Hatutan.com, (04 Abríl 2024), Díli—Governu la tolera no sei foti medida hasoru manorin-na’in no estudante sira ne’ebé prátika Arte Marsiál iha eskola sira.

Sasan kro’at ne’ebé Membru GAM utiliza iha konfrontu Kristu Rei. Foto/PNTL.

Primeiru-Ministru Kay Rala Xanana Gusmão hateten, iha eskola balun manorin-na’in no estudante sira haree malu la di’ak tanba arte marsiais, tanba ne’e Governu bandu atu iha prátika Arte Marsiais iha eskola sira.

Lee Mós: Governu Kontínua Suspende Atividade GAM-GAR To’o Novembru 2024

“Iha eskola balun mestri pertense ba arte marsial ka grupu ida no alunus iha grupu ida, fila alunu baku fali professór. Professór pertense bá grupu ida baku alunu sira, duni alunu sira hosi grupu seluk. Ne’e mak iha rezolusaun Governu nian suspende arte marsiál no mós halo proibisaun bá mestri sira kahur fali buat ida-ne’e iha fali eskola nia laran. Fulan neen tán hodi hadi’a nafatin,” Kay Rala Xanana Gusmão hateten iha Palásiu Prezidensiál Nicolau Lobato Bairru-Pité, Kinta (04/04/2024).

Kontinua Suspende Atividade AM

“Ha’u aproveita dehan bá Prezidente Repúblika katak, horisehik ami aprova rezolusaun ida atu prolonga hodi halo suspensaun bá arte marsiais ninian la’ós tanba kastiga la’e. Atu kontinua tanba sei presiza nafatin situasaun suspensaun ninian,” Primeiru-Ministru hateten.

Xefe Governu hatutan, iha tempu suspensaun ne’e tomak sei buka influénsia, motiva Arte Marsiál sira, bainhira sira temi naran arte entaun presiza loke to’ok kompetisaun ida bá hatudu, hanesan Taekwondo, Karatedo ba iha li’ur mós mai, dala ruma lori medalla halo ema hotu kontente, ne’ebé sira mós bele muda mentalidade.

“Problema ida-ne’e, durante tempu ida-ne’e kontaktu grupu hotu-hotu, grupu balun seidauk iha kontrollu di’ak bá nia ema sira. Ne’e mak fulan neen tán hodi husu bá hotu-hotu atu kontrolla nia ema sira, kontrolla to’o ne’ebé, iha fatin treinu mós sira nian balun la koñese t’an, ne’e duni mak ohin ha’u informa bá Xefe Estadu,” nia esplika.

Xefe Governu subliña, tenke husik buat ne’e konsolida konsiénsia, rona dehan sira laiha ona problema mak foin prontu, sira mós vontade iha ona atu hatudu sira nia arte ne’e bele hapara suspensaun.  

Jornalista: Vito Salvadór