Hatutan.com, (02 Abríl 2024), Díli—Sekretáriu Jerál Association of Southeast Asian Nation (ASEAN), Kao Kim Hourn nota katak, Timor-Leste (TL) iha duni kompromisu forte atu adere asosiasaun  boot ne’e.

Sekretáriu Jerál Association of Southeast Asian Nation (ASEAN), Kao Kim Hourn hasoru-malu ho Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru-Pité, Tersa (02/04/2024). Foto: PR.

Situasaun ne’e Kao Kim Hourn nota bainhira hasoru malu ho Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru-Pité, Tersa (02/04/2024).

Lee Mós: Kao Kim Hourn Garante Timor-Leste Sai Membru Plenu ASEAN

“Ha’u haree Prezidente Repúblika, José Ramos-Horta iha komitmentu bo’ot kona-bá Timor-Leste nia adezaun bá ASEAN. Timor-Leste sempre iha kompromisu no hakarak atu hola parte bá ASEAN no kompromisu ne’e sei nafatin iha ne’e no forte tebes,” Sekretáriu Jerál ASEAN Kao Kim Hourn hateten hafoin hasoru-malu ho Xefe Estadu.

Diskusaun ne’ebé líder na’in-rua ko’alia haree liu oinsá maka Timor-Leste hola parte iha atividade oioin ne’ebé ASEAN iha, maibé oinsá maka nasaun membru ASEAN sira bele ajuda Timor-Leste iha parte sira ne’ebé seidauk iha atu bele atinje metas sira bá ASEAN.

Tanba ne’e,  nia hateten, klaru katak iha ona vizaun ida forte atu Timor-Leste sai parte hosi ASEAN no hanoin katak kompromisu maka’as atu halo servisu atuál sira bá Estadu Timor-Leste ne’ebé formalmente husu atu sai membru kompletu bá ASEAN desde 2011.

“Kontente tebes atu haree reforsa liután Prezidente Repúblika José Ramos-Horta ne’ebé hakarak sai parte ba ASEAN,” nia espresa.  

Nia mós deklara katak, ASEAN hein atu serbisu besik ho Timor-Leste iha nivel oioin tuir matadalan no road maps ba adezaun ne’ebé adopta ona iha tinan 2023.

Hosi tempu ne’ebá kedan, nia hatutan, iha ona atividade barak ne’ebé implementa tiha ona iha parte rua, hanesan iha ekipa konvidadu atu partisipa iha atividade sira hanesan iha reuniaun sira, programa no atividade sira, iha tinan kotuk atu delegasaun sira Timor-Leste nian partisipa liu tan atu hasa’e no hametin kapasidade funsionáriu sira ne’ebé mak sei lidera iha negosiasaun, bainhira Timor-Leste sai membru kompletu, bele prepara an atu sai membru konsellu.

Nia hatutan, iha tempu hanesan, ASEAN mós serbisu atu prepara akordu no tratadu sira ne’ebé ohin loron hahú.

“Ha’u hetan oportunidade atu hasoru malu ho Prezidente Repúblika José Ramos-Horta, Primeiru-Ministru Kay Rala Xanana Gusmão no membru sira hosi Parlamentu Nasionál. Ha’u kontente tanba ekipa Parlamentu Nasionál harii tiha ona komisaun ad hoc ida ne’ebé sei ajuda atu aselera aplikasaun tratadu no akordu sira-ne’e dala ida tan, nune’e ha’u hanoin katak ida-ne’e mak mudansa ida. Maibé iha tempu hanesan ami mós haree hotu katak meza sira-ne’e harii ona misaun atu asina maka atu serbisu hamutuk ho ami no jere estadu sira,” nia subliña.

Tanba ne’e, nia hanoin katak ida-ne’e mak progresu boot tebes no hein atu kontinua intensifika esforsu hosi parte rua.

To’o tinan 2025 desizaun ne’e tenke foti hosi estadu membru sira ASEAN, maibé hanoin katak di’ak atu rona hosi parte hotu hodi tau iha fatin. Ne’e mak timeline ida no hatudu katak ida-ne’e prontu ona no bele lori aplikasaun sira-ne’e nu’udar membru kompletu.

Jornalista: Vito Salvadór