Hatutan.com, (05 Abríl 2024), Díli-Polícia Ciêntífica e de Investigação Criminal (PCIC) notifika konselleiru másimu partidu Kmanek Haburas Unidade Nasionál Timor Oan (KHUNTO), José dos Santos “Naimori” Bucar ho prezidente partidu, Armanda Berta dos Santos, nu’udár arguido bá kazu osan subvensaun partidu nian ne’ebé deskonfia gastu ka utiliza fali bá nesesidade privádu.

Konselleiru Masímu partidu KHUNTO, José dos Santos Naimori Bucar halo entrevista ho jornalista sira hafoin presta deklarasaun iha PCIC, Sesta (05/04/2024). Foto/Elio dos Santos da Costa

Informasaun ne’ebé Hatutan.com rekolla hosi fonte sira katak, instituisaun relevante balun halo keixa ka prosesa konselleiru másimu no prezidente KHUNTO bá Ministériu Públiku (MP) tanba iha relasaun ho Rezultadu Verifikasaun Relatóriu Kontas Partidus Polítiku, Orsamentu Subvensaun Públiku tinan 2021 nian ne’ebé la klaru.

Hatán bá keixa ferere, MP hola medida, hodi delega kompeténsia bá PCIC, notifika José dos Santos Naimori Bucar ho Armanda Berta ne’ebé nu’udár feen-laen, rejísta ho Númeru Krime ka NUC: 0021/23.PGCCC.

Iha Sesta (05/04/2024), tuku 09:00 Otl, Prezidente KHUNTO, Armanda Berta dos Santos ho Konselleiru Másimu partidu nian, Naimori Bucar, kumpri notifikasaun ida-ne’e, hodi bá hatán iha PCIC.

Hafoin presta ka fó tiha deklarasaun bá Investigadór sira iha PCIC, Konselleiru másimu KHUNTO José dos Santos Naimori Bucar, informa bá jornalista sira katak, ida-ne’e ligadu ho problema administrasaun ‘la-di’ak’ iha partidu laran. Maibé, ida ne’e depois mak konfirma de’it iha Tribunál Judisial Primeira Instánsia Díli (TJPID).

“Lae, lae, ita-boot sira bá hein de’it iha Tribunál, tanba ne’e administrasaun partidu nian de’it. Mai iha ne’e atu kontribui. Atu kontribui, depois bá iha Tribunál de’it. Ne’e liga bá administrasaun de’it, ne’e advogadu mak hatene ida-ne’e,” José dos Santos Naimori Bucar hateten.

Hatán kona-bá notifikasaun PCIC nian hasoru prezidente ho konselleiru másimu KHUNTO nian ne’e karik liga ho osan partidu nian, Naimori Bucar dehan, “lae, lae, lae. depois mak bá iha Tribunál de’it.”

Hatutan.com mós asesu informasaun balu hosi Jornal da República, Série I, Númeru 14 C, Edisaun  Tersa, 05 fulan-Abríl 2022, fó sai kona-bá Deliberasaun CNE 8/III/2022, kona-bá “Aprovasaun Rezultadu Verifikasaun Relatóriu Kontas Partidus Polítiku, Orsamentu Subvensaun Públiku Tinan 2021 nian”, mak hanesan iha aneksu;         

1. Kona-bá Konta Bankária, Armanda Berta dos Santos, José Agostinho da Silva, Maria Soi, hetan valór 6.
2. Prazu Aprezentasaun Relatóriu (45 dias) antes remata anu-fiskál, data limite 17 Novembru 2021 tuir prazu legál. Haree bá prazu legál aprezentasaun relatóriu ne’e, partidu aprezenta iha 19 fulan-Novembru 2021. Nune’e, CNE fó de’it valór 5.
3. Aprezentasaun Relatóriu hosi fulan-Novembru 2020 to’o Outubru 2021, la kumpre  6.
4. Organizasaun Kontabilista, la kumpre 7.

Tuir mai kona-bá Análize Reseita bá Kofre sira seluk tuir, (a) Lei, la kumpre 5, (b) Modelu Formuláriu Prestasaun Konta, la kumpre 5, (c) Intensidade Dokumentu sira, la kumpre 5, (d) Prosedimentu bá Transferénsia Kontribuisaun sira, la kumpre 5.

Transparénsia Movimentu Osan, katak osan tama no osan sai, nota bankária no iha kaixa partidu, iha 6 mak la klaru. Rekonsiliasaun entre Nota Bankária no Kaixa Partidu, iha 6 mak la klaru. Informasaun bá Patrimóniu Partidu, kumpre 8. Sede Partidu, kumpre 8. Inklui Análize bá Dokumentu Despeza sira, (a) resibu partidu, (b) resibu komérsiu nian

Kkona-bá Devér Kolaborasaun nian, (a) Meius komunikasaun (telefone, korrespondénsia), (b) Kumprimentu bá ezijénsia klarifikasaun, (c) Kooperasaun ninian, ida ne’ebé hetan nia valór 6 maka Kumprimentu bá ezijénsia klarifikasaun. 

Ho baze bá nota sira iha leten, maka iha publikasaun Jornál da República iha tempu ne’ebá, CNE hato’o ninia rekomendasaun bá Partidu KHUNTO mak hanesan tuir mai;

• Sujere atu aprezenta relatóriu periódikamente (Trimestrál no Semestrál).
• Sujere bá partidu KHUNTO bele loke konta bankária iha munisipiu sira hotu, nune’e bele fasilita transferénsia orsamentu atividade hosi nasionál bá munisipiu.
• Sujere bá partidu KHUNTO, uainhira halo levantamentu, tenke relata resibu atualizadu hosi banku no tenke aneksu iha relatóriu.
• Sujere atu bele haree didi’ak relatóriu entre saldu inísiu ho saldu finál iha kaixa tenke iha koerénsia.
• Sujere bá ekipa fiskalizadór finansas partidu KHUNTO tenke avalia nafatin relatóriu hirak ne’e, molok hato’o bá iha CNE.
• Sujere bá partidu aprezenta relatóriu tenke tuir prazu legál.
• Sujere bá partidu atu kria Kuota hosi membru sira.
• Sujere bá partidu atu halo rezumu balansu kona-bá konta reseita no despeza molok submete relatóriu bá CNE.

Advagadu privadu Arnaldo da Costa Lopes

Liga ho notifikasaun hasoru lideransa na’in-rua partidu KHUNTO nian ne’e, no ho baze bá informasaun hotu ne’ebé hato’o tiha ona hosi parte Arguido sira, Investigadór sira PCIC nian halo hela análize, no depois sei elabora autos sira krime nian bá Ministériu Públiku, molok submete bá Prosesu Primeiru Interrogatóriu Judisiál iha Tribunál Dili.

Hosi sorin seluk advagadu privadu Arnaldo da Costa Lopes,  ne’ebé fó asisténsia legal bá Armanda Berta ho José dos Santos Naimori Bucar, klarifika katak hanesan sidadaun, Naimori ho Armanda Berta  koolabora ho justisa ho presta deklarasaun. Mais, intermus de kazu saida, eidauk hatene, tanba ne’e na’in maka Prokuradór.

“Hanesan sidadaun, ita lori sira mai atu presta deklarasaun. Ami seidauk fó hatene, karik, iha Ministériu Públiku denunsia nia akuzasaun bá kazu ruma, oras ida ita-boot sira sei hatene, tanba ne’e segredu justisa. Ne’e prosesu prelemináriu,” nia hateten.

Kona-bá asuntu administrasaun iha partidu, Advogadu ne’e dehan, nu’udár advogadu, mai fó de’it asisténsia bá iha presta deklarasaun, iha prosesu prelemináriu bá identifikasaun bá lider supremu no prezidente mai iha PCIC.

Jornalista: Rogério Pereira Cárceres