Hatutan.com, (14 Marsu 2024), Díli— Realidade ohin loron, jogu lotaria popular ka SDSB (Sumbangan Dana Sosial Berhadiah) domina iha territóriu Timor-Leste tomak ho mekanizmu fa’an kupon manual.

Lee Mós: Loke Jogu Bola Guling, Governu La Eduka Povu

Jogu lotaria popular ne’ebé fa’an iha estrada ninin no uma-tatiis. Foto/Tome da Silva

Ajénsia sira jogu lotaria popular ne’e fa’an kupon kuaze iha fatin-fatin hosi sidade to’o área rural. Iha Díli laran, kuaze uma-tatiis sira infeta ho jogu lotaria popular ka SDSB.

Iha estrada ibun, iha uma tatiis, iha merkadu laran, iha estasionamentu transporte públiku sira-nian, inklui iha bairru-bairru sira,  nakonu ho atividade fa’an kupon lotaria popular ka SDSB.  

Ho situasaun ne’ebé ladún furak iha ema sira-nia futar matan hodi hatudu fali imajen Timor-Leste ne’e ho jogu lotaria popular,  Inspetór bá Inspesaun Jerál Jogu hanoin ona atu  dijitaliza atividade jogu lotaria ne’e .

Inspetór bá Inspesaun Jerál Jogu, Anibal de Carvalho Martins, hateten  nia parte  sei haree atividade sira ne’e sai preokupasaun públiku no Parlamentu Nasionál ( PN) nian.

“Ha’u sei halo liña koordenasaun di’ak ho instituisaun seluk, maske idak-idak la’o tuir nia lei, maibe sei servisu hamutuk  oinsa atu bele kombate atividade jogu ilegál sira ne’ebe mak dau-daun ne’e sai preokupasaun públiku no konsentra halo dijitalizasaun bá jogu lotaria popular ka SDSB,” Inspetór jogus Anibal de Carvalho Martins hateten ba jornalista sira hafoin simu posse iha Ministeriu Turizmu,  Díli, Kinta (14/03/2023).

Jogu lotaria popular ne’ebé fa’an iha estrada ninin no uma-tatiis. Foto/Tome da Silva

Nia hateten, jogu lotaria popular ka SDSB mak  daudaun ne’e  la’o hela ho sistema manual  ne’ebe ema sira fa’an ne’e ho kupon hamrik iha dalan, nune’e  bá oin sei hanoin planu ida diak hodi dijitaliza sira atividade jogu ne’e.

“Simu ona orientasaun hosi Primeiru-Ministru katak ita sei bele haree oinsa atu dijitaliza atividade jogu lotaria sira, atu nune’e bele evita ema halimar ho suratahan  prejudika mos bá ema boot no ki’ik sira,” nia informa.

Nia dehan, Governu iha hanoin ho modernu ida,  sei dijitaliza hotu atividade sira ne’e hodi bele mellora jogu sira ne’e ho di’ak.

Jornalista: Leopoldina de Carvalho