak, konsidera válidu bá iha objetu refere,” nia hateten.

Jornalista: Rogério Pereira Cárceres