Hatutan.com, (03 Abríl 2024), Díli- Inspesaun Jerál Jogu (IGJ, sigla portugés), halo operasaun bá atividade Jogu Bola Guling permanente ualu (8) ne’ebé durante ne’e halo atividade legal kumpre rezolusaun Governu númeru 14/2024, 20 fulan-Marsu, hodi taka provizóriu atividade operasaun.
Lee Mós: Governu Suspende Temporariamente Jogu Bola Guling
Atividade bola guling taka provizóriu hodi hein desizaun Governu. Foto/Elio dos Santos da Costa
Hafoin IX Governu konstitusionál liu husi Vise-Primeiru-Ministru no Ministru Koordenadór bá Asuntu Ekonómiku no Ministru Turizmu no Ambiente, hatún despaxu rezolusaun lei númeru 14/2024, 20 fulan-Marsu, hodi taka provizóriu atividade Jogu bola guling, IGJ ezekuta kedas rezolusaun ne’e hodi halo inspesaun no operasaun bá jogu tradisional bola guling sira ne’ebé durante ne’e halo atividade iha sidade Díli.
Iha operadór hamutuk ualu (8) mak rejista ofisiálmente iha IGJ hodi hala’o atividade iha Munisípiu Dili hanesan operadór Luz Clarita lokaliza iha Metinaro, Kito 88 Leru Bola Unipessoal Lda iha Becora Remak, Samotxi Tomas Unipessoal Lda iha Kuluhun, Jubarcia Unipessoal Lda iha Bebora, Acbotaeo Unipessoal Lda iha Kampung Alor, Narabey Unipessoal Lda ne’ebé lokaliza iha Comoro Delta I, Kampung Baru no Hudi Laran, Ardoser Unipessoal Lda iha Tasi Tolu no ikus liu Roybeby iha Perumnas.
Iha atividade operasaun ne’e ekipa IGJ akompaña hosi Polísia Nasionál Timor-Leste (PNTL), liu husi Servisu Investigasaun Kriminál hahú operasaun iha tuku 20:00 Otl too 22:30 Otl no haree jogu sira taka hotu bazeia bá rezolusaun Governu hodi hein prosesu tuir mai molok hahú hikas atividade.
Sub-Inspetór Jogu Ermundo Lopes halo entevista ho jornalista sira sira bainhira halo operasuan bá fatin jogu bola guling iha Díli laran, Tersa kalan (02/04/2024). Foto/Elio dos Santos da Costa
Sub-Inspetór Jogu Ermundo Lopes hateten, inspesaun bá jogu halo hamutuk ho autoridade seguransa bá operasaun jogu bola guling, bazeia bá rezolusaun Governu lei númeru 14 /2024, loron 20 fulan-Marsu atu suspende provizóriu atividade jogu bola guling iha territóriu Timor laran tomak.
“Ha’u hanoin bazeia bá rezolusaun lei númeru 14 /2024 ne’ebé fó sai iha loron 20 fulan -Marsu, tanba ne’e inspesaun jerál bá Jogus hamutuk ho PNTL halo operasaun ida ne’e no ita haree katak operadór sira kumpre saida mak governu fó sai no ida-ne’e kontribui bá pás no estabilidade hodi hein prosesu tuir mai bainhira Governu halo avaliasaun atu loke fila fali ka oinsá,” Ermundo Lopes ba Jornalista sira hafoin halo operasaun ikus iha Tasi Tolu, Tersa kalan (02/04/2024).
Antes ne’e IGJ fó ona karta notifikasaun bá operadór jogu bola guling sira ne’ebé maka hetan ona lisensa no ohin halo operasaun haree katak hotu-hotu kumpre hodi suspende sira-nia atividade.
Ekipa konjunta entre IGJ no PNTL sei kontinua halo opresaun hodi buka tuir operadór bola guling sira ne’ebé loke ilegálmente iha mate-uma no fatin-fatin sira, tanba daudaun ne’e jogu bola guling suspende provizóriu.
Bainhira iha atividade operasaun maka ekipa konjunta hetan operadór ilegál sira ne’ebé kontinua atividade ilegal sira ne’e maka sei halo apreensaun bá ekipamentu operadór sira nian no sei submete bá prosesu investigasaun tuir lei.
Jornalista: Vito Salvadór