Hatutan.com, (03 Abríl  2024), Díli—Konsellu Ministru (KM) iha Kuarta (03/04/2024) aprova projetu Dekretu-Lei kona-bá Estrutura orgánika Autoridade Protesaun Sivíl, ne’ebé aprezenta hosi Ministru Interiór (MI), Francisco da Costa Guterres.

Reuniaun Konsellu Ministru. Foto/Tome da Silva.

Objetivu hosi projetu Dekretu-Lei ne’e, tuir Lei Protesaun Sivíl no Orgánika IX  Governu Konstitusionál, hakarak atu define fila-fali estrutura orgánika Autoridade Protesaun Sivíl (APC, sigla portugés), hodi halo prevensaun, mitigasaun no resposta bá situasaun emerjénsia no katástrofe oioin.

Lee Mós: APC Fahe Tarrefa Serbisu Tuir Lei Protesaun Sivíl

APC hanesan servisu públiku ne’ebé responsável bá atribuisaun Estadu kona-bá protesaun sivíl, ne’ebé inklui territóriu nasionál hotu.

“Entre ninia atribuisaun prinsipál sira foka liu ba planeamentu, koordenasaun no ezekusaun polítika protesaun sivíl nian, sensibiliza populasaun ba kestaun seguransa no koordenasaun asaun protesaun no sokorru iha situasaun emerjénsia no katástrofe,” Hatutan.com sita komunikadu.

Órgaun sira APC nian inklui Prezidente APC, Diretór Ezekutivu no Komandante Nasionál ba Operasaun Protesaun Sivíl. Prezidente APC hetan nomeasaun tuir kritériu kompeténsia téknika no esperiénsia profisionál ne’ebé relevante, no responsavel ba diresaun servisu, sujeitu ba podér membru Governu nian hodi responsabiliza iha área seguransa interna no protesaun sivíl.

Atu garante resposta ida ne’ebé efisiente no koordenada iha situasaun emerjénsia, Autoridade Protesaun Sivíl harii hanesan servisu ho ninia diresaun nasionál neen – Diresaun Nasionál Bombeirus, Diresaun Nasionál Prevensaun no Mitigasaun, Diresaun Nasionál Emerjénsia no Resposta; Diresaun Nasionál Rekuperasaun, Diresaun Nasionál Jestaun Risku ba Dezastre no Diresaun Nasionál Jestaun Rekursus.

Entidade sira ne’ebé responsavel ba ida-idak nia área Protesaun Sivíl no sei hala’o deskonsentrasaun servisu iha territóriu nasionál, no materializa sistema rejionál no sistema munisipál Protesaun Sivíl nian.

Ho promulgasaun Dekretu-Lei ida-ne’e, sei revoga Dekretu-Lei n.11/2022, loron 9 fulan-marsu, kona-ba estrutura orgánika APC nian.

Jornalista: Leopoldina de Carvalho